မဲခေါင်၊ မေ ၃၀
ဆိုင်ကယ်ဝယ်မည်ဟု ချိန်းဆိုပြီးနောက် ဆိုင်ကယ်လုယူထွက်ပြေးသွားသည့် ဖြစ်စဉ် မေလ ၁၉ရက်က ရှမ်းပြည်တောင်ပိုင်း၊ အင်းလေးဒေသ ညောင်ရွှေမြို့တွင် ဖြစ်သွားသွားသည်။
ပြီးခဲ့သည့် မေလ၁၉ရက် နံနက်၁၀နာရီခန့်က ညောင်ရွှေမြို့၊ ရွှေစာရံဘုရားအနီးရှိ ရွှေပြည်မိုး လက်ဘက်ရည်ဆိုင်ရှေ့တွင် အေးသာယာမှ ဆိုင်ကယ်လာရောက်ရောင်းချသူ အမျိုးသမီးတစ်ဦး၏ ဆိုင်ကယ်ကို အမျိုးသမီး ၂ဦးက ဝယ်မည် အကြောင်းပြကာ စျေးညှိနေစဥ် လုယူမောင်းပြေးသွားခြင်းဖြစ် ကြောင်း သိရသည်။
လုယူမောင်းပြေးသူမှာ ညောင်ရွှေမြို့၊ ကန်သာရပ်နေ ဖြိုးလဲ့ ခေါ် ဖြိုးဖြိုး ဆိုသူဟု သိရပြီး ယင်းကိစ္စအား ၎င်း၏မိသားစုက တာဝန်မယူသဖြင့် ရဲစခန်း၏အကြံပြုချက်အရ လူမှုကွန်ရက်ပေါ်တင်ရခြင်းဖြစ်သည်ဟု ဆိုင်ကယ်လုယူခံရသူနှင့် နီးစပ်သူတစ်ဦးက မဲခေါင်ကို ပြောသည်။
“သူ့အဒေါ်က လျော်ပေးမယ်ပြောလို့ အမှုမဖွင့်ဘဲယခုလိုစောင့်နေတာ၊ ခိုးပြေးတဲ့ဖြိုးဖြိုးက မမိသေးဘူး။ အမှုဖွင့်ရင် နစ်နာမှာစိုးလို့ဟာ၊ အခုတော့ အမှုဖွင့်ရတော့မယ်”ဟု ၎င်းက ပြောသည်။
ယင်းကိစ္စအတွက် နန်းပန်အုပ်ချုပ်ရေးမှူးနှင့်ညောင်ရွှေရဲစခန်းမှ လိုက်လံရှာဖွေကူညီပေးနေသော်လည်း ကျူးလွန်သူ၏ မိသားစုမှ ပူးပေါင်းဆောင်ရွက်မှု မရှိဟု ပြောသည်။
တောင်ကြီးခရိုင်နှင့် ညောင်ရွှေမြို့နယ်ပါဝင်သည့် ကလောခရိုင်အတွင်း ဆိုင်ကယ်၊ ကားပျောက်ဆုံး၊ လုယက်မှုများ မကြာခဏဆိုသလို ဖြစ်ပွားနေသဖြင့် ပြည်သူအများ သတိထားသွားလာနိုင်ကြရန် အချင်းချင်း သတိပေးနေကြသလို ဖြစ်ပွားမှုများကိုလည်း လူမှုကွန်ရက်မှ အများပြည်သူသိစေရန် နှင့် ဥပဒေအ ထောက်အကူဖြစ်စေရန် ဖော်ပြအသိ ပေးလျက်ရှိသည်။
မဟာ
#MeKongNews
#ညောင်ရွှေမြို့နယ်
#အင်းလေးဒေသ
#ဆိုင်ကယ်လုပြေး
#နန်းပန်ရပ်ကွက်
