မဲခေါင်၊ မေ ၂၇
အမျိုးသားဒီမိုကရေစီမဟာမိတ်တပ်မတော် (NDAA) ထိန်းချုပ်ရာ အထူးဒေသ (၄) မိုင်းလားမြို့တွင် မိုင်းလားဒေသရဲတပ်ဖွဲ့နှင့် တရုတ်အစိုးရ ပြည်သူ့လုံခြုံရေးဗျူရိုတို့ ပူးပေါင်းကာ ယမန်နေ့ညပိုင်းက အွန်လိုင်းငွေလိမ်နှင့် လူကုန်ကူးဂိုဏ်းတစ်ခုကို ဝင်ရောက်စီးနင်းခဲ့ကြောင်း သတင်းရင်းမြစ်များထံမှ သိရသည်။
ယမန်နေ့ မေလ ၂၆ ရက် ညပိုင်းက မိုင်းလားမြို့ရှိ တရုတ်နိုင်ငံသား လုပ်ငန်းရှင်တစ်ဦး ခေါင်းဆောင်ဖွင့်လှစ်ထားသည့် ကျားဖြန့် အွန်လိုင်းငွေလိမ်နှင့် လူကုန်ကူးဂိုဏ်း အခြေစိုက်ရာ တိုက်ခန်းတစ်ခုကို မိုင်းလားဒေသရဲတပ်ဖွဲ့နှင့် တရုတ်ရဲတပ်ဖွဲ့ဝင်များ ပူးပေါင်းကာ အရပ်ဝတ်များဖြင့် ဝင်ရောက်စီးနင်းခဲ့ခြင်း ဖြစ်သည်။
ယင်းဂိုဏ်းအခြေစိုက်ရာ တိုက်ခန်းအတွင်း၌ လူကုန်ကူးခံရပြီး လိင်ကျွန်ပြုခံထားရသည့် တရုတ်နိုင်ငံသား အမျိုးသမီးငယ်များနှင့် မြန်မာပြည်မမှ မိန်းကလေးငယ်များကို အသုံးချကာ ညစ်ညမ်းဗီဒီယိုများ ရိုက်ကူးထုတ်လုပ် ဖြန့်ချိနေသည်ကိုပါ စစ်ဆေးတွေ့ရှိရသဖြင့် သက်သေခံပစ္စည်းများနှင့်အတူ ဖမ်းဆီးနိုင်ခဲ့ကြောင်း သတင်းရင်းမြစ်က ဆိုသည်။
“လက်ရှိ ဖမ်းဆီးရမိတဲ့ လူဦးရေအတိအကျကိုတော့ စာရင်းမရသေးပါဘူး။ အခုက မိုင်းလားမှာ တရုတ်ရဲတပ်ဖွဲ့က ရုံးခွဲငယ်တစ်ခု ဖွင့်လှစ်ပြီး စစ်ဆင်ရေးသဘောမျိုး ပူးပေါင်းလုပ်ဆောင်နေတာ ဖြစ်တယ်” ဟု ၎င်းက ပြောသည်။
ယခုလက်ရှိတွင် တရုတ်အစိုးရ ပြည်သူ့လုံခြုံရေးဗျူရိုသည် မိုင်းလားဒေသတွင် ရုံးခွဲငယ်တစ်ခု ဖွင့်လှစ်ထားရှိပြီး မိုင်းလားဒေသရဲတပ်ဖွဲ့ကို ခေတ်မီအထောက်အကူပြု ကိရိယာများ တပ်ဆင်ပေးခြင်းအပါအဝင် လိုအပ်သည့် နည်းပညာနှင့် ပံ့ပိုးမှုများ ပေးထားကြောင်း သိရသည်။
ပြီးခဲ့သည့် သီတင်းပတ်များအတွင်းကလည်း တရုတ်အစိုးရက ဖမ်းဝရမ်းထုတ်ထားသည့် ကျားဖြန့်ငွေလိမ်ဂိုဏ်းများနှင့် ပတ်သက်ဆက်နွှယ်သူ တရုတ်နိုင်ငံသား ၃၀၀ နှင့် ၄၀၀ ကြားကို ဖမ်းဆီးရမိခဲ့ပြီး တရုတ်နိုင်ငံဘက်သို့ တာလော့နယ်စပ်ဂိတ်မှတစ်ဆင့် လွှဲပြောင်းပေးအပ်ခဲ့ပြီး ဖြစ်ကြောင်း ဒေသတွင်းသတင်းများအရ သိရသည်။
#MeKongNews
#မိုင်းလား
#အထူးဒေသ၄
#ကျားဖြန့်
#တရုတ်အစိုးရ
#လူကုန်ကူး
