မဲခေါင်၊ မတ် ၉
စစ်ကောင်စီနှင့် ရုရှားတို့ ပူးပေါင်းကာ လည်ပတ်ရန် ကြိုးစားနေသည့် ရှမ်းပြည်တောင်ပိုင်း၊ တောင်ကြီးမြို့နယ်၊ နမ့်ဆီးကျေးရွာအုပ်စုရှိ အမှတ် (၂) ပင်းပက်သံမဏိစက်ရုံ ပြန်လည် လည်ပတ်ရေးအတွက် အောက်စီဂျင် နှင့် နိုက်ထရိုဂျင် ဓာတ်ငွေ့ ၂ မျိုးအား စတင်ထုတ်နေပြီ ဖြစ်ကြောင်း သိရသည်။
ယင်းအမှတ်(၂) ပင်းပက် သံမဏိစက်ရုံတွင် အောက်ဆီဂျင်နှင့် နိုက်ထရိုဂျင် ဓာတ်ငွေ့များကို စီးပွားဖြစ် စတင်ထုတ်လုပ်သည့် အလုပ်ရုံ (Air Separation Plant) စီးပွားဖြစ် စတင်လည်ပတ်ခြင်း အခမ်းအနားကို စစ်ကောင်စီ ရှမ်းပြည်နယ်အစိုးရအဖွဲ့ ဝန်ကြီးချုပ် ဦးအောင်အောင် ဦးဆောင်ကာ မတ် ၈ ရက် မွန်းလွဲပိုင်းတွင် ကျင်းပခဲ့သည်။
ယင်းဓာတ်ငွေ့များသည် သံနှင့် သံမဏိထုတ်လုပ်ရာတွင် အရေးကြီးသည့် အစိတ်အပိုင်းတစ်ခုဖြစ်ပြီး စစ်ကောင်စီက ရုရှားနှင့် ပူးပေါင်း၍ ပင်းပက် သံမဏိစက်ရုံကို ပြန်လည်လည်ပတ်နိုင်ရန် ပြင်ဆင်နေခြင်းဖြစ်ကြောင်း ရှမ်းပြည်အခြေစိုက် သဘာဝပတ်ဝန်းကျင်အရေး တက်ကြွလှုပ်ရှား အမျိုးသမီးတစ်ဦးက သုံးသပ်သည်။
“အောက်ဆီဂျင်နဲ့ နိုက်ထရိုဂျင် ဓာတ်ငွေ့တွေက သံ၊ သံမဏိထုတ်လုပ်ရာမှာ အရေးကြီးတဲ့ မဖြစ်မနေအခန်းကဏ္ဍမှာပါတယ်။ အောက်စီဂျင်က မီးပြင်းဖို့အားပေးတယ်၊ တခြားဓာတ်သတ္ထုတွေသန့်စင်ပေးနိုင်တယ်။ နိုက်ထရိုဂျင်ကကျတော့ လောင်ကျွမ်းပြီး ပေါက်ကွဲတာကိုကာကွယ်နိုင်ဖို့နဲ့ သံရည်ပူတွေကို အအေးပေးတဲ့ နေရာမှာ မရှိမဖြစ်သုံးရတဲ့အရာဖြစ်တယ်။ အခု ဓာတ်ငွေ့ထုတ်လုပ်တာက သံမဏိစက်ရုံပြန်လည် လည်ပတ်ရေးအတွက် အချက်ပြလိုက်တဲ့သဘောပဲလို့ မြင်ပါတယ်” ဟု ၎င်းက ဆိုသည်။
ထို့အပြင် ပင်းပက် သံမဏိစက်ရုံ စီမံကိန်းကြောင့် ယခင်က ဒေသခံများ၏ မြေဧက ထောင်ချီ သိမ်းယူခံခဲ့ရပြီး ဒေသခံအချို့သည် လျော်ကြေး မရရှိခြင်းနှင့် အသက်မွေးဝမ်းကျောင်း နှင့် ကျန်းမာရေးဆိုင်ရာ ထိခိုက်မှုများ ရှိခဲ့ကြောင်း ဒေသခံများနှင့် PYO ပအိုဝ်းလူငယ်အစည်းအရုံးက ပြုစုတင်ပြထားသော မှတ်တမ်းများအရ သိရသည်။
စက်ရုံပြန်လည် လည်ပတ်ပါက သဘာဝပတ်ဝန်းကျင် ထိခိုက်မှု များပြားပြီး ဒေသခံများ ဘေးထွက်ဆိုးကျိုးများကို ခံစားရမည်ဖြစ်ကြောင်း သဘာဝပတ်ဝန်းကျင်အရေး တက်ကြွလှုပ်ရှားသူ အမျိုးသမီးက ထောက်ပြသည်။
“သဘာဝပတ်ဝန်းကျင် အနေနဲ့ကြည့်မယ် ဆိုရင်လည်း လူထုကိုရော၊ ပတ်ဝန်းကျင်ကိုရော တော်တော်လေးထိခိုက်နိုင်ပါတယ်။ စက်ရုံကထွက်လာတဲ့ ဓာတ်ငွေ့နဲ့ စွန့်ပစ်အညစ်အကြေးက အနားမှာရှိတဲ့ နမ့်တဘက်ချောင်းကို စီးမယ်ဆိုရင် ဒေသခံတွေရဲ့စိုက်ပျိုးမြေတွေ ပျက်စီးပြီး ရေကိုသုံးနေရတဲ့အတွက် အသက်ရှူလမ်းကြောင်းဆိုင်ရာနဲ့ အသည်း၊ ကျောက်ကပ်ကျန်းမာရေး ထိခိုက်တာတွေဖြစ်နိုင်တယ်။ နမ့်တဘက်ချောင်းရေထဲ စိုက်တဲ့ နောင်မွန်ရှမ်းဆန်မျိုးဆိုရင် ဓာတုပစ္စည်းတွေအများကြီးပါလာတာမျိုး ဖြစ်သွားနိုင်ပါတယ်” ဟု ၎င်းက ပြောသည်။
ယင်းစက်ရုံကို ယခင်အစိုးရ လက်ထက်တွင် သဘာဝပတ်ဝန်းကျင်နှင့် စီးပွားရေးဆိုင်ရာ ပြဿနာများကြောင့် ရပ်နားထားခဲ့သော်လည်း စစ်အာဏာသိမ်းပြီးနောက် တစ်နှစ်ကျော်ကတည်းက စစ်ကောင်စီက ရုရှားကုမ္ပဏီများနှင့် ပူးပေါင်းကာ ပြန်လည်လည်ပတ်နိုင်ရေးအတွက် အမှတ်(၁) သံမဏိစက်ရုံနှင့် တိုက်ရိုက်ရထားလမ်းဖောက်လုပ်ခြင်း၊ ရုရှားမှပညာရှင်များပြန်လည် ခေါ်ယူပြီး သံမဏိထုတ်ရန် ကြိုးပမ်းနေကြခြင်း ဖြစ်ကြောင်း သိရသည်။
#MeKongNews
#ပင်းပက်
#သံမဏိစက်ရုံ
#စစ်ကောင်စီ
#ရုရှား
