မဲခေါင်၊ သြဂုတ် ၂၇
ဝေဟင်၊ မြေပြင်လက်နက်ကြီးများဖြင့် စစ်ကြောင်းထိုးလာသည့် စစ်ကောင်စီကို နောင်ပိန်တွင် TNLA တပ်ဖွဲ့ဝင်များက အပြင်းအထန်ခုခံရင်း ဟန့်တားထားနိုင်ကြောင်း စစ်ရေးသတင်းအမြစ်များထံမှ သိရသည်။
သြဂုတ်လ ၁၉ ရက်က ဂုတ်ထိပ်ချောင်းကို ဖောင်ဖြင့် ဖြတ်ကျော်လာသည့် တပ်မ ၁၁ ၏ အင်အား ၇၀၀ ကျော်ပါ စစ်ကြောင်းသည် ချီတက်ရာလမ်းကြောင်းအရ လက်နက်ငယ်နှင့် ကျည်တပိုင်တနိုင်သာ သယ်ဆောင်လာခဲ့ရခြင်းကြောင့် ဗျူဟာမြောက်လက်နက်ကြီးများဖြင့် အဝေးမှသာ ပစ်ကူပေးနိုင်နေသဖြင့် ချီစစ်အဟုန် ပစ်အားဖြင့် မတိုက်နိုင်ဘဲ ရှိနေသည်ဟု စစ်ရေးလေ့လာသူတစ်ဦးက သုံးသပ်ပြောဆိုသည်။
“ထောက်ပံ့ရေးလမ်းကြောင်း အခက်အခဲရော၊ လက်နက်ခဲယမ်းပိုင်းရော တင်းပြည့်မပါနိုင်သလို ပစ်အားနဲ့ တက်ရမှာ မတက်နိုင်သလို တွေ့ရတယ်။ နောင်ပိန်က အမှန် SSPP ခြေကုတ်ရွာ၊ ခုသူတို့ မရှိမှ TNLA ဝင်ယူတာဆိုတော့ ခံစစ်ဆောက်ဖို့ အချိန်မရပေမယ့် ဟန့်စစ်နဲ့ ထိန်းထားနိုင်နေတယ်။ နောင်ပိန်က ရှေ့ဆက်တက်ရင်တော့ ထုနဲ့ ခံစစ်တိုးနိုင်တယ်။ မမျှော်လင့်ပဲ တိုက်စစ်နဲ့လည်း တွေ့နိုင်တယ်။ စစ်ရေးက တသမတ်တည်းမပြောနိုင်ဘူးလေ။ နိုင်ငံရေးအရနဲ့ မဟာမိတ်အကူရလာရင် အခြေအနေတစ်မျိုး ဖြစ်လာနိုင်တယ်” ဟု ၎င်းက မဲခေါင်သို့ ပြောသည်။
အခြားစစ်ရေး သတင်းအရင်းအမြစ်တစ်ခုကမူ ရှမ်းမြောက်စစ်ရေး ထူးခြားချက်အနေဖြင့် ဩဂုတ်လ ၂၆ ရက်နေ့ နံနက်ပိုင်း ၁၁ နာရီ ၂၀ မိနစ်၌ စစ်ကောင်စီ ရဟတ်ယာဉ် ၁ စီး မူဆယ်သို့ လက်နက်ပစ္စည်းများ ထပ်မံပို့ဆောင် လာချသွားခဲ့သလို ၂၅ ရက်နေ့ ညနေ ၂ နာရီ ၄၄ မိနစ်တွင်လည်း ရဟတ်ယာဉ်စ်စီး မူဆယ်တွင် ကင်းထောက်ပစ္စည်းများ လာချသွားသည် ဟု ပြောသည်။
နောင်ပိန်ကြီးရွာမှာ လူဦးရေ ၄၀၀၀ ခန့် အိမ်ခြေ ၂၀၀ ကျော်ရှိရာ တိုက်ပွဲအတွင်း သြဂုတ်လ ၂၅ ရက်နေ့၌ နောင်ပိန်ကမ်းလင့်လက်များ အသင်းခေါင်းဆောင် ဦးနေအောင်၏ အထည်ဆိုင်နှင့် အိမ်အပါအဝင် ၁၀ လုံးကျော် မီးလောင်ကျွမ်းခဲ့ကြောင်းနှင့် ဒဏ်ရာရလူနာနှင့် စစ်မရှောင်နိုင်သဖြင့် ကျန်ရှိနေသူသက်ကြီးရွယ်အိုများ နှင့် ကလေးငယ်များအနည်းစု ရှိနေသေးကြောင်းဒေသခံများထံက သိရသည်။
ရပ်ကွက် ၂ မှ အိမ်၊ တန်းလျား၊ အထည်ဆိုင်၊ ကုန်စုံဆိုင်နှင့် လက်ဖက်ရည်ဆိုင်များ မီးလောင်ကျွမ်းခံခဲ့ရကြောင်း သိရသည်။
ကျောက်မဲမြို့ပေါ် ၉ ရပ်ကွက်ကမူ သြဂုတ် ၂၆ ရက်တွင် နေထိုင်သည့် လူဦးရေ ၇၀ ရာခိုင်နှုန်းမျှ စစ်ရှောင်သွားနေကြပြီ ဖြစ်ကြောင်း ပရဟိတအသင်းများထံမှ သိရသည်။
မဟာ
#MeKongNews
#နောင်ပိန်
#ကျောက်မဲ
#စစ်ကောင်စီ
#TNLA #SSPP
