မဲခေါင်၊ ဧပြီ ၂
မန္တလေးငလျင်သို့ ကူညီရန်လာရောက်မည့် တရုတ်ကြက်ခြေနီထောက်ပံ့ရေးယာဥ်တန်းကို ရှမ်းပြည်မြောက်ပိုင်း၊ နောင်ချိုမြို့အထွက် အုမ္မတီးရွာအနီးတွင် မိုးပေါ်ထောင်ပြီး သေနတ်သုံးချက်ပစ်ဖောက်သတိပေးခဲ့ကြောင်း စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်း က ပြောသည်။
၉ စင်းပါ ထိုယာဥ်တန်းသည် မန္တလေးငလျင်အတွက် ကူညီထောက်ပံ့ရေးပစ္စည်းများ တင်ဆောင်ကာ နောင်ချိုမြို့အထွက် အုမ္မတီးရွာအနီး၌ ယမန်နေ့ (ဧပြီ ၁) ၌ စစ်ကောင်စီက မိုးပေါ်ထောင် ပစ်ခတ်ခဲ့ခြင်းဖြစ်သည်။
“ဒီယာဥ်တန်းကိုတွေ့တဲ့အခါ တပ်မတော်က တားဆီးပါတယ်၊ တားဆီးလို့မရပါဘူး။ မီတာ ၂၀၀ လောက်အကွာမှာ မီးထိုးပြီး တားပါတယ်။ မီတာ ၁၀၀ လောက်မှာတော့ မိုးပေါ်ထောင်ပြီး သေနတ်သုံးချက် ပစ်ဖောက်ခဲ့တယ်လို့ သိရပါတယ်။ အဲ့ဒါနဲ့ နောင်ချိုဘက်ကို ပြန်သွားတယ်လို့ သိရပါတယ်” ဟု ဗိုလ်ချုပ်ဇော်မင်းထွန်း ပြောစကားကို စစ်ကောင်စီမီဒီယာများ၌ ဖော်ပြသည်။
ထိုယာဥ်တန်းလာမည့်အကြောင်း စစ်သံရုံးနှင့် စစ်ကောင်စီသို့ သတင်းပို့ခဲ့ခြင်းမရှိကြောင်း သူက ဆက်ပြောသည်။
ယမန်နေ့ည တအာင်းအမျိုးသားလွတ်မြောက်ရေးတပ်မတော် (TNLA) ထုတ်ပြန်ချက်တွင် စစ်ကောင်စီကို အကြောင်းကြားခဲ့သော်လည်း စစ်ကောင်စီဘက်က စက်လတ်သေနတ်များဖြင့် ပစ်ခတ်ခဲ့သောကြောင့် ပြန်လှည့်ခဲ့ရသည်ဟု ပါရှိသည်။
ထိုယာဥ်တန်းငလျင်ဒဏ်သင့် ဒေသ မန္တလေးသို့ သွားရောက်နိုင်ရေးအတွက်လည်း TNLA ဘက်က ကူညီမည်ဟု ဆိုထားသည်။
#MeKongNews
#နောင်ချို
#တရုတ်ယာဥ်တန်း
#ပစ်ခတ်
#တအာင်း
#ငလျင်
#စစ်ကောင်စီ
#ဇော်မင်းထွန်း
