မဲခေါင်၊ ဇန်နဝါရီ ၅

တာချီလိတ်မြို့၊ ပုံလို့လမ်း၊ အပိုင်း (ဆ) အမှိုက်ပုံကွက်သစ်အတွင်း လမ်းပိတ်၍ အရက်ဆိုင်နှင့် ဂိမ်းခုံများဖွင့်ကာ မူးယစ်ဆေးဝါး ရောင်းဝယ်နေသူများကြောင့် မြေကွက်ပိုင်ရှင်များနှင့် အနီးအနား နေထိုင်သူများ လုံခြုံမှုမရှိဘဲ စိုးရိမ်နေရကြောင်း ဒေသခံများထံမှ သိရသည်။

ဝိန်းကျောက်ရပ်ကွက်နယ်မြေအတွင်းရှိ ယင်းအပိုင်း (ဆ) တွင်မြေကွက်ပိုင်ရှင်အများစုမှာမြေကွက်ရိုက်ထားသော်လည်းနေအိမ်ဆောက်လုပ်နေထိုင်ခြင်းမရှိသေးသည့်အတွက်ပျံကျကျူးကျော်များကနေအိမ်လမ်းကြားများကိုပိတ်၍တဲထိုးနေထိုင်ခြင်း၊အရက်ဘီယာဆိုင်နှင့်ဂိမ်းခုံများဖွင့်လှစ်ထားခြင်းများပြုလုပ်နေကြခြင်းဖြစ်သည်။

မြေပိုင်ရှင်များကသွားရောက်ဖယ်ရှားခိုင်းသော်လည်းဖယ်ရှားပေးခြင်းမရှိဘဲလူမိုက်များ၊ဆေးသမားများနှင့်ပြန်လည်ရန်မူခြင်းများရှိနေသည်ဟုဒေသခံများကပြောသည်။

“အဲ့ဒီအပိုင်းက မြေကွက်တွေပဲ ရိုက်ထားကြတာ၊ လူမနေကြတော့ ကျူးကျော်တွေက တဲတွေထိုးပြီး ဝင်နေကြတာပါ။ ဆေးရောင်းတဲ့သူတွေ၊ လူရမ်းကားတွေနဲ့ဆိုတော့ အတော်လေး မလုံခြုံဘူး။ အကွက်ပိုင်ရှင်တွေလည်း မပြောရဲကြဘူး၊ ရပ်ကွက်လူကြီးတွေကလည်း မတားကြဘူး။ အဲ့ဒီဆေးသမားနဲ့ ဆေးရောင်းတဲ့သူတွေက ရဲသတင်းပေး တွေလို့လည်း ကြားတယ်။ ရေချောင်းဘေးဆိုရင် သူတို့မြေအပိုင်လို အပင်စိုက်၊ တဲထိုးပြီး နေနေကြတာ“ ဟု မြေကွက်ပိုင်ရှင်တစ်ဦးက ပြောသည်။

ယင်းနေရာတွင် ကျူးကျော်နေထိုင်သူ အများစုမှာ ပြည်တွင်းအရပ်ရပ်မှ ရွှေ့ပြောင်းရောက်ရှိလာသူများဖြစ်ပြီး အမှိုက်ကောက်သူ၊ ကျဘန်းလုပ်ကိုင်သူများနှင့် မူးယစ်ဆေးဝါး လက်လီရောင်းချသူများ ဖြစ်ကြကြောင်း သိရသည်။

တာချီလိတ်မြို့တွင်၂၀၂၁ခုနှစ်အာဏာသိမ်းပြီးနောက်ပိုင်းနိုင်ငံအနှံ့အပြားတွင်အလုပ်အကိုင်ရှားပါးမှုနှင့်စစ်ဘေးသင့်မှုများကြောင့်ရွှေ့ပြောင်းအခြေချသူများပြားလာသည်။

ယင်းနှင့်အတူ ခိုး၊ ဆိုး၊ လု၊ နှိုက် လုပ်ဆောင်သူများနှင့် မူးယစ်ဆေးဝါးသုံးစွဲသူများ ပိုမိုများပြားလာကာ နေအိမ်ဖောက်ထွင်းမှုနှင့် ဆိုင်ကယ်ခိုးယူမှုများလည်း နေ့စဉ်နီးပါး ဖြစ်ပွားနေကြောင်း ဒေသခံများထံမှ သိရသည်။

#MeKongNews

#တာချီလိတ်

#အမှိုက်ပုံကွက်သစ်

#ကျူးကျော်

#မူးယစ်ဆေးဝါး

#ဂိမ်းခုံ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)