မဲခေါင်၊ ဇန်နဝါရီ ၃၀
ရှမ်းတောင် – ကရင်နီနယ်မှ စစ်ရှောင်စခန်းများရှိ ကလေးအများစု အပါအဝင် စစ်ရှောင်ပြည်သူများ ပြင်းထန် အရေပြားရောဂါ ခံစားနေရပြီး ဆေးပစ္စည်း အထောက်အပံ့များ အရေးပေါ် လိုအပ်နေကြောင်း အကူအညီပေးနေသော ဆေးဘက်ဆိုင်ရာ ပညာရှင်များအဖွဲ့ – The Coordination Team for Emergency Relief(Karenni) – CTER က အသိပေးသည်။
လက်ရှိ၌ ရှားတောမြို့နယ်ရှိ စစ်ရှောင်စခန်း တချို့တွင် ပြင်းထန်ပြီး ကူးစက်မြန်သည့် အရေပြားရောဂါများ ဖြစ်ပွားနေရာ ကုသမှုယူရန် အကူအညီများ လိုအပ်နေကြောင်း သိရသည်။
“လက်ရှိ အခြေအနေအရ အရေပြားရောဂါ ဖြစ်နေတဲ့ ကမ့်ပေါင်း ၄၀ ကျော်လောက်ရှိပါတယ်။ အများစုက အသက် ၁၅ နှစ်အောက် ကလေးတွေပါ။ အခုလက်ရှိမှာတော့ ရှိသလောက် ဆေးဝါးတွေနဲ့ပဲ ကုသပေးနေရပါတယ်။ အနာတွေကို သန့်ရှင်းရေးလုပ်ပေးတာ၊ လိမ်းဆေး၊ ပိုးသတ်ဆေးတွေ ပေးတာတွေ လုပ်နေပါတယ်။ဒါပေမဲ့ ဆေးဝါး မလုံလောက်တော့ လိမ်းဆေး၊ သောက်ဆေး၊ ထိုးဆေးတွေ အရေးပေါ် လိုအပ်နေပါတယ်။ နောက်ပြီး သန့်ရှင်းတဲ့ ရေနဲ့ တစ်ကိုယ်ရေသန့်ရှင်းရေး ပစ္စည်းတွေလည်း လိုအပ်နေပါတယ်”ဟု CTER အဖွဲ့ဝင်တစ်ဦးက မဲခေါင်သို့ ယနေ့တွင် ပြောသည်။
စစ်ရှောင်စခန်းများတွင် လူဦးရေများပြားခြင်း၊ သောက်သုံးရေ မလုံလောက်ခြင်းတို့ကြောင့် တစ်ကိုယ်ရည်သန့် ရှင်းမှု နည်းပါးသည့်အတွက် ယခုလို အရေပြားရောဂါများ ဖြစ်ပွားနေရခြင်း ဖြစ်ကြောင်း သိရသည်။
“လိုအပ်တာကတော့ ဆေးဝါးတွေ အရေးပေါ် လိုနေတယ်၊ စားနပ်ရိက္ခာလည်း လိုတယ်။ တောထဲမှာ စစ်ရှောင်နေရတာဆိုတော့ သောက်ရေ၊ သုံးရေ အခက်အခဲ အများကြီးရှိနေတယ်၊ ဖျားနာပြီး အရေပြားမှာ ယားနာတွေ ဖြစ်လာကြတာ” ဟု အခြား တော်လှန်ရေး ထောက်ပံ့သူတစ်ဦးက ဆိုသည်။
ရှမ်းတောင်နှင့် ကရင်နီနယ်တွင် စစ်ရှောင်အိမ်ထောင်စု ၅ ထောင်ကျော်၊ ခန့်မှန်း လူဦးရေ ၂ သိန်းကျော်နှင့် စစ်ရှောင်စခန်းပေါင်း ၆၀ နီးပါးခန့် ရှိနေကြောင်း တော်လှန်ရေးအဖွဲ့များထံမှ သိရသည်။
“လမ်းပန်းဆက်သွယ်ရေးကခက်၊ ဆေးဝါးတွေကရှားပါးနဲ့ ကူးစက်ပြန့်ပွားမှုနှုန်းကို ထိန်းချုပ်နိုင်တဲ့အထိ ပြည့်စုံလုံလောက်မှု မရှိသေးဘူး”ဟု စစ်ရှောင် ကူညီနေသူတစ်ဦးက ပြောသည်။
#MeKongNews
#စစ်ရှောင်စခန်း
#ပြင်းထန်ကူးစက်မြန်
#အရေပြားရောဂါ
#ဖြစ်ပွား
