မဲခေါင်၊ ဖေဖော်ဝါရီ ၂
လူမှုကွန်ရက်စာမျက်နှာများပေါ်တွင် လိုင်စင်မဲ့မော်တော်ယာဉ် (Without) ရောင်းချနေသူများကို တာချီလိတ်ရဲတပ်ဖွဲ့ဝင်များက ဝယ်ယူသူအဖြစ် ရုပ်ဖျက်အသွင်ယူကာ ဖမ်းဆီးမှုများ ပြုလုပ်ခဲ့ကြောင်း မဲခေါင်သတင်းဌာနက စုံစမ်းသိရှိရသည်။
ပြီးခဲ့သည့် ဇန်နဝါရီ ၂၆ ရက်က ဟောင်လိတ်နယ်မြေရဲစခန်းမှ စခန်းမှူး အပါအဝင် ရဲတပ်ဖွဲ့ဝင်များသည် ကားဝယ်ယူမည့်သူအဖြစ် အသွင်ယူကာ Facebook ပေါ်တွင် ကားရောင်းချသူများနှင့် ချိတ်ဆက်ခဲ့သည်။ ထို့နောက် ကားလာရောက်ရောင်းချသူများကို တာချီလိတ်မြို့အဝင် ဆိုင်းဘုတ်အနီးရှိ ဆေးခန်းရပ်ကွက်အတွင်း၌ ဖမ်းဆီးခဲ့ခြင်းဖြစ်သည်။
“အခုတလော ရှမ်းပြည်နယ်မှာ အွန်လိုင်းပေါ် ကားရောင်းနေသူတွေကို Facebook အကောင့် Screenshot နဲ့ကို အထက်က ညွှန်ကြားချက်နဲ့ ဖမ်းနေတာလို့ ကြားတယ်။ အဓိက ဖမ်းမိတာက ကြားကပွဲစားလေးတွေပါ။ အခုဖမ်းမိတဲ့ လူငယ်အချို့ဆိုရင် ကားတစ်စီးရောင်းပေးမှ ဘတ် ၃,၀၀၀ လောက်ပဲ ရကြတာ။ တကယ်တော့ လိုင်စင်မဲ့ကားဆိုရင် ဌာနဆိုင်ရာအားလုံး စီးနေကြတာပဲ။ ဖမ်းတဲ့သူတွေတောင် Without စီးပြီး လာဖမ်းကြတာပါ” ဟု ဖမ်းဆီးခံရသူများနှင့် နီးစပ်သူတစ်ဦးက ပြောသည်။
ဇန်နဝါရီ ၂၆ ရက် တစ်ရက်တည်းတွင်ပင် လိုင်စင်မဲ့ကားရောင်းချသူ အမျိုးသား ၅ ဦးနှင့် ယာဉ် ၃ စီးကို ဖမ်းဆီးရမိခဲ့ကြောင်း သိရသည်။
ဖမ်းဆီးစဉ်အတွင်း အွန်လိုင်း၌ ကြော်ငြာရောင်းချရာတွင် အသုံးပြုသည့် ဖုန်းများကိုပါ သိမ်းဆည်းခဲ့ပြီး ၎င်းတို့ကို ပို့ကုန်သွင်းကုန် ဥပဒေပုဒ်မ (၈) ဖြင့် အမှုဖွင့်အရေးယူထားသည်။
အလားတူ ဇန်နဝါရီ ၂၈ ရက်ကလည်း တောင်ကြီးမြို့တွင် အွန်လိုင်းမှ လိုင်စင်မဲ့ကားရောင်းချသူ ၂ ဦးကို ရဲတပ်ဖွဲ့က အသွင်ယူဖမ်းဆီးခဲ့ပြီး ပို့ကုန်သွင်းကုန် ဥပဒေပုဒ်မ (၈) ဖြင့်ပင် အမှုဖွင့်လှစ်ထားကြောင်း သိရှိရပါသည်။
#MeKongNews
#လိုင်စင်မဲ့ကား
#တာချီလိတ်
#အသွင်ယူဖမ်းဆီး
#အွန်လိုင်း
