မဲခေါင်၊ ဖေဖော်ဝါရီ ၁၈
ရှမ်းပြည်တောင်ပိုင်း၊ ညောင်ရွှေမြို့နယ်ရှိ အင်းလေးဒေသတွင် နာမည်ဆိုးဖြင့် ကျော်ကြားသည့် PNA စစ်ခေါင်းဆောင်တစ်ဦးဖြစ်သူ ဆရာဖေ (ခ) ဗိုလ်ကြီးဖေသည် ယမန်နေ့ ဖေဖော်ဝါရီ ၁၇ ရက် နေ့လယ်ပိုင်းတွင် ယာဉ်တိုက်မှုဖြစ်ပြီး ပွဲချင်းပြီး သေဆုံးခဲ့ကြောင်း ဒေသခံများထံမှ သိရသည်။
ရရှိသည့် သတင်းများအရ ၎င်းသည် အရက်မူးပြီး ဆိုင်ကယ်စီးလာစဉ် မိုင်းသောက်ကျေးရွာအနီး အင်းလေး အရှေ့ကန်ပတ်လမ်းပေါ်တွင် လမ်းကြောင်းမှားကာ တစ်ဖက်မှလာသော ကားတစ်စီးနှင့် တိုက်မိခဲ့သဖြင့် ဒဏ်ရာ အပြင်းအထန်ရကာ အခင်းဖြစ်ပွားရာ၌ပင် သေဆုံးခဲ့ကြောင်း သိရသည်။
၎င်းသည် အင်းလေးတောင်ပိုင်း နန်းတုတ်၊ ဆောင်နန်းခဲ၊ ရေပူ၊ ဘုရားတောင်ကျေးရွာများကို မီးရှို့စဥ်က ဦးဆောင်ခဲ့သူ ဖြစ်ကြောင်း ဒေသခံများထံမှ သိရသည်။
“ဆရာဖေက အင်းလေးဒေသမှာ စစ်သားစုဆောင်းတာတွေ၊ ရွာသားနေအိမ်တွေကို ဖျက်ဆီးတာတွေမှာ ပါဝင်ခဲ့သူပါ။ စစ်တပ်ရဲ့ တရားမဝင် ရွေးကောက်ပွဲ လုပ်တဲ့အချိန်မှာလည်း ဒေသခံတွေကို ဖိအားပေး၊ ခြိမ်းခြောက်ခဲ့သူ ဖြစ်တယ်။ သူ့ကြောင့် စစ်တပ်ထဲ ရောက်သွားသူတွေ အများကြီးရှိခဲ့ပြီး လူထုက အရမ်း ကြောက်ခဲ့ရပါတယ်” ဟု ဒေသခံတစ်ဦးက မဲခေါင်သို့ ပြောသည်။
၎င်းသေဆုံးမှုကို ရှေးလူကြီးများ ပြောလေ့ရှိသည့် “မိမိပြုသည့်ကံ မိမိထံ ပြန်လာသည်”ဟု ဆိုရိုးအတိုင်း သာမန် မတော်တဆမှုတစ်ခု မဟုတ်ဘဲ ကျိန်စာသင့်ခြင်းသာ ဖြစ်ကြောင်း အင်းလေးဒေသခံများက ပြောဆိုကြသည်။
၎င်းသည် တော်လှန်ရေးအဖွဲ့ ဒရုန်းတိုက်ခိုက်မှုကြောင့် ဆောင်နန်းခဲတွင် သေဆုံးခဲ့သော ယခင် PNA ခေါင်းဆောင်တစ်ဦးဖြစ်သူ နောင်စိုင်း၏ နေရာကို ဆက်ခံခဲ့သူ ဖြစ်ကြောင်းလည်း သိရသည်။
ဆရာဖေသည် အိမ်မူရွာသူကြီး ဆရာလာ ဆိုသူက PNA အတွက် နွားခွန်ကောက်ရန် ၎င်းကို တာဝန်ပေးစဥ် ပင်လောင်းနယ်ထိန်းရဲနှင့် အဝေမတည့်သဖြင့် ဖမ်းဆီးခံရကာ ထောင်မှ ထွက်လာပြီးနောက် PNA ဖြစ်လာသူဟု ဆိုသည်။
ထို့နောက် ဆရာရင်းဖြစ်သူ ဆရာလာ သည် ဖယ်ခုံရှိ သိုင်းဆရာတစ်ဦး၏ ဇနီးကို ခိုးယူ ပေါင်းသင်းသဖြင့် ရွာသားတစ်ဦး၏ တူမီးလက်ချက်ကြောင့် သေဆုံးပြီးနောက် ဆရာလာ နေရာကို ၎င်း၏သား နောင်စိုင်းက ဆက်ခံခဲ့ပြီး PNA ကို အထောက်အပံ့ ပြုခဲ့သည်ဟု ဆိုသည်။
PNA ခေါင်းဆောင်ဖြစ်လာသူ နောင်စိုင်းသည်လည်း စစ်ကောင်စီ၏ အားပေးမှုဖြင့် သစ်မှောင်ခိုနှင့် မူးယစ်ဆေးလုပ်ငန်းများ လုပ်ကိုင်ကာ ပြည်သူများကို နှိပ်စက်ခဲ့သည်ဟု ဒေသခံများထံမှ သိရသည်။
ဒေသခံများ၏ ပြောကြားချက်အရ နောင်စိုင်းနေရာကို ဆက်ခံသူ ဆရာဖေသည် ရေပူကျေးရွာ နှင့် ဘုရားတောင်ကျေးရွာများတွင် နေအိမ်များကို မီးရှို့ဖျက်ဆီးရာ၌ ဦးဆောင်ခဲ့သူဖြစ်ပြီး စစ်ကောင်စီ၏ အကြိုက်အလိုက် လှုပ်ရှားကာ သစ်မှောင်ခိုလုပ်ငန်းနှင့် မူးယစ်ဆေးဝါးလုပ်ငန်းများကို အကာအကွယ်ပေး လုပ်ကိုင်ပေးခဲ့သူလည်း ဖြစ်ကြောင်း ဒေသခံများက ဆိုသည်။
“သူတစ်ပါးအိမ်ကို မီးရှို့၊ သူတစ်ပါးပစ္စည်းကို လုယက်ခဲ့တဲ့ လက်တွေဟာ နောက်ဆုံးမှာတော့ သွေးအိုင်ထဲမှာပဲ နိဂုံးချုပ်သွားရတယ်” ဟု ဒေသခံတစ်ဦးက မှတ်ချက်ပေးသည်။
ထို့ပြင် PNA ထောက်တိုင် ဆရာဖေနှင့် ဆရာဆောင်တို့၏ ဖိအားပေးမှုကြောင့် ရေပူတစ်ရွာလုံး PNA ထဲသို့ အတင်းအဓမ္မ ဝင်ရောက်ခဲ့ရကြောင်း သိရသည်။
ဘုရားတောင်ကျေးရွာကို မီးရှို့ဖျက်ဆီးခြင်းနှင့် ရွာသားများ၏ အိုးခွက်ပန်းကန်မကျန် လုယက် ယူငင်ခြင်းများ၏ နောက်ကွယ်တွင် ဆရာဖေသည် အဓိကလက်သည် ဖြစ်သည်ဟု အမှတ် – ၁၀၀၉ အင်းလေး PDF က ပြောသည်။
အငယ်အနှောင်း များစွာယူထားကာ အကြွေးနွံနစ်နေသည့် ဆရာဖေသည် နောက်ဆုံးအချိန်အထိ အပျော်အပါးနှင့် အရက်သေစာနောက်သို့သာ လိုက်နေခဲ့သည်ဟုလည်း ဒေသခံများက ဆိုကြသည်။
လက်ရှိတွင် အခင်းဖြစ်ပွားမှုနှင့် ပတ်သက်၍ သက်ဆိုင်ရာဘက်မှ စစ်ဆေးမှုများ ဆက်လက် လုပ်ဆောင်နေပြီး PNA အဖွဲ့အတွင်း၌လည်း ခေါင်းဆောင်ပိုင်း လစ်ဟင်းမှုကြောင့် အတွင်းရေး ဂယက်ရိုက်ခတ်မှုများ ဖြစ်ပေါ်နေကြောင်း သတင်းရရှိသည်။
#MeKongNews
#အင်းလေးဒေသ
#PNA
#စစ်ခေါင်းဆောင်
#ဆရာဖေ
#သေဆုံး
