မဲခေါင်၊ ဇန်နဝါရီ ၂၈
ရှမ်းပြည်နယ်တောင်ပိုင်း၊ ပင်လောင်းမြို့နယ်မှာ PNO ပြည်သူ့စစ်အဖွဲ့ဝင်တွေက ဒေသခံပြည်သူတွေကို လက်နက်နဲ့ အနိုင်ထက်ပြုကျင့်ပြီး လျော်ကြေးတောင်းတဲ့ဖြစ်စဉ်တွေ ဖြစ်ပွါးနေတယ်လို့ သိရပါတယ်။
ပင်လောင်းမြို့နယ်၊ ပင်ခွန်ကျေးရွာမှာ လှုပ်ရှားတဲ့ PNO ပြည်သူ့စစ်ရဲ့ ရက်တိုစစ်သင်တန်းဆင်း တပ်ဖွဲ့ဝင်တွေစီးနင်းလာတဲ့ကားကို ဒေသခံလူငယ်တွေစီးနင်းလာတဲ့ကားက ကျော်တက်တာကြောင့် ဒေသခံလူငယ်ရှစ်ဦးနဲ့ ခိုက်ရန်ဖြစ်ပွါးကာ နှစ်ဘက်လုံးဒဏ်ရာရရှိကြပေမယ့် PNO ဘက်က ရွာလူကြီးကိုအကြပ်ကိုင်ကာ လျှော်ကြေးအဖြစ် တစ်ဦးကို ကျပ်ငါးသိန်းတောင်းတယ်လို့ ပြောပါတယ်။
“အဲဒီလို တောင်းတဲ့လျော်ကြေးက ရွာကိုဆေးကြောတာတဲ့၊ မပေးရင် ရွာကနေနှင်ထုတ်မယ်၊ ရွာကနေပယ်မယ်လို့ ရွာသူကြီးကပြောတယ်၊ သူတို့(PNO ပြည်သူ့စစ်)က အဲ့လိုပဲ တစ်ရွာပြီးတစ်ရွာ ပြဿနာလိုက်ရှာနေတာ”လို့ ဒေသခံတစ်ဦးက ပြောပါတယ်။
ဖြစ်စဉ်နဲ့ပတ်သက်ပြီး ကာယကံရှင့်အဖွဲ့အစည်းဖြစ်တဲ့ PNO ပြည့်သူ့စစ်ရဲ့ ဖြေရှင်းချက် ရရှိနိုင်ဖို့ မဲခေါင်က ဆက်သွယ်ပေမယ့် ဖုန်းကိုင်ပြီး ပြန်ချသွားပါတယ်။
အခုလိုမျိုးဖြစ်စဉ်တွေဟာ ပင်လောင်းမြို့နယ် ပင်ခွန်မှာတင် ဖြစ်ပွားနေတာမျိုးမဟုတ်ပဲ PNO ပြည်သူ့စစ် လှုပ်ရှားနေတဲ့ အထူးဒေသ(၆)တစ်ခုလုံးမှာ ဖြစ်ပွားနေတာဖြစ်တာလို့ ပအိုဝ်းလူငယ်အစည်းအရုံး (PYO) တာဝန်ရှိသူတစ်ဦးက ပြောပါတယ်။
၂၀၂၄ ခုနှစ်က ဟိုပုံးမြို့နယ်၊ စံဖူးကျေးရွာမှာ အလားတူ ဖြစ်စဉ်မျိုးဖြစ်ပွါးပြီး လူသတ်မှုအထိဖြစ်ခဲ့တယ်လို့ PYO က ပြောပါတယ်။
“အဓိကတော့ အရပ်သားတွေကနေ စစ်ဝတ်စုံဝတ်ပေးလိုက်တာပဲ ရှိတာ၊ စစ်သင်တန်း ၃ ရက် ၅ ရက်ဆိုတာက သေနတ်ဖြုတ်တပ်ပဲ သင်ပေးနိုင်တာ၊ စစ်သားတစ်ယောက်မှာ လေးစားလိုက်နာရမယ့် စည်းမျည်းစည်းကမ်းတွေ ထိန်းသိမ်းရမယ့် ကျင့်ဝတ်တွေနဲ့ ပတ်သက်ပြီးတော့မှ သင်ကြားလေ့ကျင့်ပေးနိုင်တဲ့ အခြေအနေတွေ မရှိဘူး”လို့ PYO တာဝန်ရှိသူက ပြောပါတယ်။
လက်နက်ကိုင်သူတွေအနေနဲ့ လိုက်နာရမယ့် စစ်စည်းမျည်း စည်းကမ်း(Code of conduct) ကို နားမလည်၊ လိုက်နာမှုမရှိတဲ့အပြင် လက်နက်ကိုင်ပြီး ပြစ်မှုကျူးလွန်းသူတွေကို ထိရောက်တဲ့ အရေးယူမှုတွေ လုပ်ဆောင်တာမျိုးမရှိတာကလည်း မလိုလားအပ်တဲ့ လူ့အခွင့်အရေးချိုးဖောက်မှုတွေကို ဖြစ်စေနိုင်တယ်လို့ ပအိုဝ်းအမျိုးသမီးသမဂ္ဂ(PWU) ရဲ့ တာဝန်ရှိသူတစ်ဦးက ပြောပါတယ်။
“အဆိုးဆုံးကတော့ စစ်သင်တန်းကို ဘယ်သူမှမတက်ချင်တာကြောင့် ဘိန်းစား၊ လူမိုက်နဲ့ ဆိုးသွမ်းတဲ့သူတွေကို စစ်သင်တန်းသွားတက်ခိုင်းပြီး လက်နက်တပ်ဆင်ပေးလိုက်တာ” လို့ ပြောပါတယ်။
နိုင်ငံရေးအတွေးအခေါ်နဲ့ ခံယူချက်နည်းပါးသူတွေ လက်နက်ကိုင်ဖြစ်လာရင် လူထုကို ဆန့်ကျင်ရေးလုပ်လေ့ရှိတာကြောင့် တပ်တွေကို စီမံထိန်းကွပ်မှုကောင်းဖို့လိုတယ်လို့ PNLA ရဲ့ ပြောရေးဆိုခွင့်ရှိသူ ဗိုလ်မှူးကြီးခွန်အောင်မန်းက ပြောပါတယ်။
သူက “သူတို့တပ်မှူးတွေကလည်း အာဏာရှင်စရိုက်နဲ့ သူတို့ရဲ့ တပ်တွေကို အုပ်ချုပ်တာတွေ ရှိတယ်၊ အဲဒီလို သူတို့တပ်မှူးတွေရဲ့ လုပ်ဟန်အတိုင်း အောက်ခြေရဲဘော်တွေလည်း လူထုအပေါ်မှာ ပြီးပြန်တော့မှ အနိုင်ကျင့်တာတွေ ပြုမူတာတွေ တွေ့နေရတယ်” လို့ ပြောပါတယ်။
PNO ပြည်သူ့စစ်ဟာ စစ်အင်အားတိုးပွါးရေးအတွက် လူငယ် လူရွယ်တွေကို အဓမ္မစစ်မှုထမ်းဖို့ဖမ်းဆီးတာရှိသလို ရာဇဝတ်မှုကျူးလွန်ထားသူတွေ၊ မူးယစ်ဆေးရောင်းသုံးသူတွေ၊ အသက်မပြည့်သေးတဲ့ အမျိုးသား၊ အမျိုးသမီးတွေကို ရက်တိုသင်တန်းပေးပြီး စစ်မှုထမ်းခိုင်းနေတာလို့ သတင်းတွေဖေါ်ပြကြပါတယ်။
MK-017
#MeKongNews
#PNOပြည်သူ့စစ်
#ခိုက်ရန်ဖြစ်
#လျှော်ကြေးတောင်း
#လက်နက်ကိုင်
