မဲခေါင်၊ ဇူလိုင် ၁၁
တရုတ်-မြန်မာ နယ်စပ်ရှိ ရွှေလီမြို့တွင် ကျောက်စိမ်းအရောင်းအဝယ်လုပ်ငန်းတစ်ခုမှ တရုတ်ယွမ်ငွေ ၁၀ ဘီလီယံခန့် ငွေကြေး လိမ်လည်မှု ပြီးခဲ့သည့်ရက်ပိုင်းက ဖြစ်ပွားခဲ့ကြောင်း ကျောက်စိမ်းလုပ်ငန်းရှင်တစ်ချို့ထံမှ သိရသည်။
လိမ်လည်သည့် ကျောက်စိမ်းကုမ္ပဏီသည် တရုတ်နိုင်ငံအတွင်း ဂျီပေါဟု ခေါ်ကြသည့် We Chat နှင့် ရောင်းချသည့် လုပ်ငန်းတစ်ခု ဖြစ်ပြီး လုပ်ငန်းရှင်အများအပြားက ကျောက်စိမ်းများကို ရောင်းချပေးရန် အပ်နှံထားကြသည်ကို လိမ်လည်ထွက်ပြေးခြင်း ဖြစ်ကြောင်း၊ ကျောက်စိမ်းဆုံးရှုံးသူများရှိသလို ငွေကြေးအရလည်း ဆုံးရှုံးသူများရှိကြောင်း လုပ်ငန်းရှင်တစ်ဦးကပြောသည်။
“ရွှေလီမှာ ဂျီပေါတွေ ငွေလိမ်သွားတာပါ။ ရွှေလီမှာ အရင်တစ်မှု မပြီးသေးဘူး။ နောက်ထပ် ဖြစ်ပြန်ပြီ။ စျေးကွက်ကတော့ ရေခဲတုံး ဖြစ်အုံးမယ်” ၎င်းက ဆိုသည်။
ယင်းကုမ္ပဏီတွင် မြန်မာလူမျိုး ကျောက်စိမ်းလုပ်ငန်းရှင်များက ရောင်းချရန် ပေးပို့ထားသည့်ကျောက်စိမ်းများ ပါဝင်နိုင်ဖွယ်ရှိသော်လည်း အတိအကျ မသိရှိရသေးကြောင်း ကျောက်စိမ်းလောကမှ လုပ်ငန်းရှင်တစ်ချို့က ပြောဆိုသည်။
ရွှေလီမြို့ရှိ လိမ်လည်ခံရသူအများစု ယင်းကုမ္ပဏီ၏ ရုံးခန်းရှိရာနေရာသို့ ဇူလိုင်လ ၉ ရက်နေ့ ညကတည်းက စုရုံးရောက်ရှိနေကြပြီး မြန်မာလူမျိုးတချို့လည်း ပါဝင်နေသည်ကို ရုပ်သံတချို့တွင် တွေ့မြင်ရသည်။
မန္တလေးမြို့ရှိ ကျောက်စိမ်းကုန်သည်များက တင်ပို့ထားသည့်ကျောက်စိမ်းများလည်း လိမ်လည်ခံရသည့် စာရင်းတွင် ပါဝင်နိုင်သော်လည်း လက်ရှိအချိန်ထိ အတိအကျ မသိရှိရသေးပေ။
ကျောက်စိမ်းကို ဖားကန့်ဒေသမှ တဆင့် မန္တလေး၊ မူဆယ် မြို့၊ ယင်းမှတဆင့် တရုတ်ဘက်ခြမ်းရှိ ရွှေလီမြို့သို့ တင်ပို့ရောင်းချခြင်း ဖြစ်ကာ ကျောက်စိမ်းကုမ္ပဏီများ၊ကျောက်စိမ်း WeChat Live ရောင်းချသည့်လုပ်ငန်းများအပါအဝင် ကျောက်စိမ်းရောင်းချသည့် ဈေးရုံ ၅ ခုထက် မနည်း ရှိ၍ တရုတ်နိုင်ငံတွင် ကျောက်စိမ်းမြို့တော် ဟု လူသိများသည့်နေရာ ဖြစ်သည်။
ဖေသန်း
#MeKongNews
#ရွှေလီမြို့
#ကျောက်စိမ်းလုပ်ငန်း
#ဂျီပေါ
#မန္တလေး
ပုံအညွှန်း – လိမ်လည်ခံရသူများ ကုမ္ပဏီရုံးရှေ့တွင် စုဝေးနေကြစဉ်
