မဲခေါင်၊ ဒီဇင်ဘာ ၂၅
ကရင်နီပြည်၊ ဒီးမော့ဆိုတွင် ကရင်နီပြည် တော်လှန်ရေးတပ်ဖွဲ့များ စုပေါင်း၍ စစ်ကောင်စီ ရွေးကောက်ပွဲ ဆန့်ကျင်ရေး လှုပ်ရှားမှုများကို ဒီဇင်ဘာ ၂၃ ရက်တွင် ပြုလုပ်ခဲ့ကြောင်း ကရင်နီ ပြည်သူ့လွတ်မြောက်ရေး တပ်မတော် KPLA – B 626 က ယနေ့ ထုတ်ပြန်သည်။
ယင်းလှုပ်ရှားမှုတွင် သက်ဆိုင်ရာ တော်လှန်ရေး တပ်ရင်းတာဝန်ခံများက ရွေးကောက်ပွဲကို ဆန့်ကျင်ကြောင်း ကန့်ကွက်ခြင်း၊ ကြွေးကြော်သံများ ဟစ်ကြွေးခြင်း၊ လှုပ်ရှားမှုပုံရိပ်နှင့် သရုပ်ပြ မှတ်တမ်းဓာတ်ပုံ ရိုက်ကူးခြင်းများ ပြုလုပ်ခဲ့ကြောင်း ဖော်ပြထားသည်။
ယင်းလှုပ်ရှားမှုကို ကရင်နီပြည်လူမျိုးပေါင်းစုံ ပြည်သူ့လွတ်မြောက်ရေးတပ်ဦး – ကလလတ၊ ကရင်နီအမျိုးသားများ ကာကွယ်ရေးတပ် – KNDF နှင့် ကယန်းအမျိုးသား တပ်မတော် – KNA၊ ရှမ်း – ကယားစစ်တိုင်း တပ်ရင်းအမှတ် (၁၁၀၉)၊ ပြည်သူ့ကာကွယ်ရေးတပ် ဒီးမော့ဆိုမြို့နယ် – DMO Local PDF တို့က ပူးပေါင်း ပြုလုပ်ခဲ့ကြောင်း သိရသည်။
ထို့ပြင် ပြည်သူလူထုတစ်ရပ်လုံး အနေဖြင့်လည်း စစ်ကောင်စီ၏ အတုအယောင် ရွေးကောက်ပွဲအား ရရာနည်းမျိုးစုံဖြင့် ဆန့်ကျင်ကြရန် တိုက်တွန်း နှိုးဆော်ထားသည်။
အတုအယောင် ရွေးကောက်ပွဲနှင့် ပတ်သက်သမျှ အကြောင်းအရာ၊ ပတ်သက်သူ မှန်သမျှကိုလည်း လူထုသစ္စာဖောက် အဖြစ်သတ်မှတ်ပြီး မိမိတို့ ကရင်နီပြည် ပြည်သူ့လွတ်မြောက်ရေး တပ်မတော်၊ ဗဟိုစစ်ဦးစီးတပ်၊ အမှတ် – ၆၂၆ တပ်ရင်းအနေဖြင့် ပြင်းပြင်းထန်ထန် ဆန့်ကျင် ကန့်ကွက်သွားမည် ဖြစ်ကြောင်းလည်း အသိပေး ထုတ်ပြန်ထားသည်။
ဒီဇင်ဘာ ၂၈ ရက်တွင် ပြုလုပ်မည့် စစ်ကောင်စီ၏ ရွေးကောက်ပွဲ အပိုင်း – ၁ ပြုလုပ်ရန် ၄ ရက်ခန့်သာ လိုချိန်တွင် ရွေးကောက်ပွဲ ဆန့်ကျင်မှုကို ကရင်နီ တပ်ပေါင်းစုများက အင်တိုက်အားတိုက် ပြုလုပ်ခဲ့ခြင်း ဖြစ်သည်။
#MeKongNews
#ရွေးကောက်ပွဲ
#စစ်ကောင်စီ
#ကရင်နီ
#ဆန့်ကျင်ရေး
#KPLA
ဓာတ်ပုံ – ဖူးမော်
