မဲခေါင်၊ မေ ၂၉
တော်လှန်ရေးတပ်များနှင့် စစ်ကောင်စီတပ်များ တိုက်ပွဲပြင်းထန်နေသည့် ရှမ်းပြည်တောင်ပိုင်း၊ ပင်လောင်းမြို့နယ်၊ ဆောင်းပြောင်းကျေးရွာအုပ်စုတွင် မေလ ၁၇ ရက်နေ့က ပြန်လည်ဖြစ်ပွားနေသော တိုက်ပွဲများကြောင်း ဆောင်း ပြောင်းကျေးရွာနှင့်ပတ်ဝန်းကျင်မှ ဒေသခံ ၃၀၀၀ ခန့် စစ်ဘေးတိမ်းရှောင်နေရကြောင်း သိရသည်။
နှစ်ဖက်တိုက်ပွဲများနှင့် စစ်ကောင်စီ၏ လက်နက်ကြီး၊ လေကြောင်းတိုက်ခိုက်မှုတို့ကြောင့် ဆောင်းပြောင်းဒေသရှိ ဆောင်းပြောင်း၊ ပင်ပုံ၊ ကောင်ဘာ၊ လင်းဗျာလ စသည့်ကျေးရွာများမှ အနည်းဆုံးဒေသခံဦးရေ ၃၀၀၀ ခန့် စစ်လွတ်ရာဒေသများသို့ တိမ်းရှောင်နေရခြင်းဖြစ်ကြောင်း ဒေသခံတစ်ဦးက မဲခေါင်ကိုပြောသည်။
“နှစ်ဦးနှစ်ဖက်ထိခိုက်များတယ်တဲ့၊ ပင် လောင်းကိုသိမ်းမယ် ဘာညာလည်း ပြောကြ၊ ဒီဖက် တော့ သေနတ်သံကြားရဆဲ။ မိုးရွာတော့ဒုက္ခရောက်ကြတယ်” ဟု ၎င်းကဆိုသည်။
စစ်ရှောင်နေရသည့် ဒေသခံအများစုသည် စပါး၊ ငြုပ်သီး၊ ပြောင်းစိုက်သည့် တောင်သူအများစုဖြစ်သည့်အတွက် ရာသီချိန်တွင် တောင်ယာလုပ်ငန်းခွင် ပြန်မဝင်နိုင်ဖြစ်ကာ စားဝတ်နေရေး ခက်ခဲမှုများရှိကြောင်း၊ စစ်ရှောင်ရသည့် နေရာများတွင် ခြံအလုပ်များ နေ့စားလုပ်နေကြရကြောင်း ဒေသခံများထံမှ သိရသည်။
တိုက်ပွဲစတင်ဖြစ်ပွားသည့် မေလဒုတိယပတ်လောက် ကတည်းက ကောင်းဗာကျေးရွာ၊ ဝါးလီကျေးရွာ၊ နောင်တရားကျေးရွာဘက်များသို့ စစ်ရှောင်ကြခြင်းဖြစ်ပြီး အခြေခံစားနပ်ရိက္ခာ ဆန်၊ ဆီနှင့် အရေးပေါ်ဆေးဝါးများ၊ မိုးကာနှင့် အဝတ်အထည်များ လိုအပ်နေကြောင်း သိရသည်။
ပြီးခဲ့သည့် ၂၀၂၄ ခုနှစ် စက်တင်ဘာလအတွင်း၌လည်း စစ်ကောင်စီနှင့်လက် အောက်ခံ ပြည်သူ့စစ်အဖွဲ့နှင့် တော်လှန်ရေးတပ်များ တိုက်ပွဲပြင်းထန်စွာ ဖြစ်ပွားခဲ့ကြသည့်အတွက် နောင်ဝိုး၊ လွယ်ကျိုင်း၊ ဟိုဝိုးနှင့်ဆောင်းပြောင်း စသည့်ကျေးရွာများမှဒေသခံ ၂၀၀၀ ဝန်းကျင်ခန့်ဟာ စစ်ဘေးတိမ်းရှောင်ခဲ့ကြရသည်။
လက်ရှိတွင် ဆောင်းပြောင်းဒေသနှင့် အနီးတဝိုက်ရှိ စစ်ကောင်စီစခန်းကုန်း တချို့အား တော်လှန်ရေးတပ်များမှ သိမ်းပိုက်ထားပြီး အပြီးတိုင် ထိန်းချုပ်နိုင်ခြင်းတော့ မရှိသေးပေ။
ဂနိုက်
#MeKongNews
#ဆောင်းပြောင်း
#စစ်ဘေးရှောင်
#ပင်လောင်း
#စားနပ်ရိက္ခာ
