မဲခေါင်၊ ဇူလိုင် ၂၈

ရှမ်းပြည်အရှေ့ပိုင်း၊ မိုင်းတုံမြို့အဝင် တံတားချဥ်းကပ်လမ်း ချောင်းရေတိုက်စားပြီး ပြိုကျသဖြင့် အသွားအလာများ ပိတ်ပင်ထားရကြောင်းဒေသခံများထံက သိရသည်။

ယမန်နေ့ ဇူလိုင်လ၂၇ရက်၊ ညနေပိုင်းက မိုင်းတုံမြို့ကို ဖြတ်သန်းစီးဆင်းနေသည့် နမ့်တုံချောင်းရေ တိုးလာသဖြင့် မိုင်းတုံမြို့ဘက် တံတားချဥ်းကပ်လမ်း မြေသားများပြိုကျကာ ဂလှိုဏ်ဖြစ်ပေါ်လာ၍ တံတားပေါ် ယာဉ်များ အသွားအလာကို ယာယီပိတ်ပင်လိုက်ရကြောင်း သိရသည်။

“ကားငယ်တွေတော့ မြို့နားတပ်တွေထဲက ဖြတ်ကြတယ်။ တောင်ပေါ်ဖြစ်ပြီး အဝေးက ပတ်ရတာပေါ့။ ဟိုတုန်းက မြို့ကွင်းလမ်းပါပဲ။ ကုန်ကားတွေကတော့ ကုန်ကားအငယ်တွေနဲ့ ကဲ့သယ်ရတာပေါ့။ လုပ်သားခပိုလာတော့ ကုန်စျေးနှုန်းထပ်တက်တာပေါ့လေ။ ဒါလည်း ရေတကယ်ကြီးရင် သွားလို့ မရတော့ပါဘူး” ဟု မြို့မရပ်ကွက်နေသူတစ်ဦးက မဲခေါင်ကို ယနေ့ဇူလိုင် ၂၈ရက်တွင် ပြောသည်။

ဇူလိုင် ၂၄ရက်နေ့ကတည်းက နေ့ရောညပါ ဆက်တိုက်ရွာသွန်းနေသည့် မိုးကြောင့် မိုင်းတုံမြို့ကို ဖြတ်သန်းစီးဆင်းနေသည့် နားညုချောင်း၊ နမ့်တုံ နှင့်နမ့်ဟောင်ခယ်ချောင်းများသည် တောင်ကျရေများ ကျဆင်းပြီး ချောင်းရေလျှံခြင်းများ ဖြစ်ပွားနေခြင်းဖြစ်ကြောင်း သိရသည်။

ရေကြီးရေလျှံမှုကြောင့် မိုင်းတုံမြို့မကွင်းရှိ စပါး ဧက၁၀၀ခန့် ရေနစ်မြုပ်နေသလို တံတားများ ရေထဲမျောပါပြီး မြို့ရေကြီးမည်ကို ဒေသခံများစိုးရိမ်နေကြကြောင်း သိရသည်။

“မနှစ်က စက်တင်ဘာမှ ကြီးတာ၊ တံတားတွေကျိုး၊ ဆက်သွယ်ရေးတိုင်တွေလဲ၊ လူသေ၊ ပစ္စည်းတွေ ရေမြုပ်ဆုံးရှုံးခဲ့ရလို့။ ခုက ဇူလိုင်လ မိုးအစပဲ ရှိသေးတာ ရေကြီးမှာ ကြောက်နေကြတယ်” ဟု ဝမ်နားနေသူတစ်ဦးက ပြောသည်။

တောင်ကြီး၊ တာဆန်းဘက်မှ အဝင်ကားလမ်းတွင် ဝမ်နားတံတား၊ မီးသတ်တံတားနှင့် မြို့ထိပ်တံတား သုံးခုရှိရာ ယမန်နှစ်ရေဘေးတွင် မီးသတ်တံတား အခိုင်အမာကွန်ကရစ်တံတား ရေမျော ပျက်စီးခဲ့ရသလို မြို့ထိပ်တံတားလည်း နိမ့်ကျပျက်စီးခဲ့ကြသဖြင့် ဘေလီသံဘောင်များဖြင့် အစားထိုးပြင်ဆင်ထားခဲ့ကြရသည်။

ယခုတွင် နမ့်တုံချောင်း ရေကြီးရေလျှံမှုကြောင့် မီးသတ်တံတားပြင်ဆင်စဥ်က ယာယီအသုံးပြုခဲ့သည့် သစ်သားတံတားလည်း ရေတိုက်စားပျက်စီးသွားခဲ့ရပြီဖြစ်သည်။

မိုင်းတုံ၊ မိုင်းဆတ်ခရိုင်နှစ်ခုမှာ ပြည်တွင်းစားသုံး ကုန်များကို တောင်ကြီးမှ ကုန်သွယ်သုံးစွဲကြရသဖြင့် တောင်ကြီး-လွယ်လင်-နမ့်စန်-လင်းခေး-မိုးနဲ-မိုင်းပန်-တာဆန်း ကုန်သွယ်လမ်းမကြီး ပျက်စီးမှု ဖြစ်တိုင်း ဒေသတွင်းကုန်စည်စီးဆင်းမှု အခက်ကြုံကြရကြောင်း သိရသည်။

#MeKongNews
#မိုင်းတုံ
#နမ့်တုံချောင်း
#ရေကြီး
#တံတားချဉ်းကပ်လမ်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)