မဲခေါင်၊ ဧပြီ ၁၇
ယနေ့ ကျရောက်သည့် ၂၀၂၆ ခုနှစ်၊ မြန်မာနှစ်ဆန်းတစ်ရက်နေ့တွင် တစ်နိုင်ငံလုံးအတိုင်းအတာဖြင့် အကျဉ်းသား ၄,၃၃၅ ဦး လွတ်ငြိမ်းသက်သာခွင့်ရရှိရာ၌ ရှမ်းပြည်တောင်ပိုင်း၊ ညောင်ရွှေအကျဉ်းထောင်မှ ၁၀၈ ဦးနှင့် အလုပ်စခန်းမှ ၃၀ ဦးတို့ လွတ်မြောက်လာကြောင်း သိရသည်။
ညောင်ရွှေအကျဉ်းထောင်မှ လွတ်မြောက်လာသူများတွင် အကျဉ်းသား ၉၈ ဦးနှင့် အကျဉ်းသူ ၁၀ ဦး၊ စုစုပေါင်း ၁၀၈ ဦး ပါဝင်ပြီး ၎င်းတို့သည် နောက်တစ်ကြိမ် ပြစ်မှုထပ်မံကျူးလွန်ပါက ယခုကျန်ရှိသည့် ပြစ်ဒဏ်များကိုပါ ပူးတွဲကျခံရမည်ဟူသော သတ်မှတ်ချက်ဖြင့် လွတ်မြောက်လာခြင်း ဖြစ်သည်။
ယင်းသို့ လွတ်မြောက်လာသူများ မည်သည့်ပုဒ်မများဖြင့် ပြစ်ဒဏ်ကျခံနေရသူများဖြစ်သည်ကိုမူ အသေးစိတ် မသိရသေးပေ။
အလားတူ တောင်လေးလုံး စိုက်ပျိုးမွေးမြူရေးနှင့် အသက်မွေးမှုအတတ်သင်စခန်း (ရဲဘက်) မှ အကျဉ်းသား ၃၀ ဦးနှင့် တောင်ကြီးအချုပ်ထောင်မှ အကျဉ်းသား ၁ ဦးတို့လည်း ယနေ့တွင် လွတ်မြောက်လာခဲ့ကြောင်း သိရသည်။
ယင်းသို့ လွတ်မြောက်လာသူများထဲတွင် မတရားဖမ်းဆီးခံထားရသည့် နိုင်ငံရေးအကျဉ်းသားများ မပါဝင်ပေ။
စစ်ကောင်စီသည် ယနေ့ကျရောက်သည့် နှစ်ဆန်းတစ်ရက်နေ့တွင် သေဒဏ်ကျခံနေရသူများကို ထောင်ဒဏ်တစ်သက်၊ ထောင်ဒဏ်တစ်သက်နှင့် နှစ် ၄၀ အထက် ကျခံနေရသူများကို ထောင်ဒဏ် နှစ် ၄၀ သို့လည်းကောင်း၊ ထောင်ဒဏ် နှစ် ၄၀ အောက် ကျခံနေရသူများကို ကျန်ရှိသည့်ပြစ်ဒဏ်၏ ခြောက်ပုံတစ်ပုံအား လျှော့ပေါ့ခြင်းဖြင့်လည်းကောင်း လွတ်ငြိမ်းသက်သာခွင့် ပြုခဲ့ခြင်း ဖြစ်သည်။
#MeKongNews
#လွတ်ငြိမ်း
#တောင်လေးလုံးထောင်
#နှစ်ဆန်းတစ်ရက်နေ့
#နိုင်ကျဉ်း
