မဲခေါင်၊ ဖေဖော်ဝါရီ ၉
ရှမ်းပြည်တောင်ပိုင်း၊ အောင်ပန်းမြို့တွင် စစ်ကောင်စီက သိမ်းယူထားသည့် NLD ပါတီဝင်တစ်ဦး၏ နေအိမ်ကို ပြီးခဲ့သည့် ဖေဖော်ဝါရီ ၆ ရက်မှစတင်၍ လေလံတင်ရောင်းချနေကြောင်း ဒေသခံများထံမှ သိရသည်။
လေလံတင်ခံရသည့် နေအိမ်မှာ ကလောမြို့နယ် NLD အလုပ်အမှုဆောင်နှင့် အမျိုးသမီးလုပ်ငန်းကော်မတီ အတွင်းရေးမှူးအဖြစ် တာဝန် ထမ်းဆောင်ခဲ့သူ ဒေါ်ဝင်းမြသွယ် (ခေါ်) မနီ ပိုင်ဆိုင်သည့် အောင်ပန်းမြို့၊ ရပ်ကွက် (၃) ရှိ နေအိမ်ဖြစ်ကြောင်း သိရသည်။
၂၀၂၁ ခုနှစ်၊ ဇွန် ၁၉ ရက်တွင် စစ်ကောင်စီတပ်ဖွဲ့ဝင်များက နေအိမ်အတွင်း ဝင်ရောက်စီးနင်း ဖမ်းဆီးရန် ကြိုးပမ်းခဲ့သဖြင့် အိမ်ရှင်ဖြစ်သူက နေအိမ်ကို စွန့်ခွာခံရကာ ယနေ့ထက်တိုင် တိမ်းရှောင်နေရကြောင်း သိရသည်။
“အိမ်က ပင်းတယဘက်အထွက် နေရာကောင်းမှာ ရှိတယ်၊ ရှေ့ဘက် ပေ ၁၀၀ နောက် ၇၀ ရှိတဲ့မြေကွက်တောင် ဟိုတလောက ကျပ်သိန်းပေါင်း တစ်သောင်းသုံးထောင်ကျော် ရောင်းရတော့ အခုနေရာဆို တော်တော်တန်မယ်။ ဒါပေမဲ့ ဇာတိသားတွေကတော့ ဝယ်ရဲတဲ့သူ မရှိဘူး၊ ထိကိုမထိရဲကြတာ။ ဝယ်ရင်လည်း လူမုန်းခံရမယ့်အပြင် တစ်နေ့ ပြန်ပေးရမှာဆိုတော့ မဝယ်ရဲကြဘူး”ဟု အောင်ပန်းမြို့၊ ညောင်ပင်ထောင်ရပ်ကွက် နေသူတစ်ဦးက မဲခေါင်သို့ ပြောသည်။
စစ်တပ်က အာဏာသိမ်းပြီး နောက်ပိုင်း အောင်ပန်းမြို့ပေါ်ရှိ NLD ပါတီဝင်များ၏ နေအိမ်များကို ချိတ်ပိတ် သိမ်းဆည်းမှုများ ဆက်တိုက် ပြုလုပ်ခဲ့ပြီး ယခုအခါ ယင်းသိမ်းဆည်းထားသည့် အိမ်များထဲမှ လေလံတင် ရောင်းချမှုများ စတင်လာခြင်း ဖြစ်သည်။
#MeKongNews
#အောင်ပန်း
#NLD
#နေအိမ်
#စစ်ကောင်စီ
#လေလံတင်
