မဲခေါင်၊ အောက်တိုဘာ ၁၇
နေပြည်တော်တွင် ကျင်းပနေသည့် NCA ၁၀ နှစ်ပြည့် နှစ်ပတ်လည်အတွက် RCSS မှ ထုတ်ပြန်ကြေညာချက်တစ်စောင်ကို အောက်တိုဘာ ၁၆ ရက်နေ့စွဲဖြင့် ထုတ်ပြန်လာသည်။
ပြီးခဲ့သည့် ၂၀၁၅ ခုနှစ်၊ အောက်တိုဘာ ၁၅ ရက်က ချုပ်ဆိုခဲ့သည့် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောထားစာချုပ် NCA သည် အောက်တိုဘာလ ၁၅ ရက်က ၁၀ နှစ်တင်းတင်းပြည့်ခဲ့ပြီ ဖြစ်သည်။
ယင်း NCA စာချုပ် မအောင်မြင်ရခြင်းမှာ အားနည်းချက်များနှင့် စိန်ခေါ်မှုများကြောင့်ဟု RCSS က ဆိုထားသည်။
ထုတ်ပြန်ချက်ပါ အဓိကအချက်မှာ စစ်တပ်၏ အာဏာသိမ်းမှုက ငြိမ်းချမ်းရေးလုပ်ငန်းစဥ်များကို ရပ်တန့်သွားစေသည်ဟု ဖော်ပြထားသည်။
ယုံကြည်မှုမတည်ဆောက်နိုင်မှု၊ အထက်စီးမှဆက်ဆံမှု၊ ၂၀၀၈ အောက်ဝင်ရန် ဖိအားပေးခံရမှုနှင့် စာချုပ်ပါအချက်များကို မလိုက်နာမှုများက NCA ၏ ရည်မှန်းချက်များကို အကောင်အထည်ဖော်ရာတွင် မျှော်မှန်းထားသည့်အတိုင်း ဖြစ်မလာဟု ဆိုထားသည်။
သို့အတွက် အနာဂတ်ငြိမ်းချမ်းရေး ငြိမ်းချမ်းရေးလမ်းစဥ်အောင်မြင်စေရေးအတွက် စစ်တပ်နှင့် EAOs များနှင့် ယုံကြည်မှုပြန်လည်တည်ဆောက်ရန်၊ EAOs များနှင့်ဆွေးနွေး၍ သဘောတူညီချက်များရယူပြီးလျင် နိုင်ငံရေးပါတီများပါဝင်၍ သုံးပွင့်ဆိုင်ဆွေးနွေးရန်၊ ယင်းဆွေးနွေးပွဲများတွင် နိုင်ငံတကာမှ အသိသက်သေများ တက်ရောက်စေရန်၊ ဖက်ဒရယ်ကို အဓိကဆွေးနွေးပြီး ရရှိလာသည့် သဘောတူညီချက်များကို လွှတ်တော်တွင်တင်သွင်း၍ ဥပဒေအဖြစ်အတည်ပြု ပြဌာန်းရန်တို့ကို RCSS မှ အကြံပြုထားသည်။
၂၀၁၅ ခုနှစ် အောက်တိုဘာလ ၁၅ ရက်နေ့တွင် ဦးသိန်းစိန်ဦးစီးအစိုးရအဖွဲ့၊ ပြည်သူ့လွတ်တော်၊ စစ်တပ်၊ တိုင်းရင်းသားလက်နက်ကိုင် ၈ ဖွဲ့နှင့် နိုင်ငံရေးပါတီများ၏ ကတိကဝတ်ပြုသဘောတူညီမှုတို့ဖြင့် NCA သဘောတူညီချက်စာချုပ်ကို လက်မှတ်ရေးထိုးခဲ့ကြခြင်းဖြစ်သည်။
ယမန်နှစ်ကပြုလုပ်သည့် NCA ၉ နှစ်ပြည့်မှာတွင် ရခိုင်ပြည်လွတ်မြောက်ရေးပါတီ(ALP)၊ ဒီမိုကရေစီအကျိုးပြုကရင်တပ်မတော်(DKBA)၊ ကရင်အမျိုးသားအစည်းအရုံး/ ကရင်အမျိုးသားလွတ်မြောက်ရေးတပ်မတော်-ငြိမ်းချမ်းရေးကောင်စီ (KNU/KNLA-PC)၊ လားဟူဒီမိုကရက်တစ်အစည်း အရုံး(LDU)၊ မွန်ပြည်သစ်ပါတီ(NMSP)နှင့် ရှမ်းပြည်ပြန်လည် ထူထောင်ရေးကောင်စီ(RCSS)တို့မှ ဥက္ကဋ္ဌ၊ ဒုတိယဥက္ကဋ္ဌ၊ အတွင်းရေးမှူး၊ ဗဟိုအလုပ်အမှုဆောင်ကော်မတီဝင်များနှင့် နိုင်ငံရေးပါတီအချို့တက်ရောက်ခဲ့ကြသော်လည်း ယခု ၁၀ နှစ်ပြည့်တွင်မူ RCSS တက်ရောက်ခြင်းမရှိတော့ဘဲ သဘောထားအကြံပြုချက်ကိုသာ ထုတ်ပြန်ခဲ့ခြင်းဖြစ်သည်။
#MeKongNews
#စစ်တပ်
#အာဏာသိမ်း
#RCSS
#ငြိမ်းချမ်းရေး
