မဲခေါင်၊ ဒီဇင်ဘာ ၁၆
ရှမ်းပြည်အခြေစိုက် တော်လှန်ရေး တပ်ဖွဲ့လည်းများ ပါဝင်သည့် နွေဦးတော်လှန်ရေး မဟာမိတ်တပ်ပေါင်းစု – SRA ကို စတင် ဖွဲ့စည်းလိုက်ကြောင်း ယင်းတပ်ပေါင်းစုက ဒီဇင်ဘာ ၁၅ ရက်ညတွင် သတင်းထုတ်ပြန်သည်။
ယင်းတပ်ပေါင်းစုတွင် 96 Soldiers PDF၊ ဗမာ့တပ်မတော် – BA၊ ဗမာလွတ်မြောက်ရေး ဒီမိုကရက်တစ်တပ်ဦး – BLDF၊ ဗမာပြည်သူ့ လွတ်မြောက်ရေးတပ်တော် – BPLA၊ ချင်း ညီ နောင် – CB) ဓနု ပြည်သူ့လွတ်မြောက်ရေးတပ် ဦး – DPLF၊ Force For Federal Democracy(FFD)၊ Generation Z Army (GZA)၊ ကရင်နီအမျိုးသားများ ကာကွယ်ရေးတပ် – KNDF၊ ကလေးဒေသ တော်လှန်ရေးတပ် – KRF၊ မကွေး ပြည်သူ့ကာကွယ်ရေးတပ်မတော် -MAGGWAY PDF၊ မွန်ပြည် တော်လှန်ရေးတပ် – MSRF၊ အမျိုးသား လွတ်မြောက်ရေးတပ်တော်-NLA၊ ပြည်သူ့ လွတ်လပ်ရေးတပ်တော်(PLA)၊ ပအိုဝ်းအမျိုးသား ကာကွယ်ရေးတပ်ဖွဲ့(ခမ်းကောင်) – PNDF-KK / ပအိုဝ်း ပြည်သူ့ကာကွယ်ရေးတပ် (ခမ်းဒေါမ်) – PPDF-KD၊ စစ်ကိုင်း ပြည်သူ့ကာကွယ်ရေး တပ်မတော် – SAGAING PDF၊ ကျောင်းသား လက်ရုံးတပ်တော် – SAF၊ ယောတပ်တော် – YA နှင့် ယောကာကွယ်ရေးတပ် – YDF တို့ပါဝင်သည်။
ယင်းအထဲတွင် DPLF နှင့် PNDF-KK တို့သည် ရှမ်းပြည်အခြေစိုက် တော်လှန်ရေးတပ်ဖွဲ့များ ဖြစ်သည်။
” PNFC ရဲ့နိုင်ငံရေးဦးဆောင်မှု အောက်မှာ အတူတူလက်တွဲ တိုက်ပွဲဝင်နေတဲ့ ခမ်းကောင်နဲ့ ခမ်းဒေါမ်က PNDF-KK/ PPDF – KD တပ်ဖွဲ့တစ်ဖွဲ့ အနေနဲ့ ပါဝင်တာဖြစ်တယ်”ဟု PPDF-KD တာဝန်ရှိသူတစ်ဦးက မဲခေါင်သို့ ပြောသည်။
စစ်အုပ်စု၏ အကြမ်းဖက် လုပ်ရပ်များကို ဗျူဟာမြောက် ခုခံတွန်းလှန်နိုင်ရန် အဖွဲ့ ၁၉ ဖွဲ့ဖြင့် SRA ကို စတင် ဖွဲ့ စည်းလိုက်ပြီး ဖက်ဒရယ် ဒီမိုကရေစီအရေး၊ လူ့အခွင့်အရေး၊ ဂျန်ဒါတန်းတူရေး၊ တရားမျှတရေးနှင့် ငြိမ်းချမ်းရေး လိုလားချက်များ ရရှိသည်အထိ တိုက်ပွဲဝင်သွားမည်ဟု ထုတ်ပြန်ချက်တွင် ဖော်ပြထားသည်။
ထို့ပြင် နွေဦးတော်လှန်ရေး မဟာမိတ်တပ်ပေါင်းစု အဖွဲ့ဝင်များသည် စစ်အာဏာရှင်စနစ် ချုပ်ငြိမ်းရေးနှင့် ဖက်ဒရယ် ဒီမိုကရေစီစနစ် ပေါ်ပေါက်ရေး၊ ပြည်သူလူထု၏ အထွေထွေ လူမှုစီးပွား အကြပ်အတည်းမှ လွတ်မြောက်ရေး ၊ ခိုင်မာကျယ်ပြန့်သော မဟာမိတ်တပ်ပေါင်းစု အသွင်ဖြင့် ရပ်တည်ရန်နှင့် ထိရောက် အားကောင်းသော ကွပ်ကဲမှု ယန္တရားတစ်ရပ် ပေါ်ပေါက်ရေး၊ နိုင်ငံရေး စစ်ရေးဆိုင်ရာ ဦးတည်ချက်၊ ရည်ရွယ်ချက်နှင့် လုပ်ငန်းစဉ်များကို စုစည်း ညီညွတ်မှုအားဖြင့် အကောင်အထည် ဖော်ရေး ဆိုသည့် အချက် ၄ ချက်ကိုလည်း ကတိကဝတ်ပြု လက်မှတ် ရေးထိုးကြသည်။
“သမားရိုးကျစစ်မှာ အင်အားနဲ့ တုံ့ပြန်ခြင်းဟာ အဓိကကျတယ်။ တော်လှန်ရေး တပ်တွေဟာ မြေပြင် တိုက်ခိုက်ရေးမှာ စိတ်ဓာတ်အရ သာလွန်ပြီးသား ဖြစ်တယ်၊ ထောက်ပို့ပိုင်း စိတ်ချရရင် စစ်ပွဲအောင်ဖို့ ရာနှုန်းပြည့်ပဲ။ နပိုလီယံပြောသလို စစ်တပ်ဆိုတာ ဗိုက်နဲ့တိုက်တာ ဆိုတော့ စစ်ရေး ဝမ်းစာပြည့်ဖို့ အရေးကြီးပါတယ်”ဟု စစ်ရေး လေ့လာသူတစ်ဦးက သုံးသပ်သည်။
နွေဦးတော်လှန်ရေး တပ်ပေါင်းစု ပေါ်ပေါက်လာစေရန် အဖွဲ့၇ ဖွဲ့က မေလတွင် စတင်ညှိနှိုင်း ဆောင်ရွက်ခဲ့ပြီး နိုဝင်ဘာ ပထမပတ်၌ အဖွဲ့ ၁၄ ဖွဲ့ဖြင့် ကနဦးတွေ့ဆုံ ဆွေးနွေးခဲ့ပြီးနောက် ဘုံသဘောတူညီချက်နှင့် ထပ်မံ ဖိတ်ကြားသင့်သော အဖွဲ့များကို ဖိတ်ကြားခဲ့ကာ နိုဝင်ဘာ ၂၁ ရက်တွင် အဖွဲ့ ၁၉ ဖွဲ့နှင့် နွေဦးတော်လှန်ရေး မဟာမိတ်တပ်ပေါင်းစုကို ဖွဲ့စည်းနိုင်ခဲ့ခြင်း ဖြစ်ကြောင်း ထုတ်ပြန်ချက်တွင် ဖော်ပြထားသည်။
တပ်ပေါင်းစုအတွင်း မပါဝင်သေးသည့် အခြား တော်လှန်ရေး တပ်ဖွဲ့များကိုလည်း မူဝါဒ သတ်မှတ်ချက်နှင့် အညီ ထပ်မံ ဖိတ်ခေါ်သွားမည်ဟု SRA ၏ ထုတ်ပြန်ချက်တွင် ဖော်ပြထားသည်။
#MeKongNews
#နွေဦးတော်လှန်ရေး
#မဟာမိတ်တပ်ပေါင်းစု
#SRA
#စတင်ဖွဲ့စည်း
