မဲခေါင်၊ ဒီဇင်ဘာ ၄
ရှမ်းပြည်မြောက်ပိုင်းမှ တောင်ပိုင်းသို့ သံတိုသံစ သယ်ယူသည့် ကားများကို စစ်ကောင်စီက သွားခွင့်မပေးဘဲ စစ်ဆေးရေးဂိတ်များတွင် အကြောင်းမဲ့ တားဆီးထားကြောင်း သတင်းရင်းမြစ်များထံမှ သိရသည်။
သီပေါ – မိုင်းရယ် – ကျေးသီးလမ်း မှတစ်ဆင့် ရှမ်းတောင်မှ ပြည်မသို့ ဆက်လက် သယ်ယူမည့် သံတိုသံစ ကုန်တင်ကားကြီးများကို ယင်းလမ်းပေါ်ရှိ ကောင်းလန်း၊ မန်ပုံ၊ လွယ်ငင်းနှင့် မိုင်းရယ်မြို့ အဝင်အထွက်တို့တွင် ၎င်းတို့က အကြောင်းမဲ့ တားဆီးထားခြင်းဖြစ်ကြောင်း သိရသည်။
“ဘာလို့ သွားလို့မရတာလဲ သေသေချာချာ မပြောဘူး။ ဒီအတိုင်းပဲ ပိတ်ထားတာ သံတိုသံစတွေကို သယ် တဲ့ ကီလိုကုန်ကားတွေကို မပေးသွားဘူး။ ဘယ်ရက် ပြန်ဖွင့်ပေးမလဲ မသိသေးဘူး။ အခု ကောင်းလန်းဂိတ်မှာ တံတားမှာ ခံနေတဲ့ သံကားတွေ အများကြီးပဲ၊ အစီး ၅၀ လောက်ရှိတယ်။ ရှေ့သွားမရ နောက်ဆုတ်မရနဲ့ ဖြစ်နေတယ်”ဟု ကားသမားတစ်ဦးက ပြောသည်။
ယင်းကီလိုကားများသည် ရှမ်းမြောက်ရှိ သံတိုသံစ အဟောင်းများကို ရှမ်းတောင်မှတစ်ဆင့် ဈေးကွက်ရှိသည့် အောက်ပြည်အထိ သယ်ယူ ပို့ဆောင်ပေးလျက်ရှိသည်။
“အဲလို ပိတ်တော့ ကုန်စည်စီးဆင်းတာ နှေးကုန်တာပေါ့ဗျာ။ ကားသမားတွေကို မှီခိုနေရတဲ့ မိသားစုတွေ အတွက်လည်း စားဝတ်နေရေး ထိခိုက်ရ စိုးရိမ်ရတာပေါ့။ တရားမဝင်ကုန်လည်း မဟုတ်ဘူးလေ။ ဒါတွေက နှစ်ပေါင်းများစွာ လုပ်လာတဲ့ သံတိုသံစအဟောင်း ရောင်းဝယ်ရေး အလုပ်ပဲလေ”ဟု ကားသမားတစ်ဦးက ပြောသည်။
ယင်းကဲ့သို့ စစ်ကောင်စီဂိတ်က တားဆီးထားသည်မှာ နိုဝင်ဘာကတည်းက ဖြစ်ပြီး ကြာမြင့်စွာ ပိတ်ထားခြင်းကြောင့် အချို့ ကားသမားများမှာ ကားများကို လူစောင့်ဖြင့် ထားခဲ့ပြီး နေရပ်ပြန်သွားခြင်းလည်း ရှိကြောင်း သတင်းရင်းမြစ်က ပြောသည်။
“တချို့ သူတွေကတော့ ကားကို အစောင့်နဲ့ထားပြီး လူတွေပဲ အရင် ပြန်သွားလိုက်တာလည်းရှိတယ်။ အမျိုးသမီးတွေ ကလေးတွေပါလာတဲ့ ကားတွေဆိုလည်း မိသားစုကိုခေါ် ပြီး အရင်ပြန်သွားကြပြီး ကားကို အစောင့်နဲ့ ထားခဲ့တာပေါ့”ဟု ကားသမားတစ်ဦးက ပြောသည်။
သီပေါ – နမ့်လန် လမ်းတွင်မူ စစ်ကောင်စီနှင့် ကိုးကန့်တပ်က သီပေါတံတားကို ယနေ့အချိန်အထိ အပြန်အလှန် ပိတ်ထားသဖြင့် ယင်းလမ်းကြောင်းတွင်လည်း သွားလာ၍ မရသေးကြောင်း သတင်းရင်းမြစ်များထံမှ သိရသည်။
#MeKongNews
#ရှမ်းတောင်
#သံတိုသံစ
#စစ်ကောင်စီ
#တားဆီး
