မဲခေါင်၊ ဧပြီ ၁
ရှမ်းပြည်တောင်ပိုင်း၊ ညောင်ရွှေမြို့နယ်၊ အင်းလေးဒေသ ငလျင်ဘေးသင့်ဒဏ်ခံနေရချိန်တွင် စစစ်ကောင်စီနှင့် PNO ပြည်သူ့စစ်တို့က အင်းတောင်ခြမ်းရှိ ကျေးရွာများကို ဒရုန်းများ၊ လက်နက်ကြီးများ ဖြင့် တိုက်ခိုက်ခဲ့ကြောင်း အင်းလေးလူ့အခွင့်အရေးအဖွဲ့က ယမန်နေ့ မတ်လ ၃၁ ရက်က ထုတ်ပြန်ထားသည်။
ယမန်နေ့မတ်လ ၃၁ ရက်နေ့ နံနက် ၆ နာရီမှ ည ၆ နာရီထိ လက်နက်ကြီးနှင့် ဒရုန်း ၈ ကြိမ် ကြဲချတိုက်ခိုက်မှုကြောင့် ရေပူကျေးရွာမှ နေအိမ် ၂ လုံး ထိခိုက်ပျက်စီးခဲ့ရသည်ဟု ဆိုသည်။
မတ်လ ၃၀ ရက် ၊ ညနေ ၆ နာရီတွင်လည်း ညောင်ရွှေမြို့နယ်၊ အင်းလေးတောင်ဖက်ခြမ်းရှိ ဘုရားတောင်၊ လွယ်နွဲ့ရွာကို တိုက်ပွဲဖြစ်ပွားခြင်းမရှိဘဲ ဒရုန်းနှင့် လက်နက်ကြီး ၆ ကြိမ် ကြဲချတိုက်ခိုက်ခဲ့ပြီး နေအိမ် တစ်လုံး ထိခိုက်ပျက်စီးခဲ့ကြောင်း သိရသည်။
အင်းလေးဒေသ ကျေးရွာများတွင် ပြည်သူများ ငလျင်ဘေးသင့်ဒဏ်ခံနေရချိန်တွင် စစ်ကောင်စီနှင့် PNO တို့က ပြည်သူများကို မကူညီသည့်အပြင် လက်နက်ကြီး၊ ဒရုန်းများဖြင့် အင်းတောင်ခြမ်းရှိ ကျေးရွာများကို နေ့စဥ်လိုလို တိုက်ခိုက်နေကြောင်း ဒေသခံများကပြောသည်။
အင်းလေးဒေသ ရေပေါ်ကျေးရွာ ၁၉ ရွာတွင် ယမန်နေ့ထိ ငလျင်ကြောင့် သေဆုံးသူ ၁၀၀ ဦးခန့်ရှိပြီဖြစ်ပြီး အိမ်ခြေပေါင်း ၂၄၀၀ ခန့် ပျက်စီးခဲ့ရသည်။
နိုင်ငံအဝှမ်း ငလျင်ဒဏ်ကြုံနေရချိန်တွင် စစ်ကောင်စီက ရှမ်းပြည် အပါအဝင် ကရင်နီပြည်၊ စစ်ကိုင်းတိုင်း၊ မကွေးတိုင်းနှင့် မန္တလေးတိုင်း တို့တွင် ဗုံးကြဲမှု၊ လက်နက်ကြီး ပစ်ခတ်မှုများ ပြုလုပ်နေသည်။
မဟာ
#MeKongNews
#MyanmarEarthquake
#စစ်ကိုင်းငလျင်
#လေကြောင်းတိုက်ခိုက်
#ဒရုန်း
#PNO
