မဲခေါင်၊ ဇွန် ၇
SSPP နှင့် MNDAA စစ်ရေးပဋိပက္ခ ဖြစ်ပွားကာ စစ်ရေးတင်းမာနေသည့် ရှမ်းပြည်မြောက်ပိုင်း၊ သီပေါမြို့နယ်ထဲမှ ဟန်နားရွာဥက္ကဌကို MNDAA က ဇွန်လ ၅ရက် ညနေပိုင်းက ခေါ်ယူသွားခဲ့ပြီး ယခုချိန်ထိ ပြန်လည်လွှတ်ပေးခြင်းမရှိသေးကြောင်း ရပ်ရွာဒေသခံများထံမှ သိရသည်။
ဇွန်လ ၅ရက်နေ့ ညနေ၆ နာရီဝန်းကျင်က ဟန်နားကျေးရွာ ဥက္ကဌ ဦးဆန်ကြာကို MNDAA ၆၁၁ တပ်က ဟန်နားမှ ၈မိုင်ခန့်ဝေးသည့် စဉ့်အင်၊ နားလန်းဘက်သို့ နေအိမ်မှ ဖမ်းဆီးခေါ်ဆောင်သွားသည်ဟု ဒေသခံတစ်ဦးက ပြောသည်။
“အရင်လတွေက ကိုးကန့်တွေ စစ်ကြောင်းထိုးပြီး ဟန်နားရောက်တော့ အိမ်ထောင်စု စာရင်းတွေကိုတောင်းတယ်။ ကျေးရွာကော်မတီက ဒီနယ်မြေက အရင်ကတည်းက SSPP ထိန်းချုပ်တဲ့နယ်မြေဖြစ်လို့ အိမ်ထောင်စုစာရင်းချုပ်တွေက သူတို့ဆီအပ်ထားရတာကို လက်နက်ကိုင်အချင်းချင်း တောင်းယူကြပေါ့ ပြောလိုက်တာ ရှိတယ်။ နောက်ပိုင်း ပစ်ကြခတ်ကြတာတွေရှိလာတော့ မနေ့က အိမ်မှာလာခေါ်သွားတာပဲ။ တောင်းထားတဲ့ အိမ်ထောင်စုစာရင်းတွေရမှာ ပြန်လွှတ်မယ်ပြောတယ်” ဟု မဲခေါင်သို့ ပြောသည်။
ပြန်လည်လွတ်မြောက်ရန်အတွက် SSPP နှင့် ပန်ဆန်းအထိ ညှိနှိုင်းသော်လည်း အဆင်မပြေသည့်အတွက် ယခု ဦးဆန်ကြာ လွတ် မြောက်ရေးကို မိသားစု ဆွေမျိုးများနှင့်ရွာက ပူပင်သောကရောက်နေကြသည်ဟု ပြောသည်။
ပြီးခဲ့သည့် လပိုင်းအတွင်း စတင်ခဲ့သည့် MNDAAနှင့် SSPP တင်းမာမှုအတွင်း ဇွန်လ ၁ရက် နေ့က ဖြစ်ပွားခဲ့သည့် တိုက်ပွဲ၌ MNDAA ဘက်မှ ၈ဦး သေဆုံးကြောင်း SSPP က ပြောကြားခဲ့ပြီး MNDAAနှင့် စစ်ရေးပဋိပက္ခများ အတွင်း ယခင် ၂ဦးသေဆုံးခဲ့သေးသဖြင့် MNDAA ဖက်က ၁၀ဦးသေဆုံးခဲ့ပြီးဖြစ်သည်။
နမ္မကျောက်မီးသွေးနယ်မြေအတွင်း MNDAA တပ်များဝင်ရောက်ယူရာမှ စိန်ကျော့၊ ဟန်နားကျေးရွာများတွင် လာရောက်တပ်စွဲထားသည့် MNDAA တပ်များနှင့် လက်ရှိအခြေအနေမှာ အချိန်မရွေးတိုက်ပွဲဖြစ်ပွားနိုင်သည့် အခြေအနေ ရှိနေကြောင်း ဒေသခံများထံမှ သိရသည်။
ဟန်နားကျေးရွာ ဥက္ကဌ ယခုလို ဖမ်းဆီးခံထားရမှုကို နှစ်ဘက်အဖွဲ့အစည်းက မည်သည့်ထုတ်ပြန်မှုမျှ မရှိချေ။
မဟာ
#MeKongNews
#ဟန်နား
#ကျေးရွာဥက္ကဌ
#ဦးဆန်ကြာ
#SSPP
#MNDAA
