မဲခေါင်၊ ဖေဖော်ဝါရီ ၁၀
ရှမ်းပြည်မြောက်ပိုင်း၊ သီပေါမြို့နယ်၊ မြို့အဝင်မုဒ်ဦး၌ ရေးထွင်းထားသည့် ရှမ်းအမှတ်အသားများအား တအာင်း(ပလောင်)အမှတ်တံဆိပ်များပြောင်းလဲခဲ့သည်ကို ပြန်လည်ပြင်ဆင်နေပြီဟု TNLA ကပြောသည်။
ဖေဖော်ဝါရီလ ၇ ရက်က TNLA က မြို့အဝင်မုဒ်ဦးရေးထွင်းပါရှိသည့် ရှမ်းပြည်အလံတော်၊ ရှမ်းအိုးစည်ဖောင်းကြွရုပ်များ၊ ပင်လယ်ရေအမြင့်ပေ တိုင်းတာချက်နှင့် ရှမ်းစာသားများကို တအာင်းအမှတ်အသားများ ပြောင်းလဲကာ ဆေးအရောင်ပြောင်းလဲခဲ့သည်။
TNLA က ပြင်ဆင်မှုတွေပြုလုပ်ခဲ့ပြီးနောက် ရှမ်းပြည်ရှိ အရပ်ဖက်အဖွဲ့အစည်းများမှ ကန့်ကွက်ကြောင်းထုတ်ပြန်ကြေညာမှုများ ပြုလုပ်ခဲ့ပြီးနောက် အခုလို မူလအတိုင်း ပြန်လည်ပြင်ဆင်နေကြောင်း TNLA ပြောခွင့်ရ မလွေးယေားကပြောသည်။
TNLA ၏ မုဒ်ဦးအမှတ်တံဆိပ်များ ပြောင်းလဲခြင်းသည် သီပေါမြို့၏ ယဉ်ကျေးမှုနဲ့ထုံးတမ်းစဉ်လာကို ဖျက်ဆီးခဲ့တာဖြစ်ပြီး စစ်အနိုင်ရရှိသောကြောင့် သီပေါမြို့ကို အုပ်ချုပ်ခွင့်ရနေပေမဲ့ အများပြည်သူ၏ ဆန္ဒကိုဆန့်ကျင်သည့် လုပ်ရပ်ဖြစ်ကြောင်း သျှမ်းကျောင်းသားများသမဂ္ဂ အလုပ်အမှုဆောင်အဖွဲ့ဝင် မဝမ်ဒါ မဲခေါင်ကိုပြောသည်။
“ဒါက မဖြစ်သင့်တဲ့ကိစ္စပေါ့နော်၊ အချိန်မှီပြင်ဆင်ရင်တော့ အကောင်းဆုံးပါ၊ ရေရှည်မှာ မကောင်းပါဘူး၊ ကျွန်မတို့ နှစ်ပေါင်းများစွာ အတူယှဉ်တွဲနေထိုင်ခဲ့ကြတာပါ၊ ဘာပြဿနာမှလည်း မရှိခဲ့ဘူး၊ ဒီလိုလုပ်တာတော့ အာဏာရှင်ဆန်တယ်” ဟု ဆိုသည်။
TNLA တပ်များ ထိန်းချုပ်ထားသည့်မြို့နယ်များ၌ ပြုပြင်ပြောင်းလဲရေးများ ဆက်တိုက်လုပ်ဆောင်ခဲ့ကြောင်း မိုးကုတ်ဒေသခံတစ်ဦးက မဲခေါင်ကိုပြောသည်။
TNLA ထိန်းချုပ်ထားသော သီပေါမြို့သည် ခရစ်နှစ် ၄၈၅ ခုနှစ်မှစတင်ကာ စစ်အာဏာရှင်ဦးနေဝင်းလက်ထက် ၁၉၆၂ ခုနှစ်အထိ ရှမ်းစော်ဘွားများ အစဉ်တစိုက်အုပ်ချုပ်လာခဲ့ပြီး ၂၀၁၄ သန်းခေါင်စာရင်းအရ ရှမ်းလူမျိုးများ အများဆုံးနေထိုင်ခဲ့သည်ဖြစ်ကာ အခုလို မြို့မုဒ်ဦးအမှတ်အသားများ ပြောင်းလဲခြင်းသည် ဒေသခံလူထု၏ ရပိုင်ခွင့်ကို ဆန့်ကျင်နေကြောင်း အရပ်ဖက်အဖွဲ့အစည်းများက တိုက်တွန်းခဲ့ကြသည်။
TNLA မှ အမှတ်အသားများပြင်ဆင်ခဲ့မှုအပေါ် သဘောထားတစုံတရာ ထုတ်ပြန်ခြင်းမရှိပဲ ရှမ်းပြည်ပူးပေါင်းဆောင်ရွက်ရေးကော်မတီ၊ Tai Students Union၊ SL & CC universities of Yangon၊Kunhing Organization၊ Tai Youth Yangon – TYY၊ Global Shan Network – GSN စသည့် ရှမ်းအရပ်ဖက်အဖွဲ့များ၊ ကျောင်းသားအဖွဲ့များက စာထုတ်ကန့်ကွက်ခဲ့ကြပြီး တော်လှန်ရေးအင်အားစုများ၊ နိုင်ငံရေးအဖွဲ့အစည်းများ၊ သျှမ်းလူမျိုးစု နိုင်ငံရေးပါတီများ၊ သျှမ်းတပ်မတော်များသို့လည်း ပူးပေါင်းဖြေရှင်းပေးရန် တိုက်တွန်းခဲ့ကြသည်။
၂၀၂၃ ခုနှစ် သြဂုတ်လ ၇ ရက်တွင်လည်း မူဆယ်မြို့နယ်၊ စယ်လန့်ရွာရှိ ရှမ်းလူမျိုးတို့၏ အထွဋ်အမြတ် အခေါင်အချုပ် ဖြစ်သော စော်ဘွား စဝ်ဆေခန်ဖ၏ နန်းမြို့ရိုးဟောင်းကို ဘူဒိုဇာဖြင့် ဖျက်ဆီးခဲ့သောကြောင့် လူမျိုးရေးပဋိပက္ခ မဖြစ်ပွားစေရေး ငြိမ်းချမ်းစွာဖြင့် ဆွေးနွေးဖြေရှင်းသည့်နည်းလမ်းကို ရှမ်းအဖွဲ့အစည်းအသီးသီးက ဆောင်ရွက်ခဲ့သည်။
အလားတူ TNLA သည် ထိန်းချုပ်နယ်မြေများအတွင်းရှိ ကွတ်ခိုင်မြို့နယ် မိုင်းယုဒေသ၊ နမ္မတူမြို့နယ် မိုင်းရင်ဒေသ များတွင်လည်း အမှတ်အသားပြောင်းလဲသောကိစစ္စရပ်များ ပြုလုပ်ခဲ့ကြောင်း ရှမ်းပြည်ပူးပေါင်းဆောင်ရွက်ရေးကော်မတီမှ ဒီနေ့မနက်ပိုင်းတွင် ထုတ်ပြန်ခဲ့သည်။
၁၀၂၇ စစ်ဆင်ရေး ဒုတိယလှိုင်းအတွင်း သီပေါမြို့မှ စစ်စခန်းများအား ညီနောင်မဟာမိတ်တပ်များမှ ၂ လ ကျော် တိုက်ခိုက်ခဲ့ရပြီး ၂၀၂၄ ခုနှစ် နိုဝင်ဘာလ ၁၃ ရက်တွင် TNLA မှ သီပေါမြို့ကို အလုံးစုံ သိမ်းပိုက်နိုင်ခဲ့သည်။
ဂနိုက်
#MeKongNews
#TNLA
#သီပေါမြို့မုဒ်ဦး
#ပြန်လည်ပြင်ဆင်
#ရှမ်းအလံတော်
