မဲခေါင်၊ သြဂုတ် ၁၇
UWSA ထိန်းချုပ်နယ်မြေ၊ ဟိုပန်ခရိုင်၏ ခရိုင်မှူး တာ့ညီလင်းကို အသက်မပြည့်သူ အပါအဝင် အမျိုးသမီး ၄ ဦးအား အဓမ္မကျင့် စော်ကားမှုဖြင့် UWSA မှရာထူးဆိုင်းငံ့လိုက်ပြီး ထောင်ဒဏ်နှင့် ငွေဒဏ်လျော်ကြေးများ ချမှတ်ခဲ့ကြောင်း “ဝ” လူငယ်အသံက သြဂုတ်လ၁၆ရက်တွင် ဖော်ပြလာသည်။
UWSA – တရားစီရင်ရေးဌာနက လူထုရှေ့၌ တရားစီရင်ချက် ချမှတ်သည့် အခမ်းအနားကို သြဂုတ် ၁၆ ရက် မြန်မာစံတော်ချိန် နံနက် ၇ ခွဲ၊ တရုတ်အချိန် ၉ နာရီ၌ ဟိုပန်မြို့ယဥ်ကျေးမှုကွင်းတွင် ပြုလုပ်ခဲ့ပြီး ဒေသခံပြည်သူတွေကို တစ်အိမ်တစ်ယောက် လာရောက်ကြည့်ရှု့နားထောင်စေခဲ့ကြောင်း သိရသည်။
အမျိုးသမီးငယ် ၄ဦးထဲ၌ အသက်မပြည့်သေးသူတစ်ဦး ပါဝင်ကာ ၂ဦးမှာ မုဒိန်းမှု မြောက်ခဲ့ပြီး ကျန် ၂ ဦးမှာမူ မုဒိန်းမှုမဖြစ်မြောက်ပဲ လိင်ပိုင်းဆိုင်ရာ ထိပါးစော်ကားသည်ကို ခံခဲ့ရသည်ဟု ဆိုသည်။
ပြစ်မှုကျူးလွန်သူ တာ့ညီလင်းကို ရာထူးမှဆိုင်းငံ့လိုက်ပြီး ကျူးလွန်ခံရသူ ၂ဦးကို တစ်ဦးလျင် ယွမ်တစ်သိန်းစီနှင့် လိင်ပိုင်းစော်ကားခံရသူဦးကို တစ်ဦးလျင် ယွမ်ငါးသောင်းစီ ပေးဆောင်စေခဲ့ကြောင်းသိရသည်။
ယင်းသို့ပြစ်မှုကျူးလွန်ရာတွင် ကြံရာပါဖြစ်သည့် ခရိုင်ရုံးအုပ်၊ ဒုတိယရုံးအုပ်နှင့် ယဥ်ကျေးမှုအသင်းခေါင်းဆောင်တို့ကိုလည်း လက်ရှိရာထူးမျမှ လျော့ချလိုက်ပြီး ၃ လစီ အနားပေးထားသည်ဟုလည်း သိရသည်။
ယင်းမုဒိန်းမှုနှင့် လိင်ပိုင်းဆိုင်ရာ ကျူးလွန်ခဲ့သည့် ခရိုင်မှူး တာ့ညီလင်းကို “ဝ” ပြည်နယ် တရား စီရင်ရေးဌာနက စုံစမ်းစစ်ဆေးမှုများ အကြိမ်ကြိမ် ပြုလုပ်ပြီးနောက် အယူခံတွင်ပါဝင်သည့် အချက်အလက်များကို ဥပဒေရုံးမှ တရားရုံးကို တင်ပြပြီး လူသက်သေ၊ နှုတ်သက်သေ၊ စာသက်သေနှင့် မျက်မြင်သက်သေထွက်ဆိုချက်များကို အတည်ပြုခြင်း ဖြစ်ကြောင်း သိရသည်။
Source – Wa News Land
#MeKongNews
#ဟိုပန်
#တာ့ညီလင်း
#အဓမ္မမှု
#UWSA
