မဲခေါင်၊ ဒီဇင်ဘာ ၁၅
ရှမ်းပြည်မြောက်ပိုင်းမှ သယ်ဆောင်လာသည့် ကုန်ပစ္စည်းများကို ပို့ကုန် သွင်းကုန်ဥပဒေနှင့် သက်ဆိုင်ရာ ဥပဒေများအပြင် ငွေကြေးခဝါချမှု တိုက်ဖျက်ရေးဥပဒေဖြင့်ပါ အရေးယူရန် စစ်ကောင်စီက ညွှန်ကြားထားကြောင်း သတင်းရင်းမြစ်များထံမှ သိရသည်။
ရှမ်းမြောက်ရှိ နယ်စပ်ဂိတ် အများစုကို တိုင်းရင်းသား တော်လှန်ရေးတပ်ဖွဲ့များက ထိန်းချုပ်ထားသဖြင့် တော်လှန်ရေး တပ်ဖွဲများအား ဘဏ္ဍာငွေ ဖြတ်တောက်နိုင်ရန် ယင်းကဲ့သို့ လုပ်ဆောင်လာခြင်း ဖြစ်သည်ဟု သတင်းရင်းမြစ်များ ကပြောသည်။
“ရှမ်းမြောက် ဆိုတာကတော့ ညီနောင် ၃ ဖွဲ့ထိန်းချုပ်ထားတဲ့ မူဆယ် ၁၀၅ မိုင်ကနေ ထွက်လာတဲ့ ကုန်ပစ္စည်း တွေ ကို အဓိကတားချင်တဲ့ ရယ်ရွယ်ချက် ဖြစ်တယ်လို့ ပြောလို့ရတယ်။ ကုန်သည်တွေကတော့ လုပ်ရကိုင်ရ ပိုခက်ခဲသွားမယ်”ဟု သတင်းရင်းမြစ်တစ်ဦးက ပြောသည်။
ယင်းကဲ့သို့ အရေးယူရန် ဒီဇင်ဘာ ၁၁ ရက်တွင် စစ်ကောင်စီက ညွှန်ကြားခဲ့ခြင်း ဖြစ်ပြီး ရှမ်းမြောက်အပြင် မွန်နှင့် ကရင်ပြည်တို့လည်း ပါဝင်ကြောင်း သိရသည်။
ယင်းဥပဒေ အရ ထောင်ဒဏ် ၁၀ နှစ်နှင့် ဒဏ်ငွေသန်း ၅၀၀ အထိ ချမှတ်နိုင်သည်။
“အခုလည်း ကုန်ကားမှန်သမျှ ပစ္စည်းတွေ အကုန်ချပြီး စစ်တာတွေ ဖမ်းတာတွေ လုပ်နေတာပဲ၊ ငွေနဲ့ ပြန်မရွေးနိုင်တာဆို အပြီးသိမ်းတာ ရောင်းစားတာတွေလည်း သူတို့ လုပ်နေတာပဲ။ လူမိုက်တွေ တိုင်းပြည်ကို အနုကြမ်း စီးထားတော့လည်း ဓားပြထုတ်တဲ့ စည်းကမ်းကို ရွာသားတွေ လိုက်နာနေရသလိုမျိုး ဖြစ်နေတာပေါ့ဗျာ။ စည်းကမ်းကို လိုက်နာလေ သူတို့ ဓားပြတိုက်လို့ ကောင်းလေပေါ့ဗျာ” ဟု ကုန်သည်တစ်ဦးက ပြောသည်။
ထို့ပြင် ယခုလုပ်ရပ်သည် ပြည်သူများကို နှိပ်စက်နေသည့် လုပ်ရပ်သာ ဖြစ်ပြီး တိုင်းပြည်အပေါ် စေတနာ မရှိကြောင်းကို ပြသနေသည်ဟု ရှမ်းတောင်မှ ကုန်သည်တစ်ဦးက ဆိုသည်။
“လားရှိုးကနေ ရှမ်းတောင်ကို ကုန်သယ်တာတောင် သွင်းကုန်ထုတ်ကုန် ဂျူတီတောင်းတယ်။ တမင်သက်သက် တစ်ရစ်ပြီးတစ်ရစ် ဝက်အူရစ်လို ပြည်သူကို အနိုင်ကျင့်တာဗျာ။ ကုန်စည် စီးဆင်းမှု ပိုနှေးသွားပြီး သုံးစွဲသူလူထုပဲ ပိုဒုက္ခရောက်မယ့် ဟာတွေ”ဟု ၎င်းက ပြောသည်။
ထို့ပြင် လက်ရှိတွင်လည်း ရှမ်းမြောက်နှင့် ရှမ်းအရှေ့မှ လာသည့် ကုန်ကားများကို စစ်ကောင်စီ လက်အောက်ခံ ဌာနဆိုင်ရာများနှင့် တပ်ဖွဲ့များက ဖမ်းဆီးခြင်း၊ ငွေဖြင့် ပြန်ရွေးခိုင်းခြင်းနှင့် စာရင်းဖျောက် ရောင်းစားခြင်းများလည်း ပြုလုပ်နေသည်။
#MeKongNews
#ရှမ်းမြောက်
#မွန်
#ကရင်
#ငွေကြေးဥပဒေ
ပုံ – ဟိုပုံးတွင် ဖမ်းဆီးထားသည့် ကုန်ကားများနှင့်စစ်ကော်မရှင်ညွှန်ကြားစာ
