မဲခေါင်၊ ဇူလိုင် ၉ ရက်
ရှမ်းပြည်တောင်ပိုင်းအတွင်းရှိ တိုင်းရင်းသားလူမျိုးတိုင်း ကဏ္ဍစုံတွင် ကိုယ်ပိုင်ပြဌာန်းခွင့် ရရှိရေးနှင့် ဖက်ဒရယ်စံနှုန်းများရရှိရေးအတွက် ရှမ်းပြည်တောင်ပိုင်း အမျိုးသားများ လွတ်မြောက်ရေး အဖွဲ့အစည်း-SSNLOကို တည်ထောင်လိုက်ကြောင်း ဇူလိုင်လ ၉ ရက်နေ့တွင် ထုတ်ပြန်ထားသည်။
SSNLO သည် တော်လှန်ရေး အင်အားစုများ၊ နိုင်ငံရေးအင်အားစုများ၊ အရပ်ဘက် အသိပညာရှင်၊ အတတ်ပညာရှင်များ စုပေါင်း ဖွဲ့စည်းထားသော နိုင်ငံရေး အဖွဲ့အစည်းတခုဖြစ်ကာ ဗဟိုကော်မတီ ၁၉ ဦး ပါဝင်သည် ဟု SSNLO ၏ အတွင်းရေးမှူးကိုစောက ပြောသည်။
“နွေဦးတော်လှန်ရေးကနေ ပေါ်ပေါက်လာတဲ့ တိုင်းရင်းသားတော်လှန်ရေးအဖွဲ့တွေနဲ့ နိုင်ငံရေးအဖွဲ့များကြား နိုင်ငံရေးဘုံ သဘောတူညီချက် ကနဦးထွက်ပေါ်လာဖို့အတွက်လည်း ရည်ရွယ်ထားပါတယ်” ဟု ၎င်းက ပြောသည်။
SSNLO ၏ အဓိက နိုင်ငံရေး ရည်ရွယ်ချက်မှာ စစ်အာဏာရှင် ပြုတ်ကျရေး နှင့် ဖက်ဒရယ် ပြည်ထောင်စုကို တည်ဆောက်ရေး ဖြစ်သည်ဟု ဗဟိုကော်မတီက ဆိုသည်။
လုပ်ဆောင်ချက်များအနေဖြင့် ရှမ်းပြည်တောင်ပိုင်း အတွင်းရှိ နိုင်ငံရေး/စစ်ရေး ဖော်ဆောင်နေကြသော အစုအဖွဲ့များအကြား နိုင်ငံရေး ဘုံသဘောတူညီချက် များ ပေါ်ထွန်းလာစေရန် ကြိုးပမ်းဆောင်ရွက်သွားမည် ဟု ဖော်ပြထားသည်။
တော်လှန်ရေးတွင် နည်းလမ်းမျိုးစုံ ဖြင့် ပါဝင် ဆင်နွှဲနေသော အင်အားစု အသီးသီးအား ထောက်ခံ အားပေးသော နိုင်ငံရေး အဖွဲ့အစည်းတခု အနေဖြင့်လည်း ခိုင်ခိုင်မာမာ ရပ်တည် သွားမည်ဟု ဆိုသည်။
SSNLO အနေဖြင့် တော်လှန်ရေး အင်အားစုများ စုစည်းခြင်း၊ မဟာမိတ် ပြုလုပ်ခြင်းဖြင့် နိုင်ငံရေး အရွေ့များမှတဆင့် ဘုံသဘောတူညီချက် များ ရရှိအောင် ကြိုးပမ်း ဆောင်ရွက်သွားမည်ဖြစ်သည်။
နွေဦးတော်လှန်ရေး အဆုံးသတ် အောင်မြင်ပြီးချိန် အသွင်ကူးပြောင်းရေးကာလ အစီအမံ များ ဆောင်ရွက် ရာတွင်လည်း SSNLO အနေဖြင့် နိုင်ငံရေး အဖွဲ့အစည်း တခုအနေဖြင့် ရပ်တည်ကာ နိုင်ငံရေး လှုပ်ရှားမှုများကို ဆက်လက်လုပ်ဆောင်သွားမည် ဟုလည်း ဖော်ပြထားသည်။
ဖေသန်း
#MeKongNews
#ရှမ်းတောင်
#SSNLO
#ဖက်ဒရယ်ပြည်ထောင်စု
#တော်လှန်ရေး
