မဲခေါင်၊ ဇွန် ၁၄

မိုး ၄ ရက်ဆက်တိုက် ရွာသွန်းမှုကြောင့် ဆည်ရေတက်ပြီး မိုးဗြဲရေကာတာကိုလည်း ပိတ်ထားသည့်အတွက် အင်းလေဒေသရှိ စပါးခင်းနှင့် မြေပဲခင်းများ ရေမြုပ်နေကြောင်း ဒေသခံများထံမှ သိရသည်။

ယခုရက်ပိုင်းအတွင်း ရှမ်းပြည်တောင်ပိုင်းတွင် မိုးများခြင်းကြောင့် တောင်ကြီးမှ ရေများ ကျီးဖြူကန်မှတဆင့် အင်းထဲသို့ဝင်ရောက်လာခြင်း၊ အင်းတောင်ဘက်ရှိ မှော်ဘီချောင်းတံတားအနီးတွင် အမှိုက်များ၊ ဗေဒါပင်ဒိုက်များ စုပြုံပိတ်မိနေချိန်တွင် မိုးဗြဲရေကာတာအား မဖွင့်ပေးခြင်းတို့ကြောင့် ဖြစ်ကြောင်း ဒေသခံများက ပြောသည်။

“မှော်ဘီဖက်မာပိတ်နေတယ်၊ ရေကျအောင်လဲလမ်းမရှင်းပေးဘူး၊ မနှစ်ကရေကြီးတုန်းက မိုးဗြဲရေကာတာ နည်းနည်းဖွင့်ပေးတော့ ရေကျသွားတာ၊ အခု မိုးဗြဲမှာ တိုက်ပွဲဖြစ်နေတော့ သူတို့ကိုရေလမ်းက လာတိုက်မှာစိုးလို့နဲ့တူတယ်” ဟု အင်းလေး ဒေသခံတောင်သူတစ်ဦးက ဆိုသည်။

ဆည်မြောင်းမှ တာဝန်ရှိသူများအနေဖြင့် ဒိုက်များ လာရောက်ဆယ်ပေးပြီး မိုးဗြဲရေကာတာအား ဖွင့်ပေးရန် တောင်သူများက လိုလားနေကြသည်။

အင်းလေးကန်ပတ်လည်ရှိ စပါးခင်းများနှင့် အနောက်ဖက်ရှိ မြေပဲခင်းများမှာ မေလကုန်ပိုင်းခန့် မှစတင်ကာ ရေမြုပ်ခဲ့ပြီး ဇွန်လ ၁၂ရက်၊ နံနက်တွင်မူ အင်းလေးဒေသရှိ စပါးခင်းအားလုံးနီးပါး ရေမြုပ်နေပြီဖြစ်သဖြင့် ယခုရက်ပိုင်းအတွင်း ရေမကျပါက မနှစ်ကလိုပင် ဆုံးရှုံးရမည်ဖြစ်ကြောင်း သိရသည်။

ညောင်ရွှေမြို့နယ်၊ အင်းလေးအနောက်ဖက်၊ အင်းတိန်လယ်ပြင်တွင် လယ်ဧက ၁၀၀ ကျော်ခန့်ရှိပြီး ရွှေအပ် စပါးအမျိုးအစား စိုက်ပျိုးထားကြရာ ပုံမှန်အတိုင်း ဇူလိုင်လမှသာ ရိတ်သိမ်းရမည်ဖြစ်ပြီး ယခုအခါ လယ်အားလုံးရေမြုပ် သွားပြီဖြစ်သဖြင့် ရေမြန်မြန်ကျပြီး စောစောရိတ်သိမ်းရတော့မည်ဖြစ်ကြောင်း သိရသည်။

“ရေဝင်တာမေလ ၂၀လောက်ကတည်းက၊ ခုရက်ထဲရေပြန်ကျရင်တော့ သိမ်းလို့ရသေးတယ်။ သူအချိန်ရောက်မှသိမ်းရင် တစ်ဧက တင်း၈၀လောက်ရတာ၊ အချိန်မရောက်ခင်သိမ်းတော့ ၁ဧကတင်း၅၀လောက်ပဲရမယ်” ဟု လယ်ပိုင်ရှင် အမျိုးသမီးတစ်ဦးက မဲခေါင်ကို ပြောပြသည်

ညောင်ရွှေမြို့အနီးက စပါးခင်းများလည်း ရေမမြုပ်မီ ရိတ်သိမ်းလိုက်ရသဖြင့် အရှုံးပေါ်နေကြောင်း သိရသည်။ ယခုနှစ်သည် ယခင်နှစ်များထက် မျိုစပါးနှင့် မြေသြဇာဈေး အလွန်တက်သဖြင့် တစ်ဧကလျှင် ကျပ် ၁၀ သိန်းမြတ်ရန်ပင် မလွယ်ကူတော့ကြောင်း ရွှေအပ်စပါးစိုက် အင်းတောင်သူများက ဆိုကြသည်။

အင်းလေးဒေသတွင် မတ်လကုန်က ငလျင်လှုပ်ပြီးနောက် လယ်လုပ်ငန်းလုပ်ကိုင်မည့် အလုပ်သမားများ ရှားပါးလာသလို အလုပ်သမားခ၊ မြေသြဇာဖိုး များလည်း မြင့်မားလာကြောင်း သိရသည်။

အင်းလေးကန်ရေပြင်မှာ မေလအတွင်းတိုင်းထွာထားသည့် ရေမှတ်ထက် ယခုရက်ပိုင်းအတွင်း ၃၈လက်မ တက်လာပြီး ဇွန်လ ၁၀ ရက်နေ့မှ ၁၃ ရက်နေ့ထိ မိုးအဆက်မပြတ် ရွာသွန်းမှုကြောင့် ထပ်မံမြင့်တက်လာနိုင်ကြောင်း ခန့်မှန်းထားပြီး မိုးဆက်ရွာနေမည်ဆိုပါက စပါးခင်း၊ မြေပဲခင်းအပြင် ကြံခင်းအချို့ပါ ရေမြုပ်နိုင်ကြောင်း ခန့်မှန်းထားကြသည်။

နန်းမွန်း

#MeKongNews
#အင်းလေး
#ညောင်ရွှေ
#စပါးခင်း
#ဆည်မြောင်း
#မိုးဗြဲ
#တောင်သူ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)