မဲခေါင်၊ အောက်တိုဘာ ၂၆
တိုင်းရင်းသားရေးရာကို အလေးထားကြောင်း ပြသသည့်အနေဖြင့် ရှမ်းပြည်မြောက်ပိုင်း ၊ MNDAA ထိန်းချုပ် သိန္နီမြို့ ဗမာစကား(မြန်မာဘာသာစကား) သင်တန်း ဖွင့်လှစ်ရာ ခရိုင်အုပ်ချုပ်ရေးမှူးများ သင်တန်းတက်ရောက်လျက်ရှိကြောင်း The Kokang သတင်းစဥ်က ထုတ်ပြန်သည်။
ယင်းသင်တန်းတွင် MNTJP ဗဟိုအရန်ကော်မတီဝင်/ သိန္နခရိုင်အုပ်ချုပ်ရေးမှူး ဦးဖုန်ရှင်းချန်၊ ခရိုင်အုပ်ချုပ်ရေးမှူး ဒုတိယအဖွဲ့ဝင် ဟန်ကျားဟွား၊ ဒုတိယခရိုင်ဝန် ယန်ဝမ်လျန် အပါအဝင် ခရိုင်အဆင့် ခေါင်းဆောင်များကိုယ်တိုင် ဦးဆောင်ပါဝင် တက်ရောက်ခဲ့ကြသည်ဟု ဆိုသည်။
တိုင်းရင်းသားပေါင်းစုံ နေထိုင်ရာ ဒေသများ၌ ဘာသာစကားဖြင့် ဆက်သွယ်ပြောဆိုမှု အခက်အခဲများကို လက်တွေ့ကျကျ ဖြေရှင်းနိုင်ရန်နှင့် အများပြည်သူ ဝန်ဆောင်မှုပေးခြင်းကို မြှင့်တင်နိုင်ရန်အတွက် ယခုလို သင်တန်းများ ဖွင့်လှစ်ရခြင်းဟု ဖော်ပြထားသည်။
သင်ရိုးညွှန်းတမ်းသည် နေ့စဉ် အစိုးရရုံးလုပ်ငန်းသုံး ကိစ္စရပ်များတွင် ဗမာစကားကို လက်တွေ့ကျကျ အသုံးပြုနိုင်ရေးကို အဓိကထား သင်ကြားပေးခြင်းဖြစ်ပြီး ဤသို့ ဘာသာစကား တတ်မြောက်ရန် သင်ကြားခြင်းက တိုင်းရင်းသားအချင်းချင်း ဆက်သွယ်ရေး အတားအဆီးများကို ဖယ်ရှားကာ ဝန်ထမ်းများအနေဖြင့် လူမှုအကျိုးပြု ဝန်ဆောင်မှုများ မူဝါဒ ရှင်းလင်းချက်များ အပါအဝင် ကဏ္ဍစုံ ဆက်သွယ်ပြောဆိုရေး လုပ်ငန်းများကို ပိုမို ချောမွေ့စွာ ဆောင်ရွက်နိုင်ရန် ရည်ရွယ်သည်ဟု ပြောသည်။
ယင်းသင်တန်းကို အောက်တိုဘာ ၁၃ ရက်က စတင်ခဲ့ခြင်းဖြစ်ပြီး သင်တန်း၏ ပထမအသုတ် သင်တန်းသား စုစုပေါင်း (၄၃) ဦး ရှိကာ ခရိုင်အတွင်းရှိ ဌာနဆိုင်ရာများမှ လုပ်ငန်းကျွမ်းကျင်သော အဓိက ဝန်ထမ်းများလည်း ပါဝင်ကြောင်း သိရသည်။
“မြန်မာစကား မသိမတတ်တော့ ဘာသာပြန်တွေနဲ့ သွားရတာ၊ အစည်းအဝေးတွေကအစ ဂိတ်တာဝန်ကျတွေအဆုံး မြန်မာလိုတတ်မှ အပြောအဆို အဆင်ပြေမှာဖြစ်တယ်” ဟု ယင်း သင်တန်းတက်နေသူတစ်ဦးနှင့် နီးစပ်သူတစ်ဦးက မဲခေါင်သို့ ပြောသည်။
သင်တန်း အစီအစဉ်ကို သိန်းနီခရိုင် အစိုးရမှ စီစဉ်ဆောင်ရွက်ခဲ့ခြင်းဖြစ်ပြီး ဗမာစာပေနှင့် ယဉ်ကျေးမှု ကော်မတီမှ ကျွမ်းကျင်ဆရာ/ဆရာမများကို ဖိတ်ခေါ်၍ စနစ်တကျ သင်ကြားပေးလျက်ရှိကြောင်း သိရသည်။
လက်ရှိတွင် MNDAA သည် တရုတ်ဘာသာစာနှင့်စကားကိုသာ အဓိက သုံးစွဲနေသည့် အဖွဲ့အစည်း ဖြစ်သည်။
#MeKongNews
#ကိုးကန့်
#မြန်မာစာ
#သိန္နီ
#တရုတ်ဘာသာ
