မဲခေါင်၊ ဇွန် ၂၅
ကမ္ဘာ့ဆန်ဈေးကျဆင်းနေပြီး ဝယ်လိုအားလျော့လာနေချိန် မြန်မာနိုင်ငံ ဆန်စပါးအသင်းချုပ်သည် တရုတ်ကို ပိုမိုတင်ပို့နိုင်ရန် တရုတ်သံအမတ်နှင့် အဖွဲ့ကို ဆွဲဆောင်စည်းရုံးနေသည်ဟု သိရသည်။
လက်ရှိ ကမ္ဘာ့ဆန်ဈေးကျဆင်းနေသလို ဝယ်လိုအား လျော့ကျနေပြီး တရုတ်-မြန်မာ နယ်စပ်ကုန်သွယ်ရေးမှာလည်း မရှိသလောက် ဖြစ်နေပြီး မြန်မာနိုင်ငံအပေါ် ILO မှ Article 33 ချမှတ်မှုတို့ကြောင့် ဥရောပဈေးကွက်ကို ဆန်နှင့် ဆန်ကွဲတင်ပို့မှုအပေါ် အကျိုးသက်ရောက်လာနိုင်ချိန်တွင် တရုတ်ကို တင်ပို့ခွင့်ရရှိရန် ပိုကြိုးစားလာခြင်းဖြစ်သည်။
မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံ သံရုံးမှ Mr. Zheng Zhihong နှင့် Ms. Qiao Li ဦးဆောင်သော အဖွဲ့ဝင် ၂၉ ဦးပါဝင်သည့် China Delegation အဖွဲ့သည် ဇွန်လ ၂၀ ရက်က သီလဝါ စက်မှုဇုန်ရှိ Good Brothers(United Agri) တန် ၅၀၀ ကျ ဆန်စက်သို့ လေ့လာရေးခရီးစဉ်အဖြစ် လာရောက်ခဲ့ကြောင်း မြန်မာနိုင်ငံဆန်စပါးအသင်းချုပ်က ထုတ်ပြန်ထားသည်။
တရုတ်သံအမတ်နှင့် အဖွဲ့အား ဆန်စပါးလုပ်ငန်းဆိုင်ရာအခြေအနေများ၊ ကုန်သွယ်မှုနှင့် ရင်းနှီးမြှုပ်နှံမှု တိုးမြှင့်ဆောင်ရွက်နိုင်ရေး အလားအလာများအပေါ် ဆွေးနွေးညှိနှိုင်းခဲ့ကြောင်း ဖော်ပြထားသည်။
တရုတ်နှင့် မြန်မာနိုင်ငံများအကြား ဆန်လုပ်ငန်းကဏ္ဍတွင် ပူးပေါင်းဆောင်ရွက်မှု တိုးတက်လာမှုကို ပြသနေသလို အစားအစာ လုံခြုံရေးနှင့် ပူးတွဲတိုးတက်မှုကို ဖော်ပြသည့် အစိတ်အပိုင်းတခုလည်း ဖြစ်သည်ဟု မြန်မာနိုင်ငံ ဆန်စပါးအသင်းချုပ် ဦးရဲမင်းအောင်က ဖော်ပြထားသည်။
ဆန်စပါးအသင်းချုပ်၏ ထုတ်ပြန်ချက်များအရ ၂၀၂၅-၂၆ ဘဏ္ဍာရေးနှစ် ပြည်ပ ဆန်တင်ပို့ရာတွင် ဖိလစ်ပိုင်ကို အများဆုံး တင်ပို့ထားပြီး တရုတ်က ဒုတိယနေရာတွင် ရှိနေသလို ဆန်ကွဲတင်ပို့ရာတွင်လည်း ဘလ်ဂျီယံကို အများဆုံး တင်ပို့ကာ တရုတ်က ဒုတိယနေရာတွင် ရှိနေသည်။
တရုတ်-မြန်မာ နယ်စပ်ကုန်သွယ်ရေးလမ်း ပိုမိုကောင်းမွန်လာပြီး နယ်စပ်မှ တဆင့် ဆန်တင်ပို့မှု အားကောင်းလာလျှင် ပြည်တွင်းဆန်တင်ပို့ရောင်းချမှု ပြန်ကောင်းလာနိုင်ကြောင်း ကုန်သည်များက သုံးသပ်သည်။
“တရုတ်-မြန်မာ နယ်စပ်လမ်းကြောင်းတွေကောင်းပြီး တရုတ်ဝယ်လိုအားများလာပြီး ပို့ကုန်ရငွေအပြောင်းအလဲ ကိုယ့်ဘက်ပါလာမယ်ဆိုရင်တော့ စျေးပြန်တတ်နိုင်ပါတယ်” ဟု ဆန်ကုန်သည်တစ်ဦးက ပြောသည်။
တရုတ်မှ မြန်မာဆန်နှင့် ဆန်ကွဲကို မဝယ်ယူလျှင် လာမည့် ဩဂုက်လနှင့် စက်တင်ဘာလတွင် ဆန်သိုလှောင်သူများက ဂိုထောင်ရှင်း ထုတ်ရောင်းနိုင်ပြီး ဈေးပိုမို ကျဆင်းနိုင်ခြေရှိနေကြောင်း သတိပေးထားသည်။
မြန်မာနိုင်ငံသည် ၂၀၂၅-၂၆ ဘဏ္ဍာရေးနှစ် ဧပရယ်လနှင့် မေလ အတွင်း ပြည်ပကို ဆန်တန်ချိန် ၄ သိန်းကျော် တင်ပို့ထားပြီး ပို့ကုန်ရငွေ အမေရိကန်ဒေါ်လာ ၁၄၂ သန်း ရရှိထားသည်။
ဖေသန်း
#MeKongNews
#ဆန်တင်ပို့မှု
#ဆန်ကွဲတင်ပို့မှု
#တရုတ်နိုင်ငံ
#ဖိလစ်ပိုင်
#ဆန်စပါးအသင်းချုပ်
