မဲခေါင်၊ မေ ၁၂
ကျားဖြန့်သမားအများစု အပါအဝင် တရုတ်နိုင်ငံသား ၄၃ ဦးကို ဖမ်းဆီးပြီး တရုတ်နိုင်ငံသို့ နယ်စပ်ဂိတ် မှတစ်ဆင့် ထပ်မံလွဲပြောင်းပေးခဲ့သည်ဟု “ဝ”တပ်ဖွဲ့ – UWSA က ယမန်နေ့ မေ ၁၁ ရက်တွင် သတင်းထုတ်ပြန်သည်။
တရုတ်နိုင်ငံသို့ လွဲပြောင်းပေးလိုက်သည့် ၄၃ ဦးတွင် ၃၉ ဦးသည် တရုတ်ကျားဖြန့်များဖြစ်ပြီး ၄ ဦးမှာ တရုတ်ဘက်က ဖမ်းဆီးပေးရန် စာပို့အကူအညီတောင်းသဖြင့် ဖမ်းဆီးပေးသည့်သူများ ဖြစ်သည်ဟု “ဝ”တပ်ဖွဲ့ ထုတ်ပြန်ချက်တွင် ဖော်ပြသည်။
ယခုဖမ်းဆီးရမိသည့် သူများသည် “ဝ”ဒေသတွင်းသို့ ဝင်ရောက်ကာ ကျားဖြန့်လုပ်ငန်းများကို လုပ်ဆောင်နေသူများ ဖြစ်ပြီး ထောက်လှမ်းရေး သတင်းအချက်အလက်နှင့် ပြည်သူများ၏ တိုင်ကြားချက်များကြောင့် တိကျစွာ ဖမ်းဆီးနိုင်ခဲ့ခြင်း ဖြစ်သည်ဟုလည်း “ဝ”တပ်ဖွဲ့က ဆိုသည်။
၎င်းတို့ကို ကျားဖြန့်လုပ်ငန်းတွင် အသုံးပြုနေသည့် အီလွန်ထရောနစ်ပစ္စည်းများ၊ ပြစ်မှုကျူးလွန်ရာတွင် အသုံးပြုသည့် ကိရိယာများနှင့်တကွ ဖမ်းဆီးရမိခဲ့ခြင်းဖြစ်ပြီး ယင်းသက်သေခံပစ္စည်းများကိုလည်း တရုတ်နိုင်ငံသို့ လွှဲပြောင်းပေးခဲ့ကြောင်း ထုတ်ပြန်ချက်တွင် ဖော်ပြသည်။
“ဝ”တပ်ဖွဲ့အနေဖြင့် တရုတ်ဘက်နှင့် ပူးပေါင်းဆောင်ရွက်မှုကို ပိုမိုနက်ရှိုင်းစွာ တိုးချဲ့ဆောင်ရွက်သွားမည်ဖြစ်ပြီး ကျားဖြန့်လိမ်လည်မှု လုပ်ငန်းများကို လုံးဝသည်းခံမည် မဟုတ်ဘဲ နှိမ်နှင်းသွားမည်ဟု ထုတ်ပြန်ချက်တွင် ပြောသည်။
“ဝ”တပ်ဖွဲ့သည် ပြီးခဲ့သည့် မေ ၈ ရက်တွင်လည်း မိုင်းလားတပ်ဖွဲ့နှင့် ပူးပေါင်းကာ တရုတ်နိုင်ငံသားများ အပါအဝင် ကျားဖြန့်သမား ၇၈ ဦးကို ဖမ်းဆီးရမိခဲ့ပြီး တရုတ်နိုင်ငံသား ကျားဖြန့် ၁၀ ဦးကို တရုတ်ဘက်သို့ လွဲပြောင်းပေးခဲ့သေးသည်။
ယခုနှစ် ၄ လကျော်အတွင်း “ဝ”တပ်ဖွဲ့သည် တရားမဝင် ဝင်ရောက်လာသည့် တရုတ်နိုင်ငံသား ၆၀၀ ကျော်ကို ဖမ်းဆီးကာ တရုတ်ဘက်သို့ ပြန်လည်လွှဲပြောင်းပေးခဲ့ပြီး ဖြစ်သည်။
#MeKongNews
#ကျားဖြန့်
#ဖမ်းမိ
#တရုတ်နိုင်ငံသား
#လွှဲပြောင်း
