မဲခေါင်၊ ဇွန် ၆
မြန်မာ့သြဘာကုမ္ပဏီမှ ရောင်းချသည့် NK 625 ပြောင်းမျိုးစေ့တချို့ အပင်မထွက်သဖြင့် ရှမ်းပြည်တောင်ပိုင်းရှိ ပြောင်းစိုက်တောင်သူများ အရင်းဆုံးပြီး ရိုးရာအထွဋ်အမြတ်ထားသည့် ပစ္စည်းများပင် ထုတ်ရောင်းသုံးစွဲနေကြရကြောင်း သိရသည်။
NK 625 ၁၈ စီးရီးမှ ပြောင်းမျိုး ၉ မျိုး၏ ပြောင်းမျိုးစေ့ ၅ ကီလိုအိတ် အထွက်နှုန်းသည် အပင်ပေါက်သာထွက်သဖြင့် ယခုနှစ် ရှမ်းတောင်ပြောင်းစိုက်တောင်သူများ အကြားနာမည်ဆိုး ထွက်နေခြင်းဖြစ်သည်။
“အခုဖြစ်တာက ၅ ကီလိုအိတ်နဲ့ဟာကို ၁၈ စီးရီးကဖြစ်တာ၊ အထုတ်ကြီး ၁၀ ကီလိုကမဖြစ်ဘဲ ၅ ကီလိုကဖြစ်တာ၊ ဖာပေါင်း ၇၀၀ လောက်ရှိမယ်ထင်တယ် ရောင်းခဲ့တာ၊ ဒါတောင်ပြတ်သွားလို့ တခြားတမျိုးပဲပေးလိုက်တာ ကံကောင်းသွားတယ်” ဟု ရှမ်းတောင်ရှိ စိုက်ပျိုးရေးဆက်စပ်ပစ္စည်းများ ရောင်းချနေသူတစ်ဦးက ဆိုသည်။
သြဘာကုမ္ပဏီက ပြဿနာအစပိုင်းတွင် တာဝန်ယူမှု လုံးဝမရှိသဖြင့် ကိုယ်စားလှယ်ဆိုင်များပါ အခက်တွေ့ခဲ့ရပြီး မေလလယ်ခန့်မှသာ မဖောက်ထားသော မျိုးစေ့အိတ်အသစ်များကိုသာ အခြားမျိုးစေ့အိတ်ဖြင့်ပြန်လဲပေးခြင်း၊ တောင်သူများအား တန်ဖိုးငွေ၏ ၈၀ % (၁သိန်း ၆သောင်း) ငွေပြန်အမ်းပေးခြင်းတို့ ပြုလုပ်ခဲ့ကြောင်း သိရသည်။
ထို့သို့ ပြန်အလျော်ပေးရာတွင်လည်း မေလ ၃၀ ရက်နေ့အထိသာ ရက်အကန့်အသတ်ဖြင့် ပြန်ပေးသဖြင့် ရှမ်းပြည်တောင်ပိုင်းတွင် လိုင်စင်မဲ့ယာဥ်ဖမ်းဆီးရေး စီမံချက်ကြောင့် မြို့ပေါ်မတက်ရဲသည့် တောင်သူအများအပြားမှာ ငွေပြန်အမ်းသည်ကို မရလိုက်ကြောင်း ဒေသခံတောင်သူများထံမှ သိရသည်။
ရှမ်းပြည်တောင်ပိုင်း ပြောင်းစိုက်တောင်သူ အများစုသည် ပအိုဝ်းတိုင်းရင်းသားများဖြစ်ပြီး ပြောင်းအဓိကစိုက်ပျိုးကြသူများဖြစ်သည်။ ယခင်နှစ်များက ပြောင်းဈေးနည်းလျှင်နည်းသလို အရှုံးပေါ်ခဲ့ရပြီး ယခုအခါ 625 ပြောင်းမျိုးကြောင့် အရင်းပါပြန်မရသည့် အဖြစ်နှင့် ရင်ဆိုင်နေကြရသည်။
ယခုနှစ်တွင်မူ ရှမ်းတောင် ပအိုဝ်းဒေသတွင်း ဝင်ရောက်လာသည့် စစ်ရေးအပြင် တရိပ်ရိပ်တက်လာသော ကုန်ဈေးနှုန်းကြောင့် ဟိုပုံး၊ ဆီဆိုင်၊ ဆိုက်ခေါင်၊ ရွှေညောင်၊ ညောင်ရွှေ၊ ပင်လောင်းတကြောမှ ရှမ်းတောင်ပြောင်းစိုက် ပအိုဝ်းတောင်သူများ ၎င်းတို့အထွဋ်အမြတ်ထားရာ လက်ဝတ်လက်စားများအပြင် ရိုးရာအမျိုးသမီးဆံထိုး(ကတူးချဲ့) များကိုပင် ပေါင်နှံရောင်းချနေကြရကြောင်း ဒေသခံများထံမှ သိရသည်။
NK 625 ပြောင်းမျိုးစေ့ ၅ ကီလို တစ်အိတ်လျှင် ရောင်းဈေး ၂ သိန်း အနည်းဆုံးရှိပြီး ကိုယ်စားလှယ်ဆိုင်များကိုမူ သြဘာကုမ္ပဏီက ကျပ် တစ်သောင်းတောင်းကာ 135 မျိုးစေ့နှင့် လဲပေးနေကြောင်း သိရသည်။
သြဘာကုမ္ပဏီက ထို NK 625 မှ ၁၈စီးရီး ပြောင်းမျိုးစေ့ ၉ မျိုးကို တစ်နိုင်ငံလုံးသို့ ရောင်းချပြီးချိန်မှ စမ်းသပ်စိုက်ပျိုးခဲ့ရာ အထွက်နှုန်း ၄၆ % မှ ၈၁ % နှုန်းထိသာထွက်ကြောင်း သြဘာကုမ္ပဏီ ဝန်ထမ်းတစ်ဦးက ၎င်း၏ဆိုရှယ်မီဒီယာတွင် တင်ထားသည်ကို တွေ့ရသည်။
NK 625 ပြောင်းမျိုးစေ့သည် ထိုင်းထုတ် နှင့် အိန္ဒိယထုတ် ၂ မျိုးရှိပြီး ယခု အပင်မထွက်သည့် ပြဿနာသည် မည်သည့်မျိုးစိတ်မှ ဖြစ်ကြောင်း မသိရသေးပေ။ အချို့တောင်သူများကမူ NK 625 ၏ ၁၉ စီးရီးမှာလည်း အပင်မသန်ကြောင်း ဆိုကြသည်။
“ကျမတို့က ၁၈ နဲ့ မတိုးပေမယ့် ၁၉ က အပင်ပေါက်ပေမယ့် အားမသန်ဘူး။ ပြန်လဲပေးပေမယ့် အိတ်က အပေါက်မပါမှတဲ့” ဟု ပြောင်းမျိုးစေ့နှင့် မြေသြဇာ ရောင်းချနေသူတစ်ဦးက ဆိုသည်။
တောင်သူများသည် စိုက်ပျိုးရေးဆိုင်များတွင် ပြောင်းစိုက်ချိန်တန်လျှင် မျိုးစေ့၊ မြေသြဇာနှင့် ပိုးသတ်ဆေးတို့ကို အကြွေးယူကာ ပြောင်းထွက်ချိန်မှ အကြွေးယူထားသည့်ဆိုင်ကို ပြန်ရောင်းချကာ ရရှိငွေထဲမှ အကြွေးကို ဆပ်ရခြင်းဖြစ်သည်။
နန်းမွန်း
#MeKongNews
#ပြောင်း
#သြဘာ
#625
#အပင်မထွက်
#တောင်သူ
#ပအိုဝ်းတောင်သူ
#ပြောင်းမျိုးစေ့
