– ဦးဝင်းနိုင် (မိုးလေဝသပညာရှင်)

တောင်တရုတ်ပင်လယ်မှ အပူပိုင်းမုန်တိုင်း ဝီဖာ WIPHA သည် တိုင်ဖွန်းမုန်တိုင်း အဆင့်အထိ မရောက်ရှိနိုင်ပဲ ဗီယက်နမ်နှင့် လာအိုနိုင်ငံများမှ တဆင့် ရွေ့လျားဝင်ရောက်လာနိုင်သည့် မုန်တိုင်း အကြွင်းအကျန်များကြောင့် ရှမ်းပြည်အတွင်း မိုးရွာသွန်းနိုင်ချေမှာ မူလကြိုတင် ခန့်မှန်းချက်များထက် လျော့နည်းနိုင်ပါသည်။

ထို့အပြင် ဇူလိုင် ၂၂ ရက်မှ ၂၄ ရက်အတွင်း ဖြစ်ပေါ်လာနိုင်သည့် ဘင်္ဂလားပင်လယ်အော်မှ လေပွေလှိုင်းများကြောင့်လည်း အရှေ့ဘက်မှ ရွေ့လျားဝင်ရောက်လာမည့် မုန်တိုင်းအကြွင်းအကျန်များကို လျော့နည်းစေနိုင်မည် ဖြစ်သည်။

ယခုတပတ်အတွင်း ရှမ်းပြည်အတွင်း မိုးရွာနိုင်မည့် အခြေအနေများကို လေ့လာကြည့်ရာတွင်

• ရှမ်းပြည်တောင်ပိုင်းတွင် နေ့စဉ် ၂၄ နာရီအတွင်း မိုးရေချိန် ၃၀ မီလီမီတာ(၁.၂ လက်မခန့်) ရွာနိုင်ပြီး မိုးအသင့်အတင့်သာ ရွာနိုင်ဖွယ် ရှိသည်။

• ရှမ်းပြည်မြောက်ပိုင်းတွင် နေ့စဉ် ၂၄ နာရီအတွင်း မိုးရေချိန် ၂၀ မီလီမီတာဝန်းကျင်(၀.၈ လက်မ – ၁ လက်မအောက်)ရွာနိုင်ပြီး မိုးအသင့်အတင့် ရွာနိုင်ခြေ ရှိသည်။

• ရှမ်းပြည်အရှေ့ပိုင်းတွင်မူ နေ့စဉ် မိုးရေချိန် ၃၀ မီလီမီတာ နှင့် ဇူလိုင်လ ၂၃ ရက်တွင်မူ မိုးရေချိန် ၄၀ မီလီမီတာအထက်(၁.၅ လက်မ) ရွာသွန်းနိုင်ပြီး မိုးအသင့်အတင့်ရွာနှုန်း အနည်းငယ်ပိုနိုင်သည်။

• လာမည့် ၇ ရက်အတွင်း ရရှိနိုင်မည့် မိုးရေချိန်ပမာဏမှာ ရှမ်းပြည်မြောက်ပိုင်းနှင့် အရှေ့ပိုင်းတို့ရှိ တရုတ်၊ လာအို နှင့် ထိုင်းနိုင်ငံနယ်နိမိတ်များအနီးရှိ ဒေသများတွင် မိုးရချိန် ၆ လက်မ မှ ၈လက်မ အထက်အထိ ရရှိနိုင်သည်။

အရှေ့ဘက်နယ်စပ်နှင့် ကွာဝေးသည့် ရှမ်းပြည်ဒေသအများစုတွင်မူ လာမည့် ၇ ရက်အတွင်း မိုးရေချိန် ၂ လက်မ မှ ၃ လက်မ အထိသာ ရှိနိုင်သည်။

ရှမ်းပြည်အရှေ့ပိုင်းသည် ယခုတပါတ်အတွင်း အနောက်တောင်ဘက်မှ လေတိုက်နှုန်း အမြင့်ဆုံး အဖြစ် တနာရီ ၁၅ မိုင်မှ ၂၅ မိုင် ရှိနိုင်သည့်အတွက် သတိပြုမိရန် လိုသည်။

ရှမ်ပြည်၏ အမြင့်ဆုံး ပျမ်းမျှ နေ့အပူချိန် အနေနှင့် ၂၉°C ရှိကာ အနိမ့်ဆုံး ပျမ်းမျှ ညအပူချိန် မှာ ၂၀°C ခန့် ရှိနိုင်သည့်အပြင် ဒေသအလိုက် လေထုစိုထိုင်းဆနှုန်းမှာ ၆၀% မှ ၁၀၀% အကြား ကွာခြားမှု ရှိနိုင်သည်။

#MeKongNews
#ရှမ်းပြည်
#မိုးလေဝသခန့်မှန်းချက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)