မဲခေါင်၊ သြဂုတ် ၁၅
ကိုးကန်တပ်များဖယ်ပေးရန် စစ်ကောင်စီကတောင်းဆိုသည့် ဟိုယ-တန့်ယန်းလမ်းကြောင်းတွင် MNDAA တပ်များ စစ်ရေးပြင်ဆင်နေကြောင်း ဒေသသတင်းအရင်းအမြစ်များထံမှ သိရသည်။
စစ်ကောင်စီနှင့် TNLA တို့ ဩဂုတ်လ ဒုတိယပတ်အတွင်း တရုတ်နိုင်ငံ၊ မန်ရှီတွင် ဆွေးနွေးမှု မအောင်မြင်ခဲ့သလို မနေ့သြဂုတ် ၁၄ ရက်တွင် လားရှိုးမြို့၊ ဆင်နှစ်ကောင်ဟိုတယ်၌ စစ်ကောင်စီနှင့် ကိုးကန့်တပ်တို့အကြား တွေ့ဆုံမှု ဆွေးနွေးပွဲ ညှိနှိုင်းမရသည့်နောက်ပိုင်း ယခုကဲ့သို့ ပြင်ဆင်လာကြခြင်းဖြစ်သည်။
“ဟိုယမှာ Equipment အပြည့်အစုံနဲ့ MNDAA စစ်ရေး ပြင်ဆင်နေပါပြီ။ ကွတ်ခိုင်၊ နမ့်ခမ်းကျောင်းတွေ ပိတ်ပြီ” ဟု သတင်းရင်းမြစ်က ပြောသည်။
ထို့အပြင် MNDAA ထိန်းချုပ် ကွတ်ခိုင်နှင့် TNLA ထိန်းချုပ်ထားသည့် နမ့်ခမ်းတို့တွင် လေကြောင်း တိုက်ခိုက်မှုဖြစ်နိုင်သည့် အန္တရာယ်ကြောင့် စာသင်ကျောင်းများ အရေးပေါ်ပိတ်လိုက်ပြီး ကျောင်းသားများကို မိဘများက ပြန်ခေါ်ယူခဲ့ကြကြောင်း ဒေသခံများက ပြောသည်။
တိုက်ပွဲများ တကြော့ပြန် ပြန်လည်ပြင်းထန်လာမည်ကို ကွတ်ခိုင်ဒေသခံများက စိုးရိမ်နေကြပြီး လေကြောင်းတိုက်ခိုက်မှုဖြစ်နိုင်သည့် အန္တရာယ်ကို တုံ့ပြန်သည့်အနေဖြင့် ဈေးဆိုင်တချို့ ပိတ်ထားကြကြောင်း ဒေသခံတစ်ဦးက ပြောဆိုသည်။
ဟိုယဘက်တွင်မူ MNDAA က ဘန်ကာများကို အခိုင်အမာပြန်တည်ဆောက်နေသည် ဟု ကားနှင့် ဖြတ်လာသူများက အတည်ပြု ပြောဆိုသည်။
စစ်ကောင်စီက လေယာဥ်ဖြင့် တိုက်ခိုက်လာနိုင်၍ ဒေသအတွင်းနေထိုင်သူများနှင့် သွားလာနေသူများအနေနှင့် အမာခံနယ်မြေများ၊ ရုံးများ၊ မြို့စောင့်စစ်ဆေးရေးဂိတ်များ၊ အခြေစိုက်စခန်းများ၊ ဘုရားကျောင်းများနှင့် အရာရှိများ၏ နေအိမ်များနှင့် ဝေးဝေးနေရန် ဒေသခံများမှ အချင်းချင်း သတိပေးနေကြကြောင်း သိရသည်။
စစ်ကောင်စီက ၎င်းတို့ တောင်းဆိုချက်များ မလိုက်လျောလျှင် ပြည်သူလူထုကို ဦးတည်တိုက်ခိုက်မည် ဟူသော ခြိမ်းခြောက်၊ လုပ်ဆောင်မှုများ လုပ်လေ့ရှိပြီး မနေ့ညကလည်း မိုးကုတ်မြို့ နှင့် မန်ဝိန်းကြီးတို့ကို လေကြောင်းတိုက်ခိုက်မှု ပြုလုပ်ခဲ့သည်။
“စိုးထိတ်မှု မလွန်ကဲစေဖို့နှင့် သတိ မလျော့ရဲစေဖို့ နှိုးဆော်အပ်ပါသည် ခင်ဗျာ” ဟု ကွတ်ခိုင်မြို့နေသူ တစ်ဦးကလည်း အကြံပြုပြောဆိုသည်။
စစ်ပြေငြိမ်းရေး သဘောတူညီမှုရယူထားသည့် MNDAA ထိန်းချုပ်ရာ ကွတ်ခိုင်မြို့ကို စစ်ကောင်စီက ဇူလိုင် ၃၀ရက်က ဗုံးကြဲခဲ့ပြီး ကလေးငယ်အပါအဝင် ၅ဦး သေဆုံးခဲ့သည့်အပေါ် MNDAA က ပြင်းပြင်းထန်ထန် ကန့်ကွက်ပြောဆိုထားသည်။
လားရှိုးတွင် ပြုလုပ်သည့် တွေ့ဆုံပွဲတွင် စစ်ကောင်စီဘက်က ဟိုယလမ်းမှ MNDAA တပ်များ ပြန်လည်ဆုတ်ခွာပေးရန်နှင့် သိန္နီမြို့ ပြန်ပေးရေးတို့ကို တောင်းဆိုခဲ့ကြောင်း သတင်းရင်းမြစ်များထံမှ သိရသည်။
လားရှိုးတွေ့ဆုံပွဲ အချက်အလက်များကို တွေ့ဆုံပွဲတွင်ပါဝင်သူများမှ တစုံတရာ ထုတ်ပြန်ခြင်းမရှိသော်လည်း ဒေသခံလူထုများကမူ အဆင်မပြေမှု ကြောင့် ဖြစ်ပေါ်လာနိုင်သည့် လေကြောင်းတိုက်ခိုက်မှုများကို ယခုကတည်းက ရှောင်ရှားနေကြပြီ ဖြစ်သည်။
မဟာ
#MeKongNews
#MNDAA
#စစ်ကောင်စီ
#၁၀၂၇စစ်ဆင်ရေး
#တတိယလှိုင်း
#စစ်ရေးပြင်
#လားရှိုး
#ကွက်ခိုင်
#သိန္နီ
#ဟိုယ
