မဲခေါင်၊ မေ ၁၁
ကရင်နီပြည်နယ်၊ မော်ချီးမြို့တွင် မေလ ၁၀ရက် မွန်းလွဲပိုင်းက စစ်ကောင်စီက လေကြောင်းတိုက်ခိုက်ခဲ့ပြီး သေဆုံး၊ ဒဏ်ရာရသူများ ရှိကြောင် သိရသည်။
မေလ ၁၀ ရက်မွန်းလွဲပိုင်းတွင် စစ်ကောင်စီမှ မော်ချီးဒေသကို လေကြောင်းတိုက်ခိုက်မှု ပြုလုပ်ခဲ့ပြီး ဒေသခံပြည်သူ ၂ ဦးသေဆုံးသည်ဟု သိရကြောင်း ကရင်နီပြည် ကြားကာလစီမံအုပ်ချုပ်ရေးကောင်စီ – IEC အတွင်းရေးမှူး ၂ ဦးဗညားက မဲခေါင်ကိုပြောသည်။
“လေယာဉ်တော့ဟုတ်တယ်။ လေယာဉ်တော့ ဒီနေ့ခင်းပိုင်း တချက်တော့ လာကြဲသွားတယ်။ သိရသလောက်တော့ ၂ ဦး သေဆုံးပြီး တစ်ဦး ထိခိုက်ဒဏ်ရာရရှိခဲ့တယ်လို့ သိထားတယ်”ဟု ၎င်းကဆိုသည်။
လေကြောင်းတိုက်ခိုက်ခံရမှုမှာ ၃ နေရာဖြစ်ပြီး သေဆုံးသူအရေအတွက်မှာ ယခုထပ်ပိုနိုင်ပြီး ထိခိုက်ဒဏ်ရာရသူများလည်း ရှိနိုင်ကြောင်း၊ စစ်ကောင်စီ၏ လေကြောင်းတိုက်ခိုက်မှု အန္တရာယ်ကြောင့် ဒေသတွင်း၌ ပြည်သူများကို စတားလင့်ခ် ဝိုင်ဖိုင်အင်တာနက် သုံးစွဲခွင့် ပိတ်ပင်ထားသည့်အတွက် ဆက်သွယ်ရန်ခက်ခဲကြောင်း သိရသည်။
မော်ချီးဒေသတွင်း စတားလင့်ခ် သုံးစွဲခွင့်ကို ခရိုင်ပူးပေါင်းအုပ်ချုပ်ရေးကော်မတီက ပြီးခဲ့သည့် ဧပြီလ ၂၈ ရက်နေ့တွင်ထုတ်ပြန်ခဲ့သည်။
လက်ရှိလေကြောင်း တိုက်ခိုက်မှုများကို ကြည့်ခြင်းအားဖြင့် လေကြောင်းတိုက်ခိုက်မှုများသည် အင်တာနက် ဖွင့်ခြင်း၊ ပိတ်ခြင်းနှင့် သက်ဆိုင်ခြင်းမရှိဘဲ နယ်မြေပြန်လည် မရရှိသောကြောင့်သာဖြစ်ကြောင်း ကရင်နီပြည်နယ်တွင်နေထိုင်သည့် နိုင်ငံရေးကျွမ်းကျင်သူတစ်ဦးက မဲခေါင်ကိုပြောသည်။
“စကစ ဘက်ကတော့ ကျွန်တော်တို့ လွှမ်းမိုးနယ်မြေတွေကို မတည်ငြိမ်အောင်၊ ကြောက်နေအောင်လုပ်ဖို့ပဲ ရှိတော့တာလေ။ လာပြီး ပြန်မှမသိမ်းနိုင်တော့တာ၊ မစားရတဲ့ အမဲသဲ နဲ့ ပက်တာပေါ့ဗျာ” ဟု ၎င်းကဆိုသည်။
စတားလင့်ခ်အင်တာနက် သုံးစွဲခွင့်ပိတ်ထားခြင်းကြောင့် Enemy Air Route နှင့် NAS(နပ်စ်) ကဲ့သို့သော လေကြောင်းအန္တရာယ် သတိပေးသည့် ချန်နယ်များမှ သတင်းများရယူနိုင်ခြင်း မရှိသည့်အတွက် ဒေသခံများအကြား ဝေဖန်မှုမြင့်တက်နေသည်။
မြို့နယ်တာဝန်ခံများဘက်မှ အချက်အလက်များ ဖြန့်ဝေမှု ထိန်းသိမ်းနိုင်ရန် စတားလင့်ခ် အသုံးပြုခွင့်ပိတ်ထားချိန်ခြင်းဖြစ်ပြီး စတားလင့််ခ်ပိတ်ထားသော်လည်း လေယာဉ်ဖြင့် ဗုံးကြဲခံရသည့်အတွက် ထူးခြားမှုမရှိဟု ပြည်သူများဘက်ကလည်း မြင်နိုင်ကြောင်း ဝေဖန်မှုများအပေါ် ကရင်နီပြည် ကြားကာလစီမံအုပ်ချုပ်ရေးကောင်စီ IEC အတွင်းရေးမှူး ၂ ဦးဗညားက မဲခေါင်ကိုပြောသည်။
“စတားလင့်ခ်ကို ယာယီ တစ်လပေါ့ မြို့နယ်ပူးပေါင်းကတော့ ပိတ်ထားဖို့ပြောတယ်။ အချက်အလက်တွေကို အသေးစိတ် မပေါက်ကြားအောင် ထိန်းနိုင်တယ်လို့ မြို့နယ်ဘက်က မြင်တယ်ပေါ့နော်။ သတင်းအချက်အလက်တွေကို ပျံ့အောင်ဖြန့်တာကို ထိန်းသိမ်းနိုင်မလားပေါ့။ လူထုဘက်ကစဉ်းစားရင်တော့ စတားလင့်ခ်သိမ်းထားရင်လည်း လေယာဉ်ကြဲတာပဲ။ မသိမ်းရင်လည်း လေယာဉ်ကြဲတာပဲ။ အဲ့တော့မထူးလောက်ဖူးလို့ မြင်ကောင်းမြင်နိုင်တယ်” ဟု ၎င်းကပြောသည်။
ပြီးခဲ့သည့် ဧပြီလ ၂၆ ရက် ၂၄ ရက်တို့တွင်လည်း ကရင်နီပြည်၊ မော်ချီးဒေသနှင့် မယ်စဲ့မြို့များကို စစ်ကောင်စီကလေကြောင်းတိုက်ခိုက်ခဲ့ပြီး ထိခိုက်သေဆုံးမှုများရှိခဲ့သည်။
မော်ချီးမြို့ကို ၁၁၁၁ စစ်ဆင်ရေးအတွင်း ၂၀၂၄ ခုနှစ် ဇန်နဝါရီလ ၂၈ ရက်နေ့တွင် ကရင်နီပြည် လူမျိုးပေါင်းစုံလွတ်မြောက်ရေးတပ်ဦး – ကလလတ၊ ကရင်နီတပ်မတော် – KA၊ ကရင်နီအမျိုးသားများ ကာကွယ်ရေးတပ် – KNDF၊ KNPP၊ KNU နှင့် ပြည်သူ့ကာကွယ်ရေးတပ်များက သိမ်းပိုက်ပြီးနောက် လက်ရှိအချိန်အထိ ပူးပေါင်းကော်မတီမှ ထိန်းချုပ်ထားသည်။
ဂနိုက်
#MeKongNews
#မော်ချီးဒေသ
#လေကြောင်းတိုက်ခိုက်မှု
#စတားလင့်ခ်
#ကရင်နီ
