မဲခေါင်၊ ဧပြီ ၂
UWSA ထိန်းချုပ် မိုင်းပေါက်ခရိုင်၊ မိုင်းပေါက်မြို့တွင် လူသတ်မှုကျူးလွန်သူ အမျိုးသားကို သေဒဏ်နှင့် ရာဇဝတ်သားကို ခိုလှုံခွင့်ပေးထားပြီး သက်သေဖျောက်ဖျက်ရန် ကြိုးစားပေးသည့် အမျိုးသမီးတစ်ဦးကို ထောင်ဒဏ် ၆ နှစ်ချမှတ်ခဲ့ကြောင်း “ဝ” တရားစီရင်ရေးကော်မတီ – WSP ၏ ထုတ်ပြန်ချက်ကို ကိုးကား၍ ဒေသတွင်းသတင်း WNL က ယနေ့ ဖော်ပြသည်။
ယင်းတရားစီရင်သည့် အခမ်းအနားကို မိုင်းပေါက်မြို့တွင် ယနေ့ ဧပြီ ၂ညရက် နံနက်ပိုင်းက လူထုရှေ့မှောက်၌ ပြုလုပ်ခဲ့ခြင်းဖြစ်ကြောင်း သိရသည်။
“ကျူးလွန်သူတွေက သမီးရည်းစားတွေလေ။ ကောင်လေးက အဲ့လူကိုသေနတ်နဲ့ ပစ်သတ်ပြီး ပိုက်ဆံ ယွမ်ငွေ ၂ သောင်းယူသွားတာ၊ ကောင်လေးက ဆေးလည်းသုံးထားတယ်။ လောင်းကစားလည်းလုပ်တယ်၊ အလောင်းကိုလည်း ဖျောက်ဖျက်ခဲ့ပြီး သူ့ကောင်မလေးဆီ သွားနေခဲ့တာ၊ သူ့ကောင်မလေးကလည်း ဖုန်းပြောတဲ့ သက်သေတွေ သွေးစွန်းနေတဲ့ အဝတ်တွေ ဖျောက်ဖျက်ခဲ့တာ။ ကြံရာပါပေါ့”ဟု သွားရောက်ကြည့်ရှုခဲ့သူ တစ်ဦးက ပြောသည်။
ယင်းအမှုကို ကျူးလွန်သည့် အသက်၂၄ နှစ်အရွယ် လီနီလူဆိုသူ အမျိုးသားသည် မိုင်းမောမြို့တွင် နေထိုင်သူဖြစ်သည်ဟု ဆိုသည်။
WSP ၏ယနေ့ ထုတ်ပြန်ချက်တွင် ” မိုင်းပေါက်ခရိုင်၊ တရားစီရင်ရေး ကော်မတီ ပြည်သူ့တရားရုံးမှ ပထမအကြိမ် စစ်ဆေးခြင်း၊ “ဝ” ပြည်နယ်တရား စီရင်ရေးကော်မတီ ပြည်သူ့တရားရုံးမှ ဒုတိယ အကြိမ်စစ်ဆေးခြင်းနှင့် ဗဟိုကော်မတီ၏ အတည်ပြုချက်ဖြင့် တရားရုံးက အောက်ပါအတိုင်း ဆုံးဖြတ်ခဲ့သည်။ တရားခံ လီနီလူသည် တရားမဝင်လက်နက်ကိုင်ဆောင်မှု၊ ရည်ရွယ်ချက်ရှိရှိ လူသတ် မှု၊ လုယက်မှုနှင့် မူးယစ်ဆေးဝါး သုံးစွဲမှုတို့ဖြင့် အပြစ်ရှိကြောင်း ဆုံးဖြတ်ခဲ့ပြီး နိုင်ငံရေးအခွင့်အ ရေးများ ဆုံးရှုံးစေကာ သေဒဏ်ချမှတ်ခံခဲ့ရသည်။ တရားခံ ဘောင်အွမ်သည် သက်သေ
အထောက်အထားများ ဖျက်ဆီးရာတွင် အားပေးကူညီမှုနှင့် ရာဇဝတ် သားတစ်ဦးကို ခိုလှုံခွင့်ပေးမှုတို့ဖြင့် အပြစ်ရှိကြောင်း ဆုံးဖြတ်ခဲ့ပြီး စုစုပေါင်း ထောင်ဒဏ် ခြောက်နှစ် ချမှတ်ခဲ့သည်။ စီရင်ချက် ချပြီးနောက် တရားခံ လီနီလူကို ချက်ချင်း ကွပ်မျက်ရာနေရာသို့ ခေါ်ဆောင်သွားပြီး ကွပ်မျက်ခဲ့သည်” လို့ဖော်ပြထားသည်။
ပြီးခဲ့သည့် မတ် ၂၉ ရက်ကလည်း UWSA သည် လူသတ်မှုကျူးလွန်သည့် အမျိုသား ၄ ဦးကို ပန်ဆန်းတွင် သေဒဏ်ချမှတ်ခဲ့သေးသည်။
#MeKongNews
#မိုင်းပေါက်တွင်
#လုယက်၊
#လူသတ်
#အလောင်းဖျောက်
#သေဒဏ်
