မဲခေါင်၊ ဖေဖော်ဝါရီ ၁၀
ပွင့်လင်းရာသီရောက်တိုင်း နှစ်စဉ်သောက်သုံးရေ ရှားပါးသည့်ဒေသဖြစ်သော ရှမ်းပြည်တောင်ပိုင်း၊ ပအိုဝ်းဒေသ၊ ဆီဆိုင်မြို့နယ် အရှေ့ဘက်ခြမ်း ကျေးရွာများ၌ သောက်သုံးရေရှားပါးမှုစတင်ကြုံတွေ့လာပြီဖြစ်သည်။
ယခုနှစ်တွင် စစ်ဘေးရှောင်များပါ ရေရှားပါးမှုကို ဆိုးဆိုးရွားရွားကြုံနေကြောင်း သိရသည်။
လက်ရှိ ဆီဆိုင်မြို့နယ်၊ အရှေ့ဘက်ခြမ်းကျေးရွာများ၌ စစ်ကောင်စီ၊ PNO ပြည်သူ့စစ်ပူးပေါင်းအဖွဲ့နှင့် ပအိုဝ်းအမျိုးသားလွတ်မြောက်ရေးတပ်မတော် (PNLA) အကြား ရံဖန်ရံခါ ထိတွေ့တိုက်ပွဲများဖြစ်ပွားနေသဖြင့် ရွာသားများ ထောင်ဂဏန်းဝန်းကျင်သည် နီးစပ်ရာ တောတောင်များထဲသို့ တိမ်းရှောင်နေရပြီး ရေအပါအဝင် အခြားအကူအညီများလည်း လိုအပ်နေသည်ဟု စစ်ဘေးရှောင်များကို ကူညီနေသူ တစ်ဦးက မဲခေါင်ကို ပြောသည်။
“ ရွာသားတွေက အခုလို တိုက်ပွဲတွေဖြစ်တော့ နီးရာ ရှောင်ကြတယ်၊ တချို့ဆို တောတောင်ထဲကို ရှောင်နေကြတာ၊ ပိုလို့ခက်ခဲတာပေါ့၊ ရေမှမဟုတ်ပါဘူး ၊လိုအပ်တာမှ အများကြီးပါပဲ” ဟုသူကပြောသည်။
ရေရှားပါးသဖြင့် စစ်ဘေးရှောင်များအနေဖြင့် ရေကားတစ်စီးလျှင် ကျပ်နှစ်သောင်းပေးကာ ဝယ်ယူသုံးစွဲနေရပြီး အချို့သောအလှူရှင်များကလည်း လာရောက်ကူညီမှုရှိကြောင်း သူကပြောသည်။
ယခင်နှစ်တွင် ဆီဆိုင်မြို့၊ ဇဝနာရာမဆရာတော်မှ ဦးဆောင်ကာ ရေရရှိရေး ပွန်ချောင်းမှ သောင်ဖြီးရွာသို့ ရေပိုက်သွယ်တန်းခဲ့သော်လည်း ရေပိုက်များ ပြန်ကျွတ်သဖြင့် မအောင်မြင်ခဲ့ပေ။ သို့သော်လည်း ယခုနှစ်တွင် နွေရာသီမီးများမလောင်မီ ခြုံနွယ်များ ရှင်းလင်းကာ အဆိုပါ ရေသွယ်တန်းမှုကို ပြီးဆုံးအောင် ပူးပေါင်းလုပ်ဆောင်ကြရန် ဆရာတော်မှ ဒေသခံများကို မိန့်ကြားသည်။
သုဝဏ္ဏခွန်
#MeKongNews
#ဆီဆိုင်မြို့နယ်
#အရှေ့ခြမ်း
#စစ်ရှောင်ဒေသခံ
#သောက်သုံးရေ
