မဲခေါင်၊ ဖေဖော်ဝါရီ ၂

ရှမ်းပြည်တောင်ပိုင်း၊ ရပ်စောက်မြို့၊ ပင်ဖြစ်ဈေးမှ ဈေးကောက် လေလံရသူက လက်ရှိတွင် အဆမတန် ကောက်ခံနေသကဲ့သို့ ယခုနှစ်တွင် ဈေးနှုန်းများ ထပ်တိုးမည်ကို စိုးရိမ်နေရကြောင်း ဈေးသူ၊ ဈေးသားများထံမှ သိရသည်။

ယခင်ကပင် ဆိုင်ခန်းများအပေါ် ဈေးကောက် အဆမတန် ကောက်ခံနေမှုကြောင့် ဈေးသူ၊ ဈေးသားများမှာ နှစ်စဉ်လို စိတ်ဆင်းရဲနေရကြောင်း ဈေးသည်များက မဲခေါင်သို့ ပြောသည်။

ယင်းလေလံကို ဒေါ်လှမြင့်ကြည် ဆိုသူက နှစ်စဉ် ရယူထားသည့်အပြင် ယခု ၂၀၂၆ ခုနှစ်အတွက် လည်း အမြင့်ဆုံး လေလံဈေးဖြင့် ထပ်မံ ဆွဲယူထားရာ၊ လေလံဖိုးထွက်စေရန် ဈေးသည်များအပေါ် ဈေးနှုန်း တိုးမြှင့်ကောက်ခံမည်ကို စိုးရိမ်နေကြခြင်း ဖြစ်သည်။

“ဘယ်ဈေးနဲ့မှ မတူဘဲ နှစ်တိုင်းလိုလို အရင်နှစ်တွေက တစ်နှစ်ကို သုံးကြိမ်လောက် တိုးကောက်တာ။ ၂၀၂၅ မှာ ပြဿနာမျိုးစုံ ဖြစ်ခဲ့တယ်။ တစ်နှစ်လုံးစာ တစ်ကြိမ်တည်း သတ်မှတ်ဈေး လုပ်ပေမဲ့လည်း လတိုင်းပေး၊ နေ့တိုင်းပေးရတဲ့ ပမာဏက တခြား ဈေးတွေထက် အရမ်းများနေပါတယ်” ဟု ဈေးကောက်နှုန်းနှင့် ပတ်သက်၍ ဈေးသည်တစ်ဦးက ပြောသည်။

ပင်ဖြစ်ဈေးရှိ ပျံကျ ၄ ပေပတ်လည် တစ်ခုံလျှင် သတ်မှတ်ဈေး ၃၀၀ ကျပ်သာ ရှိသော်လည်း ဒေါ်လှမြင့်ကြည်က ဈေးနေ့တွင် ၁၅၀၀ ကျပ်မှ ၂ ထောင်ကျပ်နှင့် ကြားရက်များတွင် တစ်ထောင်ကျပ်အထိ ကောက်ခံနေသည်ဟု ဆိုသည်။

ဆိုင်ခန်းများကိုမူ ဈေးနေ့တွင် ကျပ်တစ်သောင်းကျော်နှင့် ကြားရက်များတွင် ၆ ထောင်ကျပ်အထိ ကောက်ခံနေရာမှ ထပ်မံ တိုးမြှင့်မည်ဟု သတင်းများ ထွက်ပေါ်နေသည်။

“အခု ၂၀၂၆ ကိုလည်း စည်ပင်မှာ ဘယ်သူမှ မပေးနိုင်တဲ့ဈေးနဲ့ သူပဲ ထပ်ဆွဲထားတယ်လို့ သိရတယ်။ ဈေးသည်တွေ ဘယ်သူ့ အကူအညီ တောင်းတောင်း နောက်ဆုံးကျတော့ လူကြီးတွေက ဈေးကောက်ဘက်ကပဲ ပါကြတာများတယ်။ အခုက သီးနှံဈေးတွေ မကောင်းတော့ ဈေးရောင်းရတာလည်း မကောင်းဘူး။ ဈေးမရောင်းရခင် ကတည်းက ဈေးကောက်ပေးဖို့ အိမ်ကနေ ပိုက်ဆံ ကြိုယူလာနေရတဲ့ ဘဝပါ” ဟု အခြားဈေးသည်တစ်ဦးကလည်း ရင်ဖွင့်သည်။

ယခင်လေလံသမားများ လက်ထက်က ပျံကျဈေးသည်တစ်ရက်လျှင် ၂၀၀ ကျပ်မှ ၃၀၀ ကျပ်ခန့်သာရှိပြီး၊ ဆိုင်ခန်းများမှာလည်း တစ်လလျှင် ၈ ထောင် ကျပ်ခန့်သာ ရှိခဲ့ကြောင်း သိရသည်။

ယခုအခါ ဆိုင်ခန်းဈေးမှာ တစ်လလျှင် ၄ သောင်းကျပ်မှ သိန်းကျော်အထိ အစားစား ရှိနေသည်။

စည်ပင်က သတ်မှတ်ထားသည့် ဈေးကောက်နှုန်းထားနှင့် ဒေါ်လှမြင့်ကြည်၏ ကောက်ခံနေသည့် ဈေးနှုန်းများမှာ အဆမတန် ကွာခြားနေမှုအပေါ် သက်ဆိုင်ရာ စည်ပင်အာဏာပိုင်များ အနေဖြင့် စစ်ဆေးပေးစေလိုကြောင်း ဈေးသည်များက တောင်းဆိုနေကြသည်။

#MeKongNews
#အဆမတန်
#ဈေးကောက်နှုန်း
#ထပ်တိုး
#ပင်ဖြစ်ဈေး
#စိုးရိမ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)