မဲခေါင်၊ ဧပြီ ၂၈
ရှမ်းပြည်မြောက်ပိုင်း၊ လားရှိုးမြို့ပြင်ရပ်ကွက်ဖြစ်သည့် ရပ်ကွက် ၁၂ တွင် ကိုးကန့်တပ်ဖွဲ့ – MNDAA က စစ်မှုထမ်းကောက်နေသည်ဟု ဒေသခံများထံမှ သိရသည်။
ပြီးခဲ့သည့် မတ်လကုန်မှစပြီး ရပ်ကွက် ၁၂ ၏ ရာအိမ်မှူးဖြစ်သူ ဇေမောင်မောင်ဖြိုးအောင်သည် ရပ်ကွက်တွင်းရှိ ဒေသခံများကို အစည်းအဝေး ခေါ်ယူကာ ကိုးကန့်တပ်ဖွဲ့စေခိုင်းချက်အရ စစ်မှုထမ်းခေါ်ယူခဲ့ခြင်းဖြစ်ကြောင်း ဒေသခံ သတင်းရင်းမြစ်က ပြောသည်။
MNDAA အတွက် စစ်မှုထမ်း အယောက် ၂၀ ပို့ဆောင်ပေးရမည်ဖြစ်ပြီး သွားမည့်သူ မရှိပါက လူအစားထိုး ထည့်ရမည်ဟု လားရှိုး – သိန္နီလမ်းမကြီးပေါ်တွင်ရှိသည့် ရပ်ကွက် ၁၂ ၏ အုပ်ချုပ်ရေးမှူးနှင့် ရာအိမ်မှူးတို့က ပြောဆိုခဲ့သည်ဟု သတင်းရင်းမြစ်များက ပြောသည်။
ထိုသို့ပြောဆိုပြီးနောက် ကိုးကန့်တပ်ဖွဲ့သို့ စစ်မှုထမ်းသွားချင်သည့်သူများ မရှိသဖြင့် တစ်အိမ် ၅ သောင်းကျပ် ကောက်ခံကာ လူအစားထိုး ဝယ်ထည့်ခဲ့သည်ဟုလည်း ဒေသခံအမျိုးသားတစ်ဦးက ပြောသည်။
“အစက စာရင်းကောက်တယ်။ အစည်းဝေးလုပ်တယ်။ စစ်သားကောက်မယ်ဆိုတဲ့ အကြောင်းပေါ့။ သူတို့ခန့်ထားတဲ့ ရာအိမ်မှူး ဇေမောင်မောင်ဖြိုးအောင်ကို ကောက်ခိုင်းတာပါ။ ဘယ်သူမှ မသွားလို့ တစ်အိမ် ၅ သောင်းတောင်းပြီး စစ်သား ၀ယ်ထည့်လိုက်ရတယ်” ဟု ၎င်းက ပြောသည်။
တပ်သားသစ်အတွက် စာရင်းကောက်ခံသည့် ရပ်ကွက် ၁၂ တွင် အနည်းဆုံး လူအယောက် ၂၀ လာရောက်စစ်မှုထမ်းရန် ကိုးကန့်တပ်ဖွဲ့က ခေါ်ယူနေခြင်းဖြစ်ပြီး သွားမည့်သူ မရှိသဖြင့် ငွေကောက်ပြီး ဝယ်ထည့်သော်လည်း အယောက် ၂၀ မပြည့်သေးကြောင်း သတင်းရင်းမြစ်က ပြောသည်။
“ရပ်ကွက်တိုင်းတော့ မဟုတ်ဘူး။ ဒီရပ်ကွက်ကို လူမျိုးစုံအယောက် ၂၀ တောင်းတယ်။ စာရင်းထဲပါတဲ့ မိသားစုတွေဆိုရင်လည်း သားသမီးဘယ်နေရာရောက်ရောက် ပြန်ခေါ်လို့ ပြောတယ်။ ပြန်မလာရင် အိမ်တွေ ချိတ်ပိတ်မယ်လို့ပြောတယ်” ဟု ရပ်ကွက်နေ ပြည်သူတစ်ဦးက ပြောသည်။
လားရှိုးမြို့တွင်းရှိ ရပ်ကွက်များတွင်မူ စစ်ကောင်စီက ထိန်းချုပ်ထားသဖြင့် MNDAA က စစ်မှုထမ်းခေါ်ယူခြင်းမရှိဘဲ ၎င်းတို့ထိန်းချုပ်ထားသည့် လားရှိုးမြို့ပြင် အေဒီတံတားအကျော်ရှိ တိုးချဲ့ရပ်ကွက်ဖြစ်သည့် ရပ်ကွက် ၁၂ တစ်ခုကိုသာ စစ်မှုထမ်းခေါ်ယူခြင်းဖြစ်ကြောင်း သတင်းရင်းမြစ်များထံမှ သိရသည်။
“ရပ်ကွက် ၁၂ ကတော့ မြို့အစွန်ဖြစ်တာပေါ့၊ အေဒီတံတားအကျော်မှာရှိတာလေ အဲ့မြို့ပြင်တိုးချဲ့ရပ်ကွက်ကို ကိုးကန့်က ထိန်းချုပ်ထားတာ” ဟု သတင်းရင်းမြစ်က ပြောသည်။
လားရှိုးမြို့ပေါ်ရှိ ရပ်ကွက်များကိုမူ MNDAA က စစ်မှုထမ်း စာရင်းကောက်တာမျိုး မရှိကြောင်း အမှတ် ၉ ရပ်ကွက်တွင် နေထိုင်သည့် အမျိုးသမီးတစ်ဦးက ပြောသည်။
“အမတို့ ရပ်ကွက်ထဲမှာတော့ ကိုးကန့်တွေ စစ်မှုထမ်းစာရင်း လာကောက်တာ မကြားမိဘူးရယ်” ဟု ၎င်းက ပြောသည်။
MNDAA သည် ဧပြီ ၂၁ ရက်မှ စတင်ပြီး လားရှိုးမြို့နယ် အီနိုင်းရွာအနီးတွင် ဒေသခံများနှင့် ခရီးသွားလူငယ် ၇၀ ဦး ဝန်းကျင်ကို မူးယစ်ဆေးဝါး စစ်ဆေးသည်ဟု အကြောင်းပြကာ သိန္နီသို့ ဖမ်းဆီးခေါ်ဆောင်သွားခဲ့သည်။
#MeKongNews
#လားရှိုးမြို့
#MNDAA
#စစ်မှုထမ်း
#ရှမ်းမြောက်
