မဲခေါင်၊ ဇွန် ၁
နှစ်ဖက်စစ်ရေးတင်းမာနေသည့် SSPP နှင့် MNDAA တို့ လားရှိုးမြို့နယ်၊ ဟန်နားအုပ်စု၊ နားလုပ်ကျေးရွာမှာ ယနေ့ နေ့လယ် ၂ နာရီခွဲခန့်ကစပြီး တိုက်ပွဲဖြစ်ပွားနေကြောင်း သိရသည်။
ယနေ့ ဇွန်လ၁ရက် နံနက်ပိုင်းကတည်းက အငြင်းပွားနေကြပြီး လက်ရှိအချိန်တွင် တိုက်ပွဲဖြစ်နေဆဲဟု ဒေသခံတစ်ဦးက ညနေ ၃ နာရီခန့်တွင် မဲခေါင်ကိုပြောသည်။
“မနက်ကတည်းက ဖြစ်ချင်နေတာ၊ ညှိတာအဆင် ပြေမလိုလိုနဲ့ ပြီးသွားပြီထင်တာ။ ခု ၁၅ မိနစ်လောက် ရှိပြီ ဖြစ်နေတာ” ဟု ၎င်းကပြောသည်။
ယင်းကဲ့သို့ တိုက်ပွဲဖြစ်ရန် စစ်ရေးတင်းမာနေမှုကြောင့် ရွာသားအများအပြား ကြိုတင်စစ်ရှောင်နေကြပြီး လက်ရှိတိုက်ပွဲဖြစ်ပွားနေဆဲဖြစ်သဖြင့် အထိအခိုက် အခြေအနေ မသိနိုင်သေးပေ။
ပြီးခဲ့သည့် မေလ၂၅ ရက်ကပင် သီပေါမြို့နယ်၊ နမ္မကျေးရွာအုပ်စုရှိ ခိုနန်းဖရွာတွင်ရှိနေသည့် MNDAA တပ်ဖွဲ့နေရာသို့ SSPP က အင်အားရာချီဖြင့် လာရောက်ပြီး ၎င်းတို့၏ ယခင်စခန်းနေရာကို ပြန်လည်သိမ်းပိုက်ရန် တောင်ဆိုမှုများရှိခဲ့ပြီး ညှိနှိုင်းမှုအဆင်မပြေပါက တိုက်ပွဲ ဖြစ်ပွားနိုင်ချေရှိခဲ့ခြင်း ဖြစ်သည်။
ဧပြီလကုန်ပိုင်းတွင် သီပေါမြို့နယ်အတွင်းရှိ SSPP တပ်များ အခြေချရာ စိန့်ကျော့နှင့် ဟန်နားကို MNDAA တပ်များ ဝင်ရောက်သိမ်းပိုက်မှုကြောင့် နှစ်ဖက်တပ်များ ထိတွေ့မှုဖြစ်ပွားခဲ့ပြီး စစ်ရေးတင်းမာလာခြင်းဖြစ်သည်။
MNDAA က နမ္မ ကျောက်မီးသွေးနယ်မြေကို ဝင်ရောက်လာသည်ကစပြီး နယ်မြေခံ SSPP တပ်နှင့် အချင်းများမှုများ ဖြစ်ခဲ့ရာတွင် နှစ်ဖက်ထိခိုက်မှုများရှိခဲ့သည်ဟု SSPP က ထုတ်ပြန်ထားသည်။
Update – ညနေ ၄ နာရီခန့်တွင် MNDAA တပ်များ ပြန်လည်ဆုတ်ခွာသွားကြောင်း ကနဦးသိရသည်။
မဟာ
#MeKongNews
#SSPP
#MNDAA
#ဟန်နား
#စစ်ရေးတင်းမာ
