မဲခေါင်၊ ဇန်နဝါရီ ၆

ရှမ်းပြည်တောင်ပိုင်း၊ ပင်လောင်းမြို့နယ်တွင် စိုက်ပျိုးထားသည့် ငရုတ်သီးများ လက်ရှိချိန်ထိ ဝယ်လက် မရှိသေး၍ ငရုတ်စိုက် တောင်သူများ အခက်ကြုံနေရကြောင်း ဒေသခံများထံမှ သိရသည်။

မနှစ်က ကာလတူတွင် ငရုတ်သီး ပုံမှန်ရောင်းရပြီ ဖြစ်ပြီး ယခုနှစ်တွင် နိုင်ငံရေးအခြေအနေနှင့် လမ်းပန်း ဆက်သွယ်ရေး ခက်ခဲမှုကြောင့် ဝယ်လက်မရှိသေးဘဲ စားဝတ်နေရေး ခက်ခဲနေကြောင်း ဒေသခံ တောင်သူများက ပြောသည်။

“ဝယ်သူမရှိဘူး။ အခုက ခူးပြီးတော့ အိမ်မှာပဲ လှောင်ထားကြတယ်။ အရင်နှစ်ဆို အခုချိန် ပွဲစားတွေက ရွာအထိလာပြီး လုဝယ်နေကြပြီ။ ငရုတ်သီး ဝယ်တဲ့သူ မရှိတော့ စပါးမစိုက်တဲ့ အိမ်ဆို စားဝတ်နေရေးအတွက် အခက်ခဲဖြစ် ကြရတယ်”ဟု ဒေသခံ တောင်သူတစ်ဦးက မဲခေါင်သို့ ပြောသည်။

ပြီးခဲ့သည့်နှစ်တွင် ငရုတ်သီး တစ်ပိဿာ ၅ သောင်းကျော် ရရှိခဲ့သော်လည်း ယခုနှစ်တွင် ဝယ်သူမရှိသည့် အပြင် ငရုတ်သီးဈေးပါ မရှိဘဲ တစ်ပိဿာ ၂ သောင်းကျော်သာ ရရှိကြောင်း ၎င်းက ဆိုသည်။

“ရွာအထိ လာဝယ်တဲ့ ပွဲစားမရှိဘူး။ ဒါပေမယ့် ရွာမှာ ဈေးနှိမ်ပြီး ဝယ်နေတဲ့ ရွာသားတွေရှိတယ်။ ဒါ ငရုတ် ဈေးနည်း အောင်လုပ်နေတာ။ တစ်ပိဿာ ၂ သောင်းကျပ်က ဈေးနည်းသေးတယ်။ အခု ကုန်ဈေးနှုန်းအရ အနည်းဆုံး တစ်ပိဿာ ၅ သောင်းဖြစ်ရမှာ၊ ဒါမှလည်း တောင်သူလယ်မားတွေ အဆင်ပြေမှာ ရှိတဲ့ကုန်ပစ္စည်းက ဈေးကြီးပြီး ငရုတ်ဈေးက နည်းနေရင် အဆင်မပြေဘူးလေ။ အရင်က ငရုတ်တစ်ပိဿာကို ဆန်တစ်အိတ်ရတယ်၊ အခု မရတော့ဘူးလေ။ ပွဲစားတွေ လာမဝယ်သေးရင် မရောင်းသေးနဲ့”ဟု အခြား တောင်သူတစ်ဦးက မဲခေါင်သို့ ပြောသည်။

ပင်လောင်းမြို့နယ်၊ စင်းတောင်း၊ နမ်းပန်း၊ ဥဆောင်၊ ရင်းမှီးနှင့် ပေါင်းလောင်းဒေသတို့တွင် ငရုတ်သီးကို အများဆုံး စိုက်ပျိုးကြပြီး တစ်နှစ်လျှင် ငရုတ်ခြံ ဧကပေါင်း ၅ သောင်းကျော်ရှိကြောင်း ဒေသခံများထံမှ သိရသည်။

ပင်လောင်းဒေသထွက် ငရုတ်သီးသည် ရန်ကုန်၊ မန္တလေး၊ မူဆယ်၊ တာချီလိတ်၊ လားရှိုးနှင့် မြဝတီဖက်တို့တွင် အဓိက တင်ပို့ ရောင်းချကြောင်း ဒေသခံများထံမှ သိရသည်။

ပြီးခဲ့သည့် ဒီဇင်ဘာတွင် နှင်းရည် ရိုက်ခြင်းကြောင့် ပင်လောင်း‌နှင့် ပေါင်းလောင်း တောင်ပေါ်ရှိ ဒေသခံများ စိုက်ပျိုးထားသော ငရုတ်ခြံ ဧက ၂ ထောင်ကျော် ပျက်စီးသွားသေးကြောင်း တောင်သူများထံမှ သိရသည်။

#MeKongNews
#ဝယ်လက်
#ငရုတ်စိုက်
#ပင်လောင်း
#အခက်ကြုံ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)