မဲခေါင်၊ စက်တင်ဘာ ၈
စစ်ကောင်စီအာဏာသိမ်းထားသည့် ၄နှစ်တာ ကာလအတွင်း ရှမ်းပြည်သည် ကုန်ဈေးနှုန်း အမြင့်ဆုံး မြင့်တက်ခဲ့သည့် ပြည်နယ်နှင့်တိုင်းဒေသကြီးစာရင်းတွင် ပါဝင်နေပြီး ဆန်ဈေးနှုန်းမှာ ၇၂ ရာခိုင်နှုန်းအထိ မြင့်တက်ခဲ့ကြောင်း ကုလသမဂ္ဂ လူ့အခွင့်အရေး မဟာမင်းကြီး၏ အစီရင်ခံစာတွင် ဖော်ပြထားသည်။
ကုလသမဂ္ဂ လူ့အခွင့်အရေး မဟာမင်းကြီး အစီရင်ခံစာကို မြန်မာဘာသာဖြင့် UN – OHCHR Myanmar က စက်တင်ဘာလ ၈ ရက်နေ့တွင် ဖြန့်ချိထုတ်ဝေခဲ့ခြင်းဖြစ်ပြီး အစီရင်ခံစာတွင် အထူးစိုးရိမ်စရာကောင်းသည်မှာ မြန်မာနိုင်ငံ၏ စားသောက်ကုန်ဈေးနှုန်းများမှာ အမြင့်ဆုံးအထိ မြင့်မားလာနေကြောင်း၊ ၂၀၂၄ခုနှစ်တွင် ပျှမ်းမျှ စားသောက်ကုန်ဈေးနှုန်းသည် ဝင်ငွေထက် ပိုမိုမြင့်မားလာနေကာ ၃၀ ရာခိုင်နှုန်းအထိ တိုးမြင့်လာ၍ မြို့ပြများတွင် ဝယ်ယူသုံးစွဲနိုင်စွမ်း ကျဆင်းခဲ့သည်ဟု ဖော်ပြထားသည်။
အစီရင်ခံစာ တင်သွင်းနေသည့် ၂၀၂၅ ခုနှစ် စက်တင်ဘာလအတွင်း ဆန်ဈေးနှုန်းသည် ချင်းပြည်တွင် ၈၇ ရာခိုင်နှုန်း၊ ရှမ်းပြည်တွင် ၇၂ ရာခိုင်နှုန်းနှင့် စစ်ကိုင်းတိုင်းတွင် ၅၀ ရာခိုင်နှုန်းကျော် မြင့်တက်လာခဲ့သည်ဟု ဖော်ပြထားရာ မြန်မာနိုင်ငံတွင် တိုင်းနှင့် ပြည်နယ် ၁၄ခုအနက် ရှမ်းပြည်မှာ ဒုတိယ ဆန်ဈေးအမြင့်ဆုံး ပြည်နယ် ဖြစ်လာခဲ့သည်။
စစ်တပ်အာဏာသိမ်းသည့် ၂၀၂၁ခုနှစ် ဖေဖော်ဝါရီလနောက်ပိုင်း ရှမ်းပြည်အတွင်း ဆန်ဈေးဆက်တိုက်မြင့်တက်နေကြောင်း ရှမ်းပြည်တောင်ပိုင်းတွင် နေထိုင်သူ တစ်ဦးကပြောသည်။
“ဆန်ဈေးနှုန်းက နှစ်တိုင်းလိုလို တောက်လျှောက် မြင့်တက်လာနေတာပဲ။ ဒေသဆန်တွေလည်း လိုက်မြင့်တက်လာခဲ့တာ” ဟု ၎င်းကပြောသည်။
ရှမ်းပြည်ဒေသထွက်ဆန်တစ်အိတ်သည် ၂၀၂၁ ခုနှစ်ကာလက ကျပ် ၇၀၀၀၀ ဝန်းကျင်သာ ရှိရာမှ ၂၀၂၅ ခုနှစ်တွင် ကျပ် ၁၆၀၀၀၀ အထိဈေးမြင့်တက်လာခဲ့သည်။
မြန်မာနိုင်ငံ၏ စားနှပ်ရိက္ခာမလုံလောက်မှု အခြေအနေမြင့်မားနေခြင်းက စိုးရိမ်ဖွယ်ရာ ဖြစ်နေပြီး အစားအစာ လက်လီဈေးနှုန်းများ နှစ်အလိုက် စံချိန်တင် မြင့်တက်နေသကဲ့သို့ ဆက်လက်မြင့်တက်နေဆဲ ဖြစ်ကာ ပဋိပက္ခ ဖြစ်ပွားနေသော ရခိုင်၊ ချင်း၊ ကယားနှင့် ရှမ်းပြည်တို့သည် ကုန်ဈေးနှုန်း အမြင့်ဆုံး ဖြစ်ခဲ့ကြောင်း ကမ္ဘာ့ဘဏ် အစီရင်ခံစာကလည်း ဆိုထားသည်။
ကျပ်ငွေ တန်ဖိုး ကျဆင်းခြင်း၊ ပဋိပက္ခ ပိုမိုဆိုးရွာလားခြင်း၊ ကုန်စည်ပို့ဆောင်ရေး ပြတ်တောက်ခြင်းများကြောင့် ကုန်ဈေးနှုန်းမြင့်တက်လာခြင်း စသည့်အခြေအနေများက စားနပ်ရိက္ခာ မလုံလောက်မှုကို ဖြစ်စေပြီး နိုင်ငံတွင်းရှိ အဆင်းရဲဆုံး ပြည်သူများသည် မြင့်တက်လာသည့် စားသောက်ကုန်ဈေးနှုန်းဒါဏ်ကို ပြင်းပြင်းထန်ထန် ခံရသူများ ဖြစ်လာသည် ဟုလည်း ဖော်ပြထားသည်။
#MeKongNews
#ရှမ်းပြည်
#ဆန်ဈေးအမြင့်ဆုံး
#ကုန်ဈေးနှုန်း
#OHCHR
