မဲခေါင်၊ ဇန်နဝါရီ ၂၀

ရှမ်းပြည်တောင်ပိုင်း၊ ပင်လောင်းမြို့နယ်တွင် ပြည်သူများ၏ ကိုယ်ထူကိုယ်ထလမ်းကို စစ်ကောင်စီ လက်အောက်ခံ PNO က ၎င်းတို့ ခင်းပေးထားသဖွယ် နှမ်းဖြူးပြီး လမ်းဖွင့်ပွဲ လုပ်ကာ မဲဆွယ်ခဲ့သည်ဟု ဒေသခံ သတင်းရင်းမြစ်များထံမှ သိရသည်။

ပင်လောင်းမြို့နယ်၊ ပင်ထုံနှင့် ယေးခဝ်း ကျေးရွာချင်းဆက်လမ်းသည် သဘာဝဘေးဒဏ်ကြောင့် ပျက်စီးခဲ့ရာ ဒေသခံများက ကိုယ်ထူကိုယ်ထ ကျပ်သိန်းရာချီ အကုန်ကျခံကာ ပြန်လည် ပြုပြင်ထားခြင်း ဖြစ်သည်။

ယင်းလမ်းကို ဇန်နဝါရီ ၁၇ ရက်တွင် ဖွင့်ပွဲပြုလုပ်ခဲ့ရာ PNO ဒုတိယ ဥက္ကဌ ခွန်မောင်သောင်း ၊ ဦးအောင်ခမ်းထီ၏ သမီး နန်းရီရီဝင်းတို့ခေါင်းဆောင်သည့် PNO အဖွဲ့က ဖဲကြိုးဖြတ် ဖွင့်လှစ်ကာ မဲဆွယ်စည်းရုံးရေး ဟောပြောခဲ့ကြောင်း ဒေသခံ သတင်းရင်းမြစ်က ပြောသည်။

“လမ်းပြင်တာလည်း သူတို့ငွေမပါဘူး ကုန်ကျစရိတ်လည်း သူတို့မပါဘူး။ ဖွင့်ပွဲကျမှ သူတို့ လုပ်ပေးသလိုလိုနဲ့ သူတို့ပဲ ဖဲကြိုးဖြတ်တဲ့အပြင် တစ်ယောက်ပြီး တစ်ယောက် PNO ကို မဲထည့်ပါဆိုပြီး မဲဆွယ်သွားသေးတယ်။ လမ်းခင်းတာ သိန်း ၅၀၀ လောက်ကုန်တာ သူတို့ တစ်ကျပ်မှ မလှူဘူး”ဟု ဒေသခံတစ်ဦးက ပြောသည်။

လမ်းဖွင့်ပွဲသို့ နှမ်းလာဖြူးသည့် PNO ခေါင်းဆောင်များကို ကျွေးမွေးဧည့်ခံရာတွင်လည်း ကျေးရွာ၏ ရန်ပုံငွေမှ စိုက်ထုတ် ကျွေးမွေးခဲ့ရရာ ကျပ် ၁၀ သိန်းကျော် ကုန်ကျခဲ့သည်ဟုလည်း ၎င်းက ပြောသည်။

ယင်းကျေးရွာချင်းဆက်လမ်းကို ပြန်လည် ပြုပြင်ရာတွင် ပင်ထုံရွာမှ ကျပ်သိန်း ၂၀၀၊ ယေးခဝ်းရွာမှ ကျပ် ၅ သိန်း၊ စန္တာခမ်း လူမှုကူညီရေးအသင်းမှ ကျပ်သိန်း ၁၀၀ မတည် ထည့်ဝင်ခဲ့ကြသည်။

လမ်းဖွင့်ပွဲတွင် ဒုဥက္ကဌ ခွန်မောင်သောင်း၊ PNO – ပြည်သူ့စစ်၏ စန္ဒာတိုင်း (ခေါ် )ပင်လောင်းတိုင်းမှူး ခွန်လှဆန်း၊ နန်းရီရီဝင်း၊ ခွန်ဖိုးစိန်၊ ခွန်ဝင်းနောင်၊ခွန်ထိုင်းတို့က ၎င်းတို့ပါတီကို မဲပေးကြရန် ဟောပြောခဲ့ကြသည်။

#MeKongNews
#ဒေသခံ
#ကိုယ်ထူကိုယ်ထလမ်း
#PNO
#မဲဆွယ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)