မဲခေါင်၊ နိုဝင်ဘာ ၂၁
စစ်အာဏာ သိမ်းပြီးနောက် ရှမ်းပြည်တောင်ပိုင်း ပင်လောင်း၊ ဖယ်ခုံ နှင့် ဆီဆိုင်မြို့နယ်တို့၌ တိုက်ပွဲများကြောင့် စိုက်ပျိုးရေးလုပ်ငန်း တစ်နှစ်ထက်တစ်နှစ် ကျဆင်းလာကြောင်း ဒေသခံများထံမှ သိရသည်။
ယင်းဒေသများတွင် ပဋိပက္ခကာလအတွင်း အသက်အန္တရာယ် လုံခြုံမှုမရှိခြင်း၊ လုပ်သားရှားပါးမှု နှင့် စိုက်ပျိုးရေးသွင်းအားစုများကို စစ်ကောင်စီတပ်က ကန့်သတ် ထိန်းချုပ်ထားမှုများကြောင့် စိုက်ပျိုးနှုန်း သိသိသာသာ ကျဆင်းလာရခြင်း ဖြစ်ကြောင်း ဒေသခံများက ပြောသည်။
“လယ်မစိုက်နိုင်တာ ၃ နှစ်ရှိပြီ၊ စစ်ဘေးရှောင်တဲ့ နေရာကလည်း တောင်ပေါ်မှာဆိုတော့ ဘာမှစိုက်လို့မရဘူး။ မျိုးစေ့တွေလည်း မဝယ်နိုင်ဘူးလေ၊ ဒီဘက်မှာ မြေအငှားချပေးတယ်၊ တစ်ရာသီစာဆို ဘယ်နှစ်သိန်းနဲ့ပေါ့ အဲလို လုပ်ဖို့ကလည်း မျိုးစေ့တောင်မဝယ်နိုင်ဘူး။ ပြီးရင် ဈေးကဘယ်လိုလာမယ် မသိဘူးလေ၊ ဘာမှလုပ်လို့မရဘူး စားရလွယ်တဲ့ ပဲသီး၊ မုန်ညှင်းတွေကိုပဲ စစ်ရှောင်တဲနားမှာ စိုက်ပြီး စားဖို့လုပ်ရတာပေါ့။ အဲမျိုးစေ့တွေကလည်း အလှူရှင်တွေက လာလှူပေးထားတာ၊ အသားကလည်း မစားဖူးတာ ကြာပြီ။ စပါးမစိုက်ရလို့ လယ်မြေတွေလည်း မာတယ်၊ ဘဝအသစ် ပြန်စရသလိုပဲပေါ့” ဟု ပင်လောင်းစစ်ဘေးရှောင်တစ်ဦးက ပြောသည်။
ဆီဆိုင်မြို့နယ်၌ ၂၀၂၄ နှစ်ကလည်း စိုက်ပျိုးချိန်တွင် စစ်ရှောင်နေရပြီး နေအိမ်နှင့် တန်ဖိုးရှိပစ္စည်း အများအပြား ပျက်စီးဆုံးရှုံးမှုများကြောင့် အရင်းအနှီးမရှိ၊ လူငှားခေါ်မရသည့်အတွက် အခုနှစ်တွင် စိုက်ပျိုးသူလည်း နည်းပါးကြောင်း သိရသည်။
ယင်းအခြေအနေများကြောင့် လယ်ယာမြေပေါ်တွင် လုပ်ကိုင်သူမရှိခြင်း နှင့်အရင်းအနှီး မရှိသည့်အပြင် လုံခြုံရေး၊ လမ်းပန်းဆက်သွယ်ရေး ခက်ခဲမှုနှင့် ဈေးကွက် မရှိခြင်းတို့ကြောင့် စိုက်ပျိုးရေးလုပ်ငန်းကို စွန့်ပြီး ထိုင်း၊ မလေးရှား၊ လာအို စသည့် ပြည်ပနိုင်ငံသို့ ထွက်ခွာအလုပ်လုပ်သူ များလာကြောင်း သိရသည်။
စိုက်ပျိုးဧက နည်းပါးသည့်အပြင် ယခုနှစ်အတွင်း ရှမ်းတောင်တွင် စစ်ဘေး နှင့် သဘာဝဘေးဒဏ်များကြောင့် သီးနှံများအထွက်နှုန်း လျော့နည်းသဖြင့် ဒေသတွင်းစားနပ်ရိက္ခာ ဖူလုံမှုမရှိခြင်းနှင့် ကြုံတွေ့နေရကြောင်း ဒေသခံများထံမှ သိရသည်။
#MeKongNews
#ရှမ်းတောင်
#စစ်အာဏာသိမ်း
#စိုက်ပျိုးရေး
#ကျဆင်း
