မဲခေါင်၊ နိုဝင်ဘာ ၂၇
စစ်ပွဲပဋိပက္ခများ ရှိသည့်ဒေသတွင် ကလေးသူငယ်၊ အမျိုးသမီးနှင့် လိင်စိတ်ခံယူမှု ကွဲပြားသူများအပေါ် လိင်ပိုင်းဆိုင်ရာ နှောင့်ယှက်မှုနှင့် အကြမ်းဖက်မှု ပိုများလာကြောင်း အမျိုးသမီးအရေး တက်ကြွလှုပ်ရှားသူများက ထုတ်ပြန်သည့် အစီရင်ခံစာအရ သိရသည်။
အမျိုးသမီးအခွင့်အရေး ချိုးဖောက်ခံရမှာ စစ်အာဏာသိမ်းပြီးနောက် အဆိုးဆုံးအခြေအနေ ဖြစ်လာပြီး ကျူးလွန်သူအများစုသည် စစ်ကောင်စီတပ်ဖွဲ့ဝင်များ ဖြစ်ကာ တချို့အမှုတွင် တိုင်းရင်းသား လက်နက်ကိုင်အဖွဲ့များ၊ စစ်အာဏာသိမ်းပြီးနောက် ပေါ်ပေါက်လာသည့် ပြည်သူ့ကာကွယ်ရေးတပ်ဖွဲ့များနှင့် အရပ်သားများ ကျူးလွန်မှုလည်းရှိကြောင်း ဖော်ပြထားသည်။
“ဒီလို လိင်ပိုင်းဆိုင်ရာ ကျူးလွန်မှုတွေနဲ့ လူ့အခွင့်အရေး ချိုးဖောက်မှုတွေ ပိုတိုးလာတာဟာ ကူညီဖြေရှင်းမယ့် တရားရေးယန္တရားနဲ့ တိုင်ကြားနိုင်မှုတွေ အားနည်းတာ၊ စားဝတ်နေရေးခက်ခဲတာ စစ်ကောင်စီနဲ့ ဖြစ်ပွားတဲ့ ပဋိပက္ခတွေကြောင့် အမျိုးသမီးအရေးကို ဖြေရှင်းဖို့၊ အကာအကွယ်ပေး ထုတ်ဖော်ပြောဆိုဖို့ လူမှုအသိုက်အဝန်းက အာရုံစိုက်မှု နည်းနေတာဖြစ်ပါတယ်”ဟု အမျိုးသမီးအရေး တက်ကြွလှုပ်ရှားသူတစ်ဦးဖြစ်သည့် အသက် ၄၀ အရွယ် ဒေါ်စုသွေးနီက မဲခေါင်သို့ ပြောသည်။
ထို့ပြင် တရားဥပဒေစိုးမိုးမှု နည်းပါးသည့် ယခုကာလတွင် ကျူးလွန်မှုများမှာ ပုံစံအမျိုးမျိုးရှိနေပြီး ထိထိရောက်ရောက် ဖြေရှင်းမှုနည်းကာ ပြဿနာအများစုတွင် ကျူးလွန်သူများသည် အာဏာပိုင်နှင့် လုပ်ပိုင်ခွင့် တစ်ခုခုရှိသည့်ထဲက ဖြစ်ကြောင်းလည်း ၎င်းက ဆိုသည်။
မြန်မာဒီမိုဂရပ်ဖစ်အဖွဲ့အစည်းမှ ထုတ်ပြန်ချက်အရ အမျိုးသမီး ၇ ဦးတွင်တစ်ဦးက အကြမ်းဖက်ခံနေရပြီး အဓိကအားဖြင့် စိတ်ပိုင်း၊ ရုပ်ပိုင်း၊ လိင်ပိုင်းဆိုင်ရာများ သာမက ထိခိုက်ဒဏ်ရာများပါ ရရှိကြကြောင်း ထုတ်ပြန်ထားသည်။
စစ်အာဏာသိမ်းပြီနောက် ပဋိပက္ခအတွင်း လိင်ပိုင်းဆိုင်ရာ အကြမ်းဖက်မှုနှင့် ကျား၊ မအခြေပြု အကြမ်းဖက်မှုပေါင်း ၁၀၀၀ နီးပါးရှိခဲ့ကြောင်း မြန်မာနိုင်ငံအမျိုးသမီးများအဖွဲ့ချုပ်၏ အချက်အလက်အရ သိရသည်။
#MeKongNews
#စစ်အာဏာသိမ်း
#အမျိုးသမီးများ
#လိင်ပိုင်းကျူးလွန်မှု
#မြန်မာဒီမိုဂရပ်ဖစ်အဖွဲ့အစည်း
