မဲခေါင်၊ ဇန်နဝါရီ ၂၃
ဘောလ်တစ်ပင်လယ်မှ ရေအောက်အခြေခံ အဆောက်အအုံများကို ဖျက်ဆီးပစ်ရေး ၎င်းတို့၏ ရည်မှန်းချက်များကို ရုရှားက ဆက်လက် ကိုင်စွဲထားလိမ့်မည်ဟု ယမန်နေ့တွင် ထုတ်ပြန်ခဲ့သော နှစ်စဉ် ထောက်လှမ်းရေး သုံးသပ်ချက် အစီရင်ခံစာ၌ ဖင်လန် ကာကွယ်ရေးဌာနချုပ်က ပြောသည်။
၂၀၂၂ ခုနှစ်တွင် ရုရှားက ယူကရိန်းကို ကျူးကျော်ခဲ့ပြီးနောက်ပိုင်း လျှပ်စစ်ဓာတ်အားလိုင်းများ၊ ဖုန်းကေဘယ် ကြိုးများ၊ ဓာတ်ငွေ့ပိုက်လိုင်း ပြတ်တောက်မှုများ ဖြစ်ပေါ်ခဲ့ပြီးနောက် ဘောလ်တစ် ပင်လယ်ဒေသသည် သတိကြီးကြီးဖြင့် နိုးကြားနေခဲ့ရသည်။
နှစ်သစ်ကူးမတိုင်မီ တစ်ရက်မှာပင် ရုရှားမှ အစ္စရေးသို့ သွားရောက်မည့် ကုန်တင်သင်္ဘောတစ်စီးက လမ်းတွင် ပင်လယ်အောက် ဖုန်းကေဘယ်ကြိုးကို ဖျက်ဆီးပစ်ရန် ကြိုးစားကြောင်း မသင်္ကာ၍ ဖင်လန် အာဏာပိုင်များက ဖမ်းဆီးခဲ့ကြောင်း သိရသည်။
ပြီးခဲ့သည့်နှစ်မှာပင် ဖရီးဂိတ်သင်္ဘောများ၊ လေယာဉ်များ၊ ရေတပ်သုံးဒရုန်းများကို တိုးမြှင့်ချထားကာ နေတိုးအဖွဲ့က ဘောလ်တစ် ပင်လယ်ဒေသတွင် တပ်ဖွဲ့များ ပိုမိုြဖန် ့ကြက်ပြီး စောင့်ကြည့်မှုများ တိုးမြှင့်ခဲ့သည်။
၎င်းတို့ ဆန္ဒရှိလျှင် ရုရှား၏ ရေအောက် အခြေခံအဆောက်အအုံများကို ဖျက်ဆီးပစ်နိုင်စွမ်း ရှိကြောင်း၊ သို့သော် မကြာသေးမီက ဖြစ်ရပ်များ နောက်ကွယ်တွင် ရုရှား သို့မဟုတ် အခြားတစ်နိုင်ငံ ရှိနေသည်ကို သက်သေပြနိုင်သည့် အထောက်အထား မရှိကြောင်း ဖင်လန် ထောက်လှမ်းရေး အကြီးအကဲ ဗိုလ်ချုပ် ပက်ခါတူရင်နင်က တွေ့ဆုံ မေးမြန်းမှုတစ်ခု၌ ဆိုသည်။
သို့သော် ယခင်နှင့် နှိုင်းယှဉ်ပါက ထိုသို့သောဖြစ်ရပ် အများအပြား ဖြစ်ပေါ်လာခဲ့ခြင်းမှာ တစ်မူထူးကြောင်းနှင့် အထူးသဖြင့် ၂၀၂၃ ခုနှစ်တွင် သိသာစွာ များပြားလာခဲ့သည်ဟု ၎င်းက ဆက်ပြောသည်။
ယင်းဖြစ်ရပ်များတွင် ပါဝင်ပတ်သက်မှု မရှိကြောင်း ရုရှားက အကြိမ်ကြိမ် ငြင်းဆိုခဲ့ကာ ပြီးခဲ့သည့်နှစ်တွင် ဘောလ်တစ်ပင်လယ်မှာပင် ရေအောက် အဖျက်လုပ်ရပ်များကို တားဆီးကာကွယ်ရန် လေ့ကျင့်မှုများကို လုပ်ဆောင်ခဲ့ကြောင်း ဆိုသည်။
အေးကျော်
Ref: Reuters
#MeKongNews
#ဘောလ်တစ်ပင်လယ်
#အခြေခံအဆောက်အအုံ
#ဖျက်ဆီး
#ရုရှား
#ဖင်လန်
