မဲခေါင်၊ ဇွန် ၁၄
ရှမ်းပြည်တောင်ပိုင်း၊ တောင်ကြီးမြို့ပေါ်ရှိ ဘုန်းကြီးကျောင်းများ၊ သီလရှင်ကျောင်းများတွင် သုံးစွဲနေသည့် ယာဥ်များစာရင်းကို ရတနာသီရိရပ်ကွက်ရှိ ဓမ္မဝိဒူ အုတ်ဖိုကျောင်းမှတဆင့် မြို့နယ်သံဃာ့နာယကအဖွဲ့ရုံးထံသို့ လာမည့် ဇွန်လ ၁၇ရက်နေ့အမီ ပေးပို့ကြရန် ဥက္ကဌဆရာတော်က ဇွန်လ ၁၂ ရက်က စာဖြင့် ကျောင်းတိုက်အသီးသီးသို့ ပေးပို့လာကြောင်း သံဃာအသိုင်းအဝိုင်းမှ သိရသည်။
ယင်းစာပါ ပေးပို့ရမည့် အချက်များမှာ ဘွဲ့တော်၊ ဖုန်းနံပတ်၊ သာသနာဝင်အမှတ် မိတ္တူ၃စုံ၊ နေရပ် လိပ်စာ၊ မော်တော်ယာဥ် အမျိုးအစား၊ မော်ဒယ်၊ အရောင်၊ ယာဥ်အမှတ်၊ မော်တော်ယာဥ် ဓာတ်ပုံ၊ ရှေ့၊ နောက်၊ ဘေး တို့ဖြစ်ကြောင်း သိရသည်။
“တောင်းတဲ့ပုံစံက လိုင်စင်ရယ်၊ အလွတ်ရယ် မကွဲပြားဘူး။ ပြီးတော့ စီးယာဥ်၊ လုပ်ငန်းသုံးယာဥ်မပါသလို ရှိသမျှအားလုံးပေးပို့ခိုင်းတာပဲ။ အလွတ်တွေကို လိုင်စင်ပေးမလား၊ သိမ်းဖို့လား မပြောတတ်ဘူး။ ကျောင်းကြီးတွေက လိုင်စင်ကားတွေရှိတာများပေမယ့် ဒကာတွေလှူတဲ့ အလွတ်တွေလည်းရှိကြတယ်” ဆရာတော်တစ်ပါးက မိန့်သည်။
သာရေး၊ နာရေးကိစ္စများ ကြွရောက်ဆောင်ရွက်ရာ၌ ခေတ်အခြေအနေအရ လမ်းလျှောက်၍ မဖြစ်သလို လက်ရှိလိုင်စင်မဲ့ယာဥ်များ သိမ်းခံရသည့်ကာလတွင် ဒကာများမှ ပင့်ဆောင်ကြွချီစရာ ယာဥ်များမရှိတော့သည်ကလည်း သာသနာ့လုပ်ငန်းများ ခရီးမတွင်ဖြစ်နေရသည်ဟု ယင်းဆရာတော်က မိန့်သည်။
အခြား ဦးဇင်းတစ်ပါးကမူ “ဟုတ် မဟုတ်တော့ မသိဘူး။ မြို့နယ်သံဃာ့နာယက အဖွဲ့၊ တပ်နယ်မှူးတို့ရဲ့ထောက်ခံချက်၊ စီးနင်းတဲ့ကိုယ်တော်ရဲ့ဝန်ခံချက်တွေနဲ့ မြို့ပေါ်သွားလာခွင့် ပြုမယ်ကြားတယ်။ နေ့စဥ်ဆွမ်းချိုင့် အပို့၊ အယူကအစ ယာဥ်တွေလိုတယ်၊ ပြီးတော့ကျောင်းဝန်းထဲ အခြားအလွတ်ကားတွေ မထားဖို့၊ (ထားရင်) ဖမ်းဆီးမယ်တွေကြားတယ်”ဟု ဆိုသည်။
တောင်ကြီးမြို့ပေါ်ရပ်ကွက်၂၂ရပ်ကွက်ရှိရာ တောင်ကြီးမြို့နယ်အတွင်း ဘုန်းကြီးကျောင်းပေါင်းမှာ တောင်ကြီးတွင် ၁၀၃ ကျောင်း၊ အေးသာယာတွင် ၂၈ ကျောင်း၊ ရွှေညောင်တွင် ၃၁ ကျောင်းနှင့် ကျောက်တလုံးတွင် ၂ကျောင်းအပြင် ကျေးရွာအုပ်စု ၂၀၀၌ ရွာကျောင်းများရှိနေရာ စုစုပေါင်း မြို့နယ်ချုပ် ၃၆၄ ကျောင်းရှိပြီး ဝါဆို သံဃာစာရင်းမှာသံဃာ ၂၇၀၀ ပါးကျော်နှင့် သာမဏေ ၆၉၀၀ ပါးကျော် ရှိကြောင်း သိရသည်။
မွန်ပြည်နယ်တွင်မူ ဘုန်းကြီးကျောင်းနှင့်သီလရင်ကျောင်းများသို့ လိုင်စင်မဲ့ကား ဆိုင်ကယ်များကို စီးနင်းခြင်း၊ လက်ဝယ်ထားရှိခြင်း မရှိစေရေး မော်လမြိုင် သံဃာ့နာယကအဖွဲ့မှ ဇွန်လ၄ရက်တွင် ထုတ်ပြန်ထားသည်။
ယခင် ဦးသိန်းစိန်အစိုးရလက်ထက်က သာသနာရေးယာဥ်များ ကို အဝါခံ RLG လိုင်စင်ကို အခမဲ့ပြုလုပ်ပေးခဲ့မှုရှိခဲ့သည်။
ယခု စစ်ကောင်စီ လက်ထက်တွင်မူ ရဟန်း၊ သံဃာနှင့် သာသနာ့နွယ်ဝင် သီလရှင်များသာမက ပြည်သူအများ မရှိမဖြစ် သုံးစွဲနေရသည့် လိုင်စင်မဲ့ကားနှင့်ဆိုင်ကယ်များကို ဥပဒေအကြောင်းပြကာတလကြမ်း သိမ်းဆည်းနေသည့်အတွက် ပြည်သူအများ ကိုယ်စိတ်ဆင်းရဲကြီးစွာဖြင့် ခံစားနေရသည်ကို ဖြေလျှော့ပေးစေနိုင်ကြောင်း ဆုတောင်းသည်ဟု အထက်အဆိုပါ ဆရာတော်က မဲခေါင်သတင်းဌာနသို့ မိန့်ကြားခဲ့သည်။
စစ်ကောင်စီဥက္ကဌ၏ နှုတ်ထွက်ပြောကြားချက်အပြီး နိုင်ငံတစ်ဝှမ်းတွင် လိုင်စင်မဲ့ကားနှင့်ဆိုင်ကယ်များကို ဇွန် ၁ ရက်နေ့က စတင် ဖမ်းဆီးနေခြင်းဖြစ်သည်။
မဟာ
#MeKongNews
#တောင်ကြီးမြို့နယ်
#ဘုန်းကြီးကျောင်း
#သီလရှင်ကျောင်း
#လိုင်စင်မဲ့ကား
#စစ်ကောင်စီ
#ဓမ္မဝိဒူအုတ်ဖိုကျောင်း
