မဲခေါင်၊ မေ ၁၉
တရုတ်ကုမ္ပဏီနှင့် ပူးပေါင်းကာ မြင်းမထိတောင်တွင် ခဲသတ္တုတူးသည့်အပေါ် ကန့်ကွက်ဆန္ဒပြသည့် ပရာဒေါင်းလူမျိုးစု ခေါင်းဆောင်များကို ကယန်းပြည်သစ်ပါတီက ၃ ရက်ကြာသည်အထိ ပြန်လွှတ်ပေးခြင်းမရှိကြောင်း ပရာဒေါင်းဆွေမျိုးစု ဗဟိုကော်မတီထံမှ သိရသည်။
ခဲသတ္တုတူးဖော်မည့်အပေါ် ဆန္ဒပြသည့်ခေါင်းဆောင် ပရာဒေါင်းဆွေမျိုးစု ဥက္ကဋ္ဌ ခွန်းအောင်နိုင်စိုး၊ ဒုဥက္ကဋ္ဌ ဦးအားဒို၊ နာယက ဦးဘမောင်နှင့် အတွင်းရေးမှူး ခွန်းခိုင်မင်းနိုင်တို့ ၄ ဦးကို ပြီးခဲ့သည့် မတ်လ ၁၆ ရက်တွင် ကယန်းပြည်သစ်လက်နက်ကိုင်များက သိကျိတ်ရွာကနေ လက်ထိတ်ခတ် ဖမ်းဆီးသွားခြင်းဖြစ်ပြီး မေလ ၁၉ ရက်အထိ ပြန်လွှတ်ပေးခြင်း မရှိသေးကြောင်း သိရသည်။
“မဖမ်းဆီးမီအချိန်လေးမှာတော့ လုံခြုံရေး လက်နက်အပြည့်အစုံနဲ့ စစ်ဆင်ရေးတစ်ခုလို ဗျူဟာကျကျဆွဲပြီး ဖမ်းသွားပါတယ်။ RPG လို လက်နက်ကြီးတောင် ပါပါတယ်။ အခု ရှမ်း-ကရင်နီ နယ်စပ်က ကယန်းပြည်သစ်ပါတီ ဥက္ကဋ္ဌ သန်းစိုးနိုင်ရဲ့ ကင်းတပ် နယ်စပ်စခန်းမှာ ဖမ်းထားပါတယ်။ ပထမညကို ထွက်ပြေးမှာဆိုးလို့ ခြောက်ပေါက်ထဲ ထည့်ထားကြပါတယ်။ ပြီးတော့ ဖမ်းဆီးထားတဲ့ လူတွေရဲ့ သတင်းအချက်လက် ဖုန်းတွေ သိမ်းထားလိုက်ပါတယ်”ဟု ပရာဒေါင်းဆွေမျိုးစု လူငယ်ဥက္ကဌက မဲခေါင်သတင်းဌာနသို့ ယနေ့ မေလ ၁၉ ရက် နံနက်ပိုင်းတွင် ပြောသည်။
ကယန်းပြည်သစ်ပါတီ – KNLP ကတောင်းဆိုသည့် ဆန္ဒမပြရန်၊ ရွာထဲရှိ ဂိတ်များကို ဖြုတ်ပေးရန်တို့ကို သပိတ်ကော်မတီက လိုက်လျောထားသော်လည်း ယခုချိန်ထိဖမ်းဆီးထားသူများကို လွှတ်ပေးခြင်းမရှိသေးကြောင်းနှင့် ယနေ့တွင် ဖမ်းဆီးထားသည်မှာ ၃ ရက် ရှိပြီဖြစ်ကြောင်း လူငယ်ဥက္ကဌက ပြောသည်။
“သီးခံပေးပါ၊ ဆူပူဆန္ဒပြမှုတွေ မလုပ်သေးပါနဲ့တဲ့။ ကယန်းပြည်သစ်ပါတီ ဗဟိုကော်မတီနဲ့ လေးပွင့်ကြယ်ကုမ္ပဏီက ယန်းပြည်သစ်ပါတီ ဥက္ကဋ္ဌတို့က ဒီနေ့ ဗဟိုကော်မတီအစည်းဝေးလုပ်နေတယ်တဲ့။ လေးပွင့်ကြယ်ဘက်ကတော့ ဖမ်းဆီးထားတဲ့ ခေါင်းဆောင်တွေကို သူတို့လိုချင်တဲ့ ပုံစံခွက်မရမချင်း လွှတ်ပေးဖို့မရှိဘူးလို့ ကျွန်တော်တို့ယူဆတယ်။ ဖမ်းဆီးထားတဲ့ ကျွန်တော်တို့ ဆွေမျိုးစုခေါင်းဆောင်တွေကို အကြီးစားခဲသတ္တုတူးဖော်ဖို့ ဖိအားပေး လက်မှတ်ထိုးခိုင်းထားတဲ့ အခြေနေလေးတွေရှိပါတယ်” ဟု ၎င်းကပြောသည်။
ယင်းဖြစ်စဥ်တွင် ဖယ်ခုံကျောင်းသားသမဂ္ဂနှင့် အဖွဲ့အစည်း ၁၁ ခုက ပရာဒေါင်းဆွေမျိုးစုများနှင့်အတူ ဝန်းရံပေးနေကြောင်း သိရသည်။
ကယန်းလူမျိုးတွင် မျိုးနွယ်စုကြီး ၄ ခုရှိရာ ယင်းတို့မှာ ကယန်း လဟွီ- ကခေါင်း ၊ ကယန်း ကဲဒေါ့၊ ကယန်း လထာ၊ ကယန်း ကငန်-ယင်းဘော်တို့ဖြစ်ပြီး ယခု KNLP က ဖမ်းဆီးထားသူများမှာ ကဲဒေါ့မျိုးနွယ်စုမှ ပရာဒေါင်းဆွေမျိုးစု ဖြစ်ကြောင်း သိရသည်။
လက်ရှိတွင် ပရာဒေါင်းဆွေမျိုးစုနှင့် ဒေသခံများအနေဖြင့် ခေါင်းဆောင်များ ပြန်လည်လွတ်မြောက်လာသည့်အခါ ကြိုဆိုဂုဏ်ပြုရန် ရိုးရာဗုံ၊ ပလွေများနှင့် ကြိုဆိုရန်ပြင်ဆင်နေပြီး ကယန်းပြည်သစ်ပါတီဥက္ကဋ္ဌဘက်အနေဖြင့်မူ ရက်အတိအကျ အာမခံချက် မပေးသည့်အပြင် အကြောင်းကြားခြင်းလည်း မရှိသေးကြောင်း သိရသည်။
ကယန်းပြည်သစ်ပါတီ ဥက္ကဌ ဦးသန်းစိုးနိုင်ပိုင် လေးပွင့်ကြယ်ကုမ္ပဏီနှင့် တရုတ်ကုမ္ပဏီတို့ ပူးပေါင်းပြီး ဖယ်ခုံမြို့နယ်၊ မြင်းမထိတောင်တွင် ခဲသတ္တုတူးဖော်နေသည့်အပေါ် ပရာဒေါင်းဆွေမျိုးစုများက မတ်လကတည်းက ကန့်ကွက်နေခြင်းဖြစ်သည်။
မဟာ
#MeKongNews
#ပရာဒေါင်းဆွေမျိုးစု
#မြင်းမထိတောင်
#ခဲသတ္တုတူးဖော်
#ကယန်းပြည်သစ်ပါတီ
#ခွန်အောင်နိုင်စိုး
