မဲခေါင်၊ ဩဂုတ် ၂၃
ရှမ်းပြည်နယ်၊ ကျောက်မဲမြို့နယ်၊ နောင်ပိန်ကြီးရွာကို စစ်ကောင်စီက လေယာဉ်ဖြင့် ယနေ့ ဗုံးထပ်ကြဲသဖြင့် နေအိမ်များ မီး လောင်နေပြီး မြေပြင်တွင်လည်း တိုက်ပွဲများ ဆက်လက် ပြင်းထန်နေကြောင်း ဒေသသတင်းရင်းမြစ်က မဲခေါင်သတင်းဌာနသို့ ပြောသည်။
ယနေ့ ဩဂုတ်လ ၂၃ ရက်နေ့ နံနက်ပိုင်းတွင်နောင်ပိန်ကြီးရွာအတွင်းကို စစ်ကောင်စီက လေယာဉ်ဖြင့် ဗုံးကြဲတိုက် ခိုက်ခဲ့ခြင်းကြောင့် နေအိမ်အများအပြား မီးလောင်နေသည်ဟု ပြောသည်။
“လူကတော့ မရှိသလောက်ပဲ၊ အားလုံးလိုလို သွားကုန်ကြပြီ။ လေယာဥ်ရော လက်နက်ကြီးရော တစ်ရက်မရှိဘူးဆို အလုံး ၃၀ အောက်မလျော့ဘူး။ ဘယ်သူမှ မနေရဲကြတော့ဘူး။ ပရဟိတအဖွဲ့တွေကတော့ အလောင်းကောက်ပေမယ့် လက်နက်ကြီးမပြတ်ထုနေတော့ တချို့မကောက်နိုင်ဘူး။ ဒဏ်ရာရသူတွေတော့ ရသမျှ ဆေးရုံပို့နေတယ်” ဟု ဒေသခံပြည်သူတစ်ဦးက မဲခေါင်သို့ပြောသည်။
နောင်ပိန်ကြီးတိုက်နယ်အုပ်စုမှ စစ်ရှောင် တစ်သောင်းကျော်အနက် နမ့်ဟူး၊ ပင်စုံ၊ ဟဲကွီ၊ နမ့်ဟန်ခိတ်၊ နောင်ကွမ်၊ ပုံဝိုး၊ နောင်မိန်း၊ ခေါက်ဝိုး၊ ကွမ်ဟင်၊ ပန်လော့၊ နမ့်ပြင်စသည့် နေရာပေါင်း ၂၁ နေရာသို့ စစ်ရှောင်အိမ်ထောင်စု ၁၁၉၅ စု၊ လူဦးရေ ၅၆၉၅ ဦး ရောက်ရှိလာနေသည်ဟု နမ့်ခုံးရှမ်းများအသင်း ကျောက်မဲ၏ ယနေ့သြဂုတ်လ ၂၃ ရက်စာရင်းအရသိရပြီး ကျန်ရှိနေသူများကို စာရင်းဆက်လက်ကောက်ယူဆဲဖြစ်ကြောင်း သိရသည်။
“ကျောက်မဲမြို့ကနေ မန္တလေးဘက်ခြမ်း (ပြည်ထောင်စုလမ်းမကြီးပေါ်) မသွားလာကြပါနဲ့တော့။ အန္တရာယ်မကင်းနိုင်ပါ။ နောင်ပိန်ထဲ တိုက်ပွဲပြင်းထန်နေပြီး မဲမဲမြင်ရာ အကုန်ပစ်နေပါတယ်။ အမျိုးသမီးတစ်ဦး ဦးခေါင်းထိ၊ ကလေးတစ်ယောက်
လက်ထိ၊ စိုင်းစန်းလွင် ဆိုသူ ဗိုက်ထိသေဆုံးပါတယ်။ ဘယ်ပရဟိတအသင်းအဖွဲ့မှလည်း ဝင်ဖို့မလွယ်ကူသေးပါ။ မကြာခင် နောင်ပိန်ကနေ (ကျောက်မဲ)မြို့ထဲဘက် ဝင်ရောက်တော့မယ့်အခြေနေပါ” ဟု ဒေသခံတစ်ဦးက ယနေ့ညနေ ၃ နာရီ ၁၅ မိနစ်တွင် ပြောကြားလာသည်။
လားရှိူးဆေးရုံကြီးသို့ ရောက်ရှိကုသနေသည့် ပြင်းထန်ဒဏ်ဒဏ်ရသူစာရင်းမှာ အရိုးဆောင်အပေါ်ထပ်၌ ၁၄ ဦး၊ အောက်ထပ်၌ ၈ ဦးရှိနေပြီး အကူအညီများစွာလိုအပ်နေသည်ဟု ပရဟိတလုပ်ဆောင်နေသူများက ပြောသည်။
“လူနာက မပြင်းထန်ပေမယ့် ကုသလူနာတွေနဲ့ ၅၀ လောက်ရှိတယ်။ မိသားစု နဲ့ ၇ဝ ကျော်တယ်။ ရိက္ခာကအစ အဝတ်အထည်အဆုံး အားလုံးလိုပါတယ်။ အထူးသဖြင့် ငွေလိုအပ်ပါတယ်” ဟု FYO ပရဟိတအသင်းတာဝန်ခံက မဲခေါင်သို့ ပြောသည်။
ကျောက်မဲ၊ သီပေါမှတဆင့် မနမ့်လန်ဘက်သို့ စစ်ရှောင်လာသူ အများအပြားလည်း ရှိလာနေသည်ဟု နမ့်လန်ရောက် ကျောက်မဲသားတစ်ဦးကလည်း ပြောသည်။
ပြီးခဲ့သည့်ဩဂုတ်လ ၁၉ ရက်နေ့ နံနက်ပိုင်းမှ စတင်ပြီး နောင်ပိန်ရွာနှင့် တစ်မိုင်ကျော်ခန့်သာ ကွာဝေးသည့် ထန်းတပင်ရွာကို နောင်ချို-ဂုတ်ထိပ်ဘက်မှ စစ်တပ်စစ်ကြောင်း ရောက်ရှိလာပြီးနောက်ပိုင်း နောင်ပိန်ရွာကို စစ်တပ်က Y-12၊ ဂျက်ဖိုက်တာ၊ လက်နက်ကြီးများဖြင့် နေ့စဉ် ပစ်ခတ်တိုက်ခိုက်နေခြင်း ဖြစ်သည်။
#MeKongNews
#ရှမ်းပြည်မြောက်ပိုင်း
#ကျောက်မဲမြို့နယ်
#နောင်ပိန်ရွာ
#လေကြောင်းတိုက်ခိုက်မှု
#စစ်ကောင်စီ
#ထိခိုက်ဒါဏ်ရာရ
