မဲခေါင်၊ စက်တင်ဘာ ၁၅
စစ်ကောင်စီ ပြုလုပ်မည့် ၂၀၂၅ ရွေးကောက်ပွဲတွင် ရွေးကောက်ပွဲ ပြုလုပ်နိုင်ခြင်းမရှိသည့် မဲဆန္ဒနယ်မြေများကို ယမန်နေ့ စက်တင်ဘာ ၁၄ရက်စွဲဖြင့် စစ်ကောင်စီခန့် ရွေးကောက်ပွဲကော်မရှင်က ထုတ်ပြန်ကြေညာခဲ့ရာတွင် ရှမ်းပြည်မှ ၁၇မြို့နယ် ပါဝင်လာသည်။
ယင်းထုတ်ပြန်ချက်တွင် ပြည်သူ့လွှတ်တော် မဲဆန္ဒနယ် ၅၆နယ်၊ FPTP နိုင်သူအကုန်ယူ စနစ်အရ ပြုလုပ်မည့် အမျိုးသားလွှတ်တော်နေရာ၊ တိုင်းဒေသကြီး သို့မဟုတ် ပြည်နယ်လွှတ်တော် မဲဆန္ဒနယ် ၅၆ နယ်တို့၏ အမည်များကို ထုတ်ပြန်ရာတွင် ရှမ်းပြည်မှ ၁၇မြို့နယ် ပါဝင်လာခြင်းဖြစ်သည်။
‘ဝ’ဒေသမှ ပန်ဆန်း(ပန်ခမ်း)၊ နားဖန်း၊ ဟိုပန်၊ မိုင်းမော၊ ပန်ဝိုင်၊ ရှမ်းပြည်မြောက်ပိုင်းမှ တိုင်းရင်းသား လက်နက်ကိုင်တပ်ဖွဲ့များ သိမ်းပိုက်ထားသည့် နမ့်ဆန်၊ မန်တုံ၊ လောက်ကိုင်၊ ကုန်းကြမ်း၊ နမ္မတူ၊ ကွတ်ခိုင်၊ နမ့်ခမ်း၊ မဘိမ်း၊ မိုးမိတ်၊ ကွမ်းလုံ၊ သိန္နီနှင့် NDAA ထိန်းချုပ်ထားသည့် မိုင်းလား စုစုပေါင်း ၁၇ မြို့နယ်တွင် ရွေးကောက်ပွဲမကျင်းပနိုင်ကြောင်း စစ်ကောင်စီ UEC က ကြေညာသည်။
ရွေးကောက်ပွဲ မပြုလုပ်ဖြစ်သည့် ရှမ်းပြည်မှအမျိုးသားလွှတ်တော် နေရာများအဖြစ် တအာင်းနှင့် ကိုးကန့်ကိုယ်ပိုင်အုပ်ချုပ်ခွင့်ရဒေသများကို ဖော်ပြထားသည်။
လက်ရှိ TNLA နှင့် MNDAA သိမ်းပိုက်ထားသည့် သိန္နီ၊ ကွတ်ခိုင်စသည့် မြို့နယ်များ ထုတ်ပြန်ချက်တွင် မပါလာခြင်းမှာ စစ်တပ်က ၎င်းတို့ ပြန်သိမ်းနိုင်မည်ဟု ယူဆထားသည့်အတွက် ဖြစ်နိုင်ကြောင်း နိုင်ငံရေး၊ စစ်ရေးအကဲခတ်သူ အထက်မြန်မာနိုင်ငံ နိုင်ငံရေးအကျဥ်းသားဟောင်းတစ်ဦးက သုံးသပ်ပြောဆိုသည်။
“စစ်တပ်ဟာ အတတ်နိုင်ဆုံး ကိုးကန့်ဆီက သိန္နီ ၊ ကွတ်ခိုင်တို့ ကို ပြန်တောင်းနေတာ မရခဲ့ဘူး။ ‘ဝ’ ကလည်း လက်မခံဘူး။ မိုင်းလားရောပဲ။ သူတို့ မအောင်မြင်ဘူးဆိုတာ ဒီထုတ်ပြန်ချက်ကို ကြည့်ရင် သိမြင်နိုင်တယ်။ ဒါပေမယ့် နောက်ပိုင်း ရွေးကောက်ပွဲကို စောင့်ကြည့်ရမယ်။ အခု TNLA နဲ့တိုက်နေဆဲ ကျောက်မဲ၊ သီပေါတို့ကိုတော့ စစ်ရေးအရ သိမ်းမယ် ယူဆထားနေလို့ အခု စာရင်းမှာ မဖော်ပြထားတော့ TNLA က ခုခံစစ်များရင် တိုက်ပွဲတွေ ပြင်းထန်လိမ့်မယ်” ဟု ၎င်းက သုံးသပ်သည်။
စစ်ကောင်စီခန့် UEC က ရွေးကောက်ပွဲကို အပိုင်းလိုက်ပြုလုပ်ရာတွင် လာမည့် ဒီဇင်ဘာ၂၈ရက်မှ စတင်ပြုလုပ်မည်ဟု ကြေညာထားပြီး ယင်းရွေးကောက်ပွဲတွင် ပြည်သူ့လွှတ်တော် မဲဆန္ဒနယ် ၂၇၄ နယ်၊ FPTP စနစ် အမျိုးသားလွှတ်တော် မဲဆန္ဒနယ် ၇၅နယ်၊ PR အချိုးကျ စနစ် မဲဆန္ဒနယ် ၂၆နယ်၊ တိုင်းဒေသကြီး သို့မဟုတ် ပြည်နယ်လွှတ်တော်တွင် FPTPစနစ်ဖြင့် ၂၆၆ နယ်၊ PRစနစ်ဖြင့် ၄၂နယ်နှင့် တိုင်းရင်းသားကိုယ်စားပြု မဲဆန္ဒ နယ်၂၉တို့ ပါဝင်မည်ဟု ကြေညာထားသည်။
#MeKongNews
#ရှမ်းပြည်
#ရွေးကောက်ပွဲ
#မိုင်းလား
#UWSA
#TNLA
#မဲဆန္ဒနယ်
