မဲခေါင်၊ ဇူလိုင် ၁၈
ရှမ်းပြည်တောင်ပိုင်းသို့ ရောက်ရှိနေကြသည့် ရှမ်းမြောက်မှ စစ်ဘေးရှောင်များကို စစ်ကောင်စီ ၏ ထွေအုပ်မှ တဆင့် ထောက်ပံကြေးပေးသည် ဆိုသော်လည်း အများစု မသိရှိကြသလို ရရှိခြင်းလည်းမရှိ ဟု စစ်ဘေးရှောင်တချို့က ဆိုသည်။
ရှမ်းမြောက်ဒေသမှ စစ်ဘေးရှာင်များအနေနှင့် မှတ်ပုံတင်(သို့) အိမ်ထောင်စုစာရင်းပြသကာ တစ်ဦးလျှင် ကျပ် ၄၀၀၀၀ နှုန်း၊ မိသားစုဝင် ၅ ဦးရှိလျှင် ကျပ် ၂ သိန်းနှုန်းထောက်ပံခြင်းကို ၂၀၂၅ ခုနှစ် ဇူလိုင်လမှ နှစ်ကုန်ပိုင်းအထိ လုပ်ဆောင်မည်ဟု သိရှိရသည်။
စစ်ကောင်စီ၏ ထောက်ပံကြေးရယူလိုပါက မိမိနေထိုင်ရာ ရပ်ကွက်၊ ကျေးရွာအုပ်ချုပ်ရေးမှူးများမှတဆင့် ထွေအုပ်ရုံးထံ စာရင်းတင်ရမည်ဖြစ်ပြီး ယင်းမှတဆင့် အကြောင်းကြားပေးအပ်နေခြင်းဟု လုပ်ဆောင်ဖူးသူတစ်ဦးက ဆိုသည်။
“ပေးတာက ကြာပါပြီ။ ဒါပေမယ့် ကိုယ်ကတော့ မရဘူး။ မနေ့က ထုတ်တဲ့နေရာ လိုက်ရှာ အလုပ်ပျက်ခံ၊ ဆီကုန်ခံတာ နှစ်သောင်းပဲ ပြန်ကုန်တော့မှာ။ ကိုယ့်နာမည်က မပါလာသေးဘူးတဲ့” ဟု ထောက်ပံကြေးရရှိရန် လျှောက်ထားဖူးသူတစ်ဦးက ပြောဆိုထားသည်။
ရှမ်းမြောက်ဒေသမှ စစ်ဘေးရှောင်များကို စစ်ကောင်စီ၏ ထွေအုပ်ရုံးနှင့် ရပ်ကျေး အုပ်ချုပ်ရေးမှူးများမှတဆင့် လုပ်ဆောင်ပေးသည်ဟု ဆိုသော်လည်း အများစု မသိရှိကြသလို နယ်၊ ရွာဘက်ရှိ စစ်ဘေးရှောင်များမှာ အထောက်အပံ ရဖူးခြင်း မရှိဟု ပြောဆိုထားကြသည်။
စာရွက်စာတမ်းများ အပြည့်အစုံနှင့် တင်ပြသော်လည်း ထွေအုပ်ရုံးက လူတစ်ရာစာရင်းပြပြီး လူဆယ်ဦးခန့်ကိုဟာ ဟန်ပြ ဓါတ်ပုံရိုက်တင်ကြသည်က များပြီး စစ်ဘေးရှောင်အများစုမှာ မရရှိကြဟု စစ်ရှောင်တစ်ဦးက ဆိုသည်။
၂၀၂၃ ခုနှစ်မှ စတင်ကာ ရှမ်းမြောက်စစ်ဘေးကြောင့် ရှမ်းပြည်တောင်ပိုင်း၊ တောင်ကြီးမြို့သို့ တိမ်းရှောင်လာကြရသည့် စစ်ဘေးရှောင်အများအပြား ရှိနေသော်လည်း စစ်ဘေးရှောင်ထောက်ပံကြေးရရှိဖူးသူ မရှိသလောက် နည်းပါးနေပြီး တချို့ဆိုလျှင် ရှမ်းမြောက်သို့ပင် ပြန်လည်အခြေချရောက်ရှိနေထိုင်နေကြပြီ ဟု သိရသည်။
စစ်ဘေးရှောင်များကို စာရင်းကောက်ယူခြင်း၊ အမည်စာရင်းတင်သွင်းခိုင်းခြင်းတို့ကို လုပ်ဆောင်ခိုင်းသော်လည်း နှစ်ကြာသည့်အထိ စစ်ကောင်စီ၏ ထောက်ပံကြေး ရရှိဖူးခြင်း မရှိကြသလို အများစုမှာ သိရှိခြင်းပင် မရှိဟု စစ်ဘေးရှောင်များက ပြောဆိုထားသည်။
ဖေသန်း
#MeKongNews
#စစ်ဘေးရှောင်
#ရှမ်းမြောက်
#တောင်ကြီး
#ထောက်ပံကြေး
#ရှမ်းတောင်
#စစ်ကောင်စီ
