မဲခေါင်၊ သြဂုတ် ၃၀
တရားမဝင်ကုန်စည်ကြောင့် ကရင်ပြည်နယ် ရတခဒုတိုင်းမှူးအားဖမ်းဆီးခဲ့သော်လည်း တရားမဝင်ကုန်စည်ကြောင့်ပင် ကြီးပွားလာခဲ့သော ယခင်ရပ်စောက်တပ်နယ်မှူး ဗိုလ်မှူးချုပ်နိုင်ဇော်ဦးအား ရပခတိုင်းမှူးအဖြစ်ခန့်အပ်ခဲ့သဖြင့် စစ်ကောင်စီ၏ လုပ်ရပ်ကို စစ်တပ်အသိုင်းအဝန်းအတွင်း ကျေနပ်မှုမရှိကြောင်း သိရသည်။
ယခုအရှေ့ပိုင်းတိုင်းစစ်ဌာနချုပ် တိုင်းမှူး ဗိုလ်ချုပ်နိုင်ဇော်ဦးမှာ ရပ်စောက်မြို့၊ ဗထူးဗိုလ်သင်တန်း ကျောင်း ကျောင်းအုပ်ကြီးအဖြစ်တာဝန်ယူခဲ့သည့် ဇူလိုင်လ အထိ ၎င်း၏ ကိုယ်ရေးအရာရှိ PSO ဗိုလ်ကြီးရဲသူအောင်မှ တစ်ဆင့် တရားမဝင်ကုန်စည်ကားကြီး တစ်စီးလျင် ကျပ် ၂သိန်းခွဲ၊ သစ်မှောင်ခိုကားတစ်စီးလျင် ကျပ် ၆သိန်း၊ တရားမဝင် သစ်စက်တစ်စက်လျင် လစဥ်ကြေး ကျပ်၆၀သိန်းနှင့် အခြားကားများအားလည်း အနေအထားအမျိုးမျိုးအလိုက် တပ်နယ်မှူးကြေး၊ တပ်နယ်ကြေး၊ ဂိတ်ကြေး စသည်ဖြင့် နေ့စဥ် ရာချီဖြတ်သန်းလျက်ရှိသော ကုန်တင်ကားကြီး၊ ကားငယ် အမျိုးမျိုးထံမှ ကောက်ခံခဲ့ရာမှ ယခုအခါ ရပခ တိုင်းမှူးဖြစ်လာသည်ဟု စစ်ဘက်မိသားစုဝင်တစ်ဦးက မဲခေါင်သို့ ပြောသည်။
“စစ်ကောင်စီအနေနဲ့ မိမိစစ်တပ်အတွင်းတာဝန်ထမ်းဆောင်နေတဲ့ ဗိုလ်ချုပ်အဆင့်များကိုလည်း ကျောသားရင်သားမခွဲခြားဘဲ ဆုပေးဒဏ်ပေးဆောင်ရွက်ရမည်ဖြစ်ရမှာပါ။ ကရင်ပြည်နယ်က ရတခ ဒု တိုင်းမှူး ကျတော့ အဲဲဒီကိစ္စတွေနဲ့ ဖမ်းဆီးခဲ့ပြီး အလားတူ ကိစ္စများနဲ့ပဲ ကြီးပွားနေတဲ့ ရပ်စောက်တပ်နယ်မှူးကို ရပခ တိုင်းမှူးအဖြစ် ရာထူးတိုးမြှင့်ပေခဲ့တာဟာ ဘာလို့လဲလို့ အကုန်လုံးက မေးနေကြတယ်။ သူမှ မိသားစု ရှိတာ မဟုတ်ပါဘူး။ ကျွန်တော်တို့ တတက မှာလည်း မိသားစုတွေနဲ့ ပါ”ဟု ၎င်းက မဲခေါင်သို့ ပြောသည်။
ယခုအချိန်ထိလည်း ရပ်စောက်ရှိ မင်းသုံးပါးဂိတ်တွင် တရားမဝင်ကုန်များ၊ သစ်တင်ကားများကိုအခကြေးငွေယူကာ လွှတ်ပေးမြဲဖြစ်ပြီး ရပခ တိုင်းမှူးမှလည်း တပည့်များ၏ ဝေစုခွဲဝေပေးမှုဂါရဝအား လက်ခံပေးလျက်ရှိကြောင်း နှင့်အောက်ခြေတပ်နယ်မှူးလုပ်ခဲ့သည့် ဗထူးမင်းသုံးပါးဂိတ်အား မျက်ကွယ်ပြုပေးလျက်ရှိသည်ဟု သတင်းရင်းမြစ်များကပြောသည်။
ထိုင်းနယ်စပ်မှ ဝင်လာသော ကုန်ကားများကို မဖမ်းဘဲ လာဘ်ငွေယူ လွှတ်ပေးမှုဖြင့် ရတခ ဒုတိုင်းမှူး ဗညားဝင်း၊ အကောက်ခွန်ညွှန်မှူးစိုးညွန့်အောင်နှင့် ဌာနဆိုင်ရာ အရာရှိ ၁၅ ဦးတို့ကို ဒုကာချုပ်စိုးဝင်း၏ ဖမ်းဆီးစစ်ဆေးနေသည့် ဖြစ်စဉ်နှင့် ချိန်ထိုးပြီး ရပခတိုင်းမှူးခန့်အပ်မှုအပေါ် မကျေနပ်ကြခြင်းဖြစ်သည်ဟု သတင်းရင်းမြစ်က ဆိုသည်။
ဗညားဝင်းမှာ အမှတ် ၄ တပ်မတော်တန်းမြင့်လေ့ကျင့်ရေးကျောင်း၏ ကျောင်းအုပ်ကြီးအဖြစ် တာဝန်ထမ်းဆောင်နေရာမှ ၂၀၂၅ ခုနှစ် ဇန်နဝါရီလအတွင်းတွင်မှ အရှေ့တောင်တိုင်းစစ်ဌာနချုပ်၏ ဒုတိုင်းမှူးဖြစ်လာခြင်းဖြစ်ပြီး ပြီးခဲ့သည့် သြဂုတ်လဆန်းပိုင်းက နေပြည်တော်စစ်ဘက်ရေးရာလုံခြုံရေးအဖွဲ့မှ တိုက်ရိုက်လာရောက်ဖမ်းဆီးခြင်း ဖြစ်ကြောင်း သိရှိရသည်။
#MeKongNews
#ရပခ
#တရားမဝင်ကုန်စည်
#ရှမ်းပြည်
#ဗိုလ်ချုပ်နိုင်ဇော်ဦး
